سەگىز سۇلۋ قىزىمىزعا سەنىم ارتتىق
6-10- مامىر ارالىعىندا كاتاردىڭ استاناسى - دوحادا ايەلدەر كۇرەسىنەن وتەتىن ايتۋلى جارىستا قازاقستان قۇراماسى ساپىندا سەگىز سپورتشى ونەر كورسەتەدى. ولاردىڭ بارلىعى دا ءتۇرلى حالىقارالىق دودالاردا دارا تالانتىمەن وقشاۋلانىپ جۇرگەن ەلىمىزدىڭ بەلدى بالۋاندارى.
ماسەلەن، اسا جەڭىل سالماقتا تاتيانا امانجول بەلدەسەدى. ول ءۇش رەت ازيا چەمپيونى اتانىپ، ينچحونداعى ازيا ويىندارىندا قولا مەدالدى يەلەندى. 2008-جىلى بەيجىڭ وليمپياداسىندا باق سىناعان تاتيانا بەسىنشى ورىنعا تابان تىرەدى.
53 كەلى سالماقتا جۇلدىز ەشىموۆا ونەر كورسەتەدى. ول 2008 جانە 2011-جىلدارداعى الەم چەمپيوناتتارىندا كۇمىس جانە قولا مەدالدى قورجىنعا سالدى. 2007-جىلى ازيا چەمپيونى اتانسا، ودان كەيىن ءۇش رەت سول جارىستا كۇمىس جۇلدەنى قاناعات تۇتتى. 2012-جىلى جۇلدىز لوندوندا الاۋى تۇتانعان وليمپيادا ويىندارىنا قاتىستى.
55 كەلى سالماقتا ايجان ىسماعۇلوۆا بوز كىلەمگە شىعادى. اقتوبەلىك ارۋ ازيا چەمپيوناتىنىڭ قولا جۇلدەگەرى، مينسكىدەگى الەكساندر مەدۆەد جانە كراسنويارسكىدەگى يۆان يارىگيننىڭ تۋرنيرلەرىندە ۇزدىك ۇشتىكتىڭ قاتارىنان كورىندى.
58 كەلى سالماقتا ايىم ءابدىلديناعا سەنىم ارتىلدى. كەزىندە جاستار اراسىندا جاسىنداي جارقىلداعان قانداسىمىز ايەلدەر باسەكەسىندە دە نامىستى قولدان بەرگەن جوق. 2010-جىلى گۋاڭجۋدا وتكەن ازيا ويىندارىندا ءۇشىنشى ورىنعا جايعاسقان ايىم ودان كەيىن ءتورت رەت قۇرلىقتىڭ باستى دوداسىندا قولا مەدالدى كەۋدەسىندە جارقىراتتى.
60 كەلى سالماقتا كۇش سىناساتىن اياۋلىم قاسىموۆا جاستار بۋىنىنىڭ وكىلى. ۇستىمىزدەگى جىلدىڭ 12- مامىرىندا دۇنيەگە كەلگەن ول بۇعان دەيىن جاسوسپىرىمدەر مەن جاستار اراسىنداعى قۇرلىق بىرىنشىلىگىندە جۇلدە السا، بيىل ايەلدەر اراسىنداعى ەل چەمپيوناتىندا ەكىنشى ورىندى ولجالاپ، ايتۋلى جارىستا باق سىناۋ مۇمكىندىگىنە يە بولدى.
63 كەلى سالماقتا ەكاتەرينا لاريونوۆا ءوز ونەرىن ورتاعا سالادى. 21 جاستاعى ورال كۇرەس مەكتەبىنىڭ تۇلەگى وسى كۇنگە دەيىن تالاي بەلەستەردى باعىندىرىپ ۇلگەردى. ول - جاسوسپىرىمدەر مەن جاستاردى قوسا العاندا ءۇش رەت ازيا چەمپيونى جانە ءۇش رەت سول جارىستىڭ جۇلدەگەرى اتاندى. الەم چەمپيونى جانە الەم بىرىنشىلىگىنىڭ قولا جۇلدەگەرى دەگەن اتاقتارى بار. ايەلدەر سايىسىندا دا ەكاتەرينا ءوزىنىڭ مىقتىلىعىن مويىنداتا الدى. وتانداسىمىز 2013-جىلعى الەم جانە 2014-جىلعى ازيا چەمپيوناتتارىندا ءۇشىنشى ورىندى يەمدەندى.
