قازاقستان اۋاعا پارنيكتىك گازداردى شىعارۋ مولشەرىن ازايتپاق - ەنەرگەتيكا ءمينيسترى
بۇل تۋرالى بۇگىن استانادا وسى سالاداعى زاڭنامانى جەتىلدىرۋ تاقىرىبىنا ارنالعان دوڭگەلەك ۇستەلدە ق ر ەنەرگەتيكا ءمينيسترى ۆلاديمير شكولنيك ءمالىم ەتتى.
«قازاقستان اۋاعا كومىرقىشقىل گازداردىڭ مولشەرىن جان باسىنا شاققاندا الەمدىك كورسەتكىشتەن ەكى ەسەگە جۋىق كوپ شىعارادى. بۇل ماسەلە ءوز كەزەگىندە اۋانى لاستاۋ دەڭگەيىن تومەندەتۋدىڭ جاڭا جولدارىن ىزدەۋدى مىندەتتەيدى»، - دەدى ول.
ونىڭ ايتۋىنشا، كليماتتىڭ وزگەرۋىنە بايلانىستى قازاقستان اۋاعا تاستالاتىن زياندى گازداردى تومەندەتۋدى ءوزىنىڭ باستى ماقساتتارىنىڭ ءبىرى رەتىندە قاراستىرىپ وتىر. قازىرگى ۋاقىتتا ءبىزدىڭ ەلىمىز كليماتتىڭ وزگەرۋى جانە اۋانى لاستاۋدى ازايتۋ باعىتىنداعى جۇمىستى حالىقارالىق جانە الەمدىك ۇيىمدارمەن بىرلەسە وتىرىپ اتقارۋدا.
«2013 - جىلى قازاقستاندا كومىرتەك نارىعى پايدا بولدى، 2014 - جىلى پارنيكتىك گازدارعا بەرىلەتىن كۆوتالاردىڭ ۇلتتىق جوسپارى جاسالدى. زاڭناماعا ءتيىستى وزگەرتۋلەر ەنگىزىلدى»، - دەيدى ول.
قازىرگى ۋاقىتتا پارنيكتىك گازداردى اۋاعا تاراتۋ جونىندەگى كۆوتالار 166 كاسىپورىنعا بەرىلگەن.
