جاتاقحاناداعى قىزداردى مازالاعان ءارۋاق
ءبىز دە جاس بولدىق، ۇلكەندەردىڭ بولمايدى دەپ تىيىم سالىنعان نارسەسىنىڭ بارلىعى بىزگە قىزىق كورىنەتىن. جانە تىيىم سالىنعان نارسەنى مىندەتتى تۇردە جاساپ كورگىمىز كەلىپ تۇراتىن.
1999-جىلى س. اسفەندياروۆ اتىنداعى مەديتسينالىق ۋنيۆەرسيتەتكە وقۋعا تۇستىك. جاتاحانادا قىزدار باسىمىز قوسىلعاندا كارتا اشۋ، كوفەمەن بال اشۋ، تارەلكەمەن ءارۋاق شاقىرىپ، بولاشاقتى بولجاۋ سەكىلدى نارسەلەرگە اۋەس ەدىك. قولىمىز قالت ەتسە بولاشاعىمىزدى بولجاعىمىز كەلىپ تۇراتىن.
ءبىر كۇنى تاعى سولاي باسىمىز قوسىلعاندا بولاشاعىمىزدى بولجاپ كورۋگە، ونىڭ ىشىندە قاشان تۇرمىس قۇراتىنىمىزدى بولجاپ كورۋگە بەل بايلادىق. ۇلكەن كارتون قاعاز الىپ ءبىر جاعىنا جىلداردى، كەلەسى جاعىنا ارىپتەردى ءتىزىپ جازىپ شىقتىق. ءبىر جۇقالاۋ تارەلكەنى الىپ، قارا قالاممەن، قاس بويايتىن قارىنداشتى سۋلاپ ءجۇرىپ، ەكى جاققا قاراتىپ سترەلكا سىزدىق.
تۇنگى 10 نىڭ كەزى بولعاندىقتان سىرتتان تۇسەتىن جارىعى ونسىز دا ءالسىز بولمەنىڭ جارىعىن ءسوندىرىپ، ءبىر شىراق جاعىپ، بيىكتەۋ كيىم سالاتىن شكافتىڭ ۇستىنە ورنالاستىرىپ قويدىق. ارتىنشا بولمەدەگى ءتورت قىز، باسقا بولمەدەن قوناققا كەلگەن گرۋپپالاس تاعى ەكى قىز ۇستەل ءۇستىن قاۋمالاپ، ورتاداعى تارەلكەگە قولىمىزدىڭ ۇشىن جاقىنداتىپ، ءارۋاق شاقىرا باستادىق.
ارامىزداعى ايعانىم باستاپ داۋىستاپ ءوزىنىڭ ەرتەرەكتە قايتىس بولىپ كەتكەن اجەسىن شاقىرىپ، بولاشاق جارىنىڭ ەسىمىنىڭ قاي ارىپتەن باستالاتىنىن سۇرادى. ءبىر كەزدە تارەلكە جىلجىعانداي بولدى دا، شكاف ۇستىندەگى شىراقتىڭ ءۇستىن بىردەڭە جەلپىگەندەي بولدى دا شىراق ءوشىپ قالدى.
ءبىر-ءبىرىمىزدى باسقان كۇيى، قۇلاپ جىعىلعانىمىزعا قاراماستان، شىڭعىرىپ بولمەدەن اتىپ شىقتىق. ەندى قايتادان انا بولمەگە كىرە الساقشى. كوريدوردان تۇسكەن جارىقپەن، قاۋمالاپ ءجۇرىپ، الدىمەن بولمەنىڭ جارىعىن جاعىپ بولمەگە كىردىك. الايدا بال اشۋدى ودان ءارى جالعاستىرۋعا ءداتىمىز شىداماي ءبارىن جيناپ تاستادىق.