69 كەلى سالماقتاعى ەلميرا سىزدىقوۆانىڭ دا ۇلتتىق قۇراما ساپىنا قابىلدانعانىنا اسا كوپ ۋاقىت بولا قويعان جوق. 22 جاستاعى قاراعاندىلىق قىز ءوز قۇربىلارى اراسىندا ازيا چەمپيونى، سول جارىستىڭ كۇمىس جانە قولا جۇلدەگەرى اتاندى. 2011-جىلى جاسوسپىرىمدەردىڭ الەمدىك دوداسىندا ءۇشىنشى ورىن الدى.
بىلتىر ەلميرا استانادا وتكەن قۇرلىق چەمپيوناتىندا دا سول ناتيجەگە قول جەتكىزدى. ال 75 كەلى سالماق دارەجەسىندە جاستار بۋىنىنىڭ تاعى ءبىر وكىلى گۇلمارال ەركەبايەۆا شەبەرلىك بايقاسادى.
- قازىرگى كەزدە ناعىز بابىندا جۇرگەن بالۋانداردى ءبىز ازيا چەمپيوناتىنا اپارۋدى ءجون كوردىك. ولاردىڭ بارلىعى دا كاتاردا ەل نامىسىن ابىرويلى قورعايدى دەپ ۇمىتتەنەمىز. ويتكەنى جىل باسىنان بەرى ءبىز بىرنەشە وقۋ-جاتتىعۋ جيىنىن وتكىزىپ، ءتۇرلى حالىقارالىق دودالارعا قاتىستىق. رەسەي جانە موڭعوليا قۇرامالارىمەن بىرگە جاتتىقتىق. بۇل بارلىعىمىز ءۇشىن ءتيىمدى بولدى. ەندى سول جيعان تاجىريبەمىزدى ايتۋلى جارىستا پايدالانىپ، بارىنشا مول تابىسقا قول جەتكىزۋگە تالپىنۋعا ءتيىسپىز، - دەيدى قازاقستان قۇراماسىنىڭ باس باپكەرى قايرات ساعاديەۆ.
ازيا چەمپيوناتىنىڭ وتكەن تاريحىنا نازار اۋدارساق، قازاقستاننىڭ ايەلدەر قۇراما كومانداسى مۇشەلەرىنىڭ باعىندىرعان بەلەستەرى از ەمەستىگىنە انىق كوز جەتكىزەمىز. اڭگىمەمىز ءماندى بولۋى ءۇشىن سوڭعى ءۇش جارىستىڭ ناتيجەلەرىنە توقتالايىق.
2012-جىلى وڭتۇستىك كورەيانىڭ كۋمي قالاسىندا وتكەن باسەكەدە 2 التىن جانە 3 قولا مەدال ولجالاپ، جالپى ەسەپتە ءۇشىنشى ورىندى ەنشىلەدىك. باس جۇلدەنى 3 التىن، 1 كۇمىس جانە 2 قولاسى بار قىتاي قۇراماسى ولجالادى. ەكىنشى تۇعىردا - جاپونيا. كۇنشىعىس ەلىنىڭ قىزدارى 2 التىن، 1 كۇمىس جانە 2 قولانى يەلەندى. ءبىزدىڭ بالۋاندار اراسىنان ەلەنا شالىگينا (67 كەلى) مەن گۇزەل مانيۋروۆا (72 كەلى) دارا شىقسا، ايجان ىسماعۇلوۆا (55 كەلى)، ايىم ءابدىلدينا (59 كەلى)، تاتيانا زاحاروۆا (63 كەلى) جۇلدەگەرلەر ساناتىنا قوسىلدى.
