وتان سوعىسىنىڭ باتىرلارى: تولەگەن توقتاروۆ
سوعىس قارساڭىندا ريددەر قالاسى ماڭىنداعى قورعاسىن زاۋىتىندا جۇمىسشى بولدى. كەڭەس اسكەرى قاتارىنا 1941 - جىلدىڭ جەلتوقسانىندا شاقىرىلىپ، كالينين مايدانى 3- ەكپىندى ارميا 8- گۆارديالىق اتقىشتار ديۆيزياسى 1075-پولكى قۇرامىندا ۇلى وتان سوعىسىنا قاتىسقان.
ديۆيزيانىڭ «وتان ءۇشىن» گازەتى ەرجۇرەك اۆتوماتشىنىڭ ءبىر تاۋلىك ىشىندە جاۋدىڭ 150 دەن استام اسكەرى مەن وفيتسەرىن جويعانى تۋرالى جازدى. باتىل دا بەكەم قيمىلدايتىن تولەگەن جاۋىنگەرلەردى سان رەت جاۋعا باستاپ شىققان. 1942 - جىلى 5 - اقپاندا ت. ناگاتكينو اۋىلىنا الدىڭعىلاردىڭ قاتارىندا كىرە وتىرىپ، جاۋدىڭ 7 اسكەرىن جويىپ، ەكەۋىن تۇتقىندادى.
1942 - جىلى 9 - اقپاندا بورودينو اۋىلى ءۇشىن بولعان كەسكىلەسكەن ۇرىستا روتا جاۋىنگەرلەرى جاۋدىڭ قارسى شابۋىلىنان باس كوتەرمەي ءارى دۇشپان مەن روتانىڭ ارا قاشىقتىعى 100 مەتىر قالعاندا ول قاسىنداعى 4 جاۋىنگەرمەن العا ۇمتىلىپ، روتانى شابۋىلعا باستادى. جاۋ كەيىن شەگىندى. قاھارماندىعى مەن باتىلدىعى ءۇشىن توقتاروۆقا قازا تاپقاننان كەيىن ك س ر و جوعارعى كەڭەسى ءتورالقاسىنىڭ جارلىعىمەن كەڭەس وداعىنىڭ باتىرى اتاعى بەرىلدى (30.1.1943) .
ول تۋرالى كومپوزيتور ر. ەلەبايەۆ «جاس قازاق» ءان- رەكۆيەمىن (1942)، اقىن ن. بايمۇراتوۆ «ەر تولەگەن» (1945) داستانىن جازدى. ريددەر پوليمەتالل كومبيناتىنىڭ اۋماعىندا باتىرعا ەسكەرتكىش ورناتىلىپ، تولەگەن وقىعان №10 مەكتەپكە ونىڭ ەسىمى بەرىلگەن. وسكەمەن، ريددەر، الماتى قالالارىنىڭ ءبىر كوشەسى تولەگەن ەسىمىمەن اتالادى. لەنين وردەنىمەن، بىرنەشە مەدالدارمەن ماراپاتتالعان.
