بىلتىر ۇشىرىلعان ەكى عارىش اپپاراتى قازاقستاننىڭ مەنشىگىنە ءالى وتكەن جوق - ت. مۇسابايەۆ
بۇل تۋرالى بۇگىن پارلامەنت سەناتىنىڭ جالپى وتىرىسىندا ينۆەستيتسيالار جانە دامۋ مينيسترلىگى اەروعارىش كوميتەتىنىڭ ءتوراعاسى تالعات مۇسابايەۆ ءمالىم ەتتى. ەسكە سالايىق، جالپى وتىرىستا «2009 -جىلعى 6 قازانداعى قازاقستان رەسپۋبليكاسىنىڭ ۇكىمەتى مەن فرانسۋز رەسپۋبليكاسىنىڭ ۇكىمەتى اراسىنداعى جەردى قاشىقتىقتان زوندتاۋدىڭ عارىش جۇيەسىن جانە عارىش اپپاراتتارىنىڭ قۇراستىرۋ- سىناۋ كەشەنىن قۇرۋ مەن پايدالانۋ شارتتارى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلدانعان بولاتىن.
«2014 -جىلى قازاقستاننىڭ جەردى قاشىقتىقتان زوندتايتىن ەكى عارىش اپپاراتى وربيتاعا شىعارىلعان. جوعارى جانە ورتاشا دالدىكتەگى بۇل اپپاراتتاردى ۇشىرۋ ءبىزدىڭ تاريحىمىزدا ورىن الىپ وتىر. الايدا، بۇگىنگى كۇنگە دەيىن ەكى عارىش اپپاراتى ءالى دە قازاقستاننىڭ مەنشىگىنە بەرىلمەي كەلەدى. ويتكەنى، قازاقستان مەن فرانتسيا اراسىنداعى كەلىسىم بويىنشا جەردى قاشىقتىقتان زوندتاۋدىڭ عارىشتىق جۇيەسىن قۇرۋ جوبالارىندا بولىنگەن قاراجاتقا قوسىمشا قوسىلعان قۇن سالىعى قاراستىرىلماعان. ءبىز وسى ماسەلەنى شەشىپ، ەكى سپۋتنيكتى وزىمىزگە العان كۇننەن باستاپ، ونى كوممەرتسيالىق ماقساتتا پايدالانا بەرمەكپىز» ، - دەدى ت. مۇسابايەۆ.
ونىڭ ايتۋىنا قاراعاندا، قازاقستاندىق ەكى اپپارات قازىرگى كۇننىڭ وزىندە جۇمىس ىستەپ، مەملەكەتتىك ورگاندارعا ءتيىستى مالىمەتتەر ۇسىنۋ بويىنشا ءوز سەپتىگىن تيگىزۋدە.
«ماسەلەن، قورعانىس مينيسترلىگى وتكەن بىرنەشە ايلاردا ءتۇسىرىلىم فوتولارىن سۇراعان بولاتىن. ونىڭ سوماسى 1,5 ميلليارد تەڭگە شاماسىندا بولدى» ، - دەدى ت. مۇسابايەۆ.
بۇدان بولەك، كوميتەت باسشىسى الداعى ۋاقىتتا قازاقستان مەن فرانتسيا اراسىنداعى كەلىسىمگە وراي، عارىش اپپاراتتارىنىڭ سىناق- كەشەنىن قۇراستىرۋ نىسانى بوي كوتەرەتىنىن اتاپ ءوتتى. بۇل قازاقستانداعى عارىش ينفراقۇرىلىمىنىڭ ەڭ ءىرى نىساندارىنىڭ بىرىنە اينالماق ءارى قازاقستاندىق ماماندار جۇمىس ىستەيتىن ول نىسان ءتۇرلى سيپاتتاعى عارىش اپپاپاراتتارىنىڭ سىناعىن تولىقتاي سيكلمەن وتكىزۋدى قامتاماسىز ەتەدى. بۇنداي نىسان ت م د ەلدەرىندە بولماعان.
اۆتور: قانات مامەتقازى ۇلى