2013-جىلى نيۋ-دەليدەگى دودادا جالعىز جۇلدەگە قول جەتكىزدىك. 51 كەلى سالماقتا بەلدەسكەن تاتيانا امانجول الدىنا جان سالمادى. سول تاتيانانىڭ جالعىز التىنىنىڭ ارقاسىندا كوماندالىق ەسەپتە بەسىنشى ورىنعا ورنالاستىق. الدىمىزدا - جاپونيا (2 التىن+2 كۇمىس+1 قولا)، قىتاي (2 +1+3قولا)، موڭعوليا (1+2+1) جانە سولتۇستىك كورەيا (1+0+2).
2014-جىلعى ازيا چەمپيوناتى الاش توپىراعىندا وتكەنى بەلگىلى. استانا تورىندە توسەلگەن بوز كىلەمدە جاپونيا قۇراماسى اتوي سالدى. ولار 3 التىن جانە 3 قولانى يەلەنىپ، جالپى ەسەپتە كوش باستادى. ەكىنشى ورىندا - قىتاي. اسپاناستى ەلىنىڭ ارۋلارى 2 التىن، 2 كۇمىس جانە 1 قولانى يەمدەندى. 2 التىن جانە 3 قولانى مويىندارىنا ىلگەن قازاقستاننىڭ بالۋاندارىنا ءۇشىنشى تۇعىر بۇيىردى. ءبىزدىڭ قىزداردىڭ اراسىنان تاتيانا امانجول (48 كەلى) مەن گۇزەل مانيۋروۆا (75 كەلى) قارسىلاس شاق كەلتىرگەن جوق. ال ايىم ءابدىلدينا (55 كەلى)، ەكاتەرينا لاريونوۆا (63 كەلى) جانە ەلميرا سىزدىقوۆا (69 كەلى) جۇلدەگەرلەر ساناتىنان كورىندى.
جالپى العاندا، سوڭعى جىلدارى ايەلدەر كۇرەسى ەلىمىزدە مىقتى قارقىن الۋدا. سارى قۇرلىقتىڭ باستى دوداسى تۋرالى جوعارىدا باياندادىق. الەم چەمپيوناتتارىندا دا 8 رەت جۇلدەگەرلەر قاتارىنان كورىندىك. اتاپ ايتساق، 2007- جىلى باكۋدە وتكەن جارىستا ەكى بىردەي بالۋانىمىزدىڭ باعى جاندى. قاپ تاۋى بوكتەرىندە ەلەنا شالىگينا (63 كەلى) كۇمىس السا، ولگا جانىبەكوۆا (72 كەلى) قولا مەدالدى قورجىنعا سالدى. 2008 -جىلى توكيودا جۇلدىز ەشىموۆا (48 كەلى) ەكىنشى ورىندى ولجالادى.
2009 جانە 2010-جىلدارى حەرنينگ پەن ماسكەۋدە جالاۋى جەلبىرەگەن ەكى بىردەي الەمدىك دودادان ەلەنا شالىگينا (63 كەلى، 67 كەلى) ولجالى ورالدى. ول دانيادا قولا السا، رەسەيدە كۇمىس مەدالدى كەۋدەسىندە جارقىراتتى. 2011-جىلى ىستامبۇلدا قايتا جۇلدىز ەشىموۆا (48 كەلى) جەڭىس تۇعىرىنا كوتەرىلدى. بۇل جولى وعان قولا بۇيىردى. 2012-جىلى كانادانىڭ البەرتا شتاتىندا گۇزەل مانيۋروۆا (72 كەلى) ەكىنشى تۇعىرعا تابان تىرەدى. 2013-جىلى بۋداپەشتتە ەكاتەرينا لاريونوۆا (63 كەلى) ءۇشىنشى ورىندى يەلەندى. وعان 2008-جىلى بەيجىڭ وليمپياداسىندا ەلەنا شالىگينانىڭ جانە 2012-جىلى لوندون وليمپياداسىندا گۇزەل مانيۋروۆانىڭ ولجالاعان قوس قولا جۇلدەسىن قوسىڭىز. وسىلاي تىزبەكتەي بەرسەك، ەلىمىزدە ايەلدەر كۇرەسى وكىلدەرىنىڭ جەڭىستى جولى جالعاسا بەرەدى.
عالىم سۇلەيمەن
«ايقىن»