ءوز شارۋامىزعا اينالا بەرگەنىمىز سول ەدى، ەندى بولمەدەگى ەلەكتر جارىعى جالپ ەتىپ ءسونىپ قالدى. تاعى بولمەدەن شىڭعىرىپ اتىپ شىقتىق. كورشى بولمەدەگى كۋرستاس بالالاردى ەرتىپ كەلىپ قاراساق، لامپوچكا كۇيىپ كەتىپتى. ءبىر-ءبىرىمىزدى تىنىشتاندىرىپ، بولمەنىڭ لامپوچكاسىن اۋىستىرىپ، قورقىنىشىمىزدى باسىپ «شاي ىشەيىك» دەسىپ، كوڭىل الدارقاتىپ، باسقا اڭگىمە ايتساق تا قورقىنىشىمىز سەيىلمەي قويدى. ءسويتىپ توسەك سالىپ جاتساق تا، جارىقتى سوندىرمەي ۇيىقتاۋعا كەلىستىك.
ءتۇننىڭ ءبىر ۋاعىندا اسەلدىڭ ۇستىندە جوعارعى كەرۋەتتە جاتاتىن شىنار ساتىر-سۇتىر ەتىپ قۇلاعاندا ءبارىمىز ورە تۇرەگەلدىك. بۇرىن مۇندايى جوق بولاتىن. شىنار جىلاپ تۇرىپ «ۇيىقتاپ جاتقاندا بىرەۋدىڭ توبەسىنەن ءتونىپ تۇرعانىن، ءتۇسىم ەكەن دەپ جاتا بەرگەنمەن الگى ەلەستىڭ كەتپەي قويعانىن سوسىن سودان قاشام دەپ كەرۋەتتەن قۇلاعانىن» ايتىپ، وكىسىگىن باسا المادى.
بۇدان كەيىن ءتىپتى ۇيقىمىز قاشتى. ءبىر كەزدە وزدىگىنەن، كيىم سالاتىن شكافتىڭ ەسىگى اشىلىپ كەتتى. ءتىپتى قۇتىمىز قاشتى. تۇنگى تورتتە كىمدى ەرتىپ كەلەسىڭ. ونىڭ ۇستىنە شىناردىڭ ماڭدايى شكافتىڭ بۇرىشىنا ءتيىپ جىرىلىپ، قاناپ تۇرعان سوڭ، ۆاحتاداعى مارجان اپايعا شۇبىرىپ باردىق. بولمەدە قالۋعا ەشكىمنىڭ جۇرەگى داۋالامادى دا. مارجان اپاي ءمان-جايدى ەستىپ بولعان سوڭ «ءارۋاقتى بەكەر مازالادىڭدار» دەپ، بىزگە ۇرسىپ سويلەپ ءجۇرىپ بولمەگە ەرىپ كەلدى.
الدەبىر دۇعالاردى ايتىپ، بولمە ءىشىن الاستاعانداي بولدى. ءبىز شىناردىڭ ماڭدايىنا سالقىن سۋ باستىق. ءوزىمىز دە ۇرەيلەنىپ، اۋىق اۋىق سالقىن سۋ ۇرتتاپ ءجۇرمىز. مارجان اپاي بارىمىزگە ەرتەمەن مەشىتكە بارىپ قۇران وقىتۋدى ايتىپ، تاڭاتقانشا قاسىمىزدا وتىردى. ءوزىمىزدىڭ دە ودان كەيىن ۇيىقتاۋعا قۇلقىمىز بولمادى.
سول كۇنى كەزدەيسوقتىق پا، الدە قانداي دا ءبىر ءتۇسىندىرىپ بەرە الماس قۇبىلىستار بولدى ما، الدە شىنىمەن ءارۋاقتاردىڭ مازاسىن الدىق پا سونداي ءبىر مازامىزدى العان جاعداي ورىن الدى. تاڭ اتقان سوڭ ساباقتان كەيىن مەشىتكە بارىپ، ساداقا بەرىپ، قۇران وقىتتىق. ءبىراق سودان كەيىن بولمەمىز تىنىشتالدى. ءجونسىز بال اشىپ، بولاشاقتى بولجاۋدى دا قويدىق. سودان بەرى بىزدەن باسقا بولەك ءبىر الەمنىڭ بارىنا، ولاردىڭ رەتسىز مازاسىن الۋعا بولمايتىنىن دا تۇسىندىك.
اقجارقىن لەپەسوۆا،
تالدىقورعان قالاسى
«الاش ايناسى»
