ۇرىمجىدە قازاق ستۋدەنتتەرى تۇڭعىش رەت توعىز قۇمالاقتان جارىس وتكىزدى
4-مامىر جاستار مەرەكەسى بايلانىسمەن قازاق ستۋدەنتتەرىنىڭ تۇڭعىش كەزەكتى « توعىز قۇمالاق» جارىسى26-ءساۋىر كۇنى شينجياڭ گازەتىنىڭ كوپ مەديالى جيىن زالىندا وتكىزىلدى.
وسى جولعى جارىستى شينجياڭ قازاق مادەنيەت قوعامىنىڭ ۇيىمداستىرۋىمەن، شينجياڭ گازەتى مەكەمەسى قاتارلى ورىنداردىڭ قولداۋىندا، شينجياڭ قازاق مادەنيەت قوعامىنىڭ جاستار گرۋپپاسى مەن جۇڭگو قازاق ستۋدەنتتەر بىرلەستىگىنىڭ ءۇرىمجى بولىمشەسى سەلبەسىپ وتكىزدى. جارىسقا ۇلت مۇراسىن ۇلىقتاۋدى ويلاعان ازاماتتار، شاباندوزدار جانە مەديا تىلشىلەرى قاتىناستى.
اۋەلى شينجياڭ قازاق مادەنيەت قوعامىنىڭ ءتوراعاسى ءارىپ زۇرعانبەك ۇلى، شينجياڭ گازەتى قازاق رەداكسياسىنىڭ ورىنباسار باستىعى ءادىل سەمەيقان ۇلى، توعىز قۇلاماق سىندى ۇلتتىق ويىنمىزدى ەلىمىز قازاقتارى اراسىنا قايتا تۇلەجىۋىنە كۇش قوسىپ كەلە جاتقان شينجياڭ ۋنيۆەرسيتەتى سپورت كافەدراسىنىڭ وقىتۋشىسى شىنار قاپان ۇلى، جاستار گرۋپپاسىنىڭ جاۋاپتىسى نۇرعالىم باقىتقان ۇلى قاتارلىلار ءسوز كەزەگىن الىپ، كەزەكتى ءىس- شارانىڭ ءمان-ماڭىزىن اڭگىمەلەدى. ءۇرىمجى، سانجى، شىحزى قاتارلى جەرلەردەن كەلگەن 32 ستۋدەنت ەكى-ەكىدەن گرۋپپاعا ءبولىنىپ ونەر سايسىنا ءتۇسىپ، جارىس الاڭى قىزا ءتۇستى.
تاڭەرتەڭ قارا جارىس، تۇستەن كەيىن شەشۋشى جارىس وزدىرىلدى. سوڭىندا شينجياڭ مەدەنتسينا ۋنيۆەرسيتەتى، كلەنيكا كاسىبى 3-جىلدىعىنىڭ وقۋشىسى ەرمەك جەكەن ۇلى جارىستىڭ اعا جۇلدەگەرلىگىن جەڭىپ الدى.
ەستەرىڭىزگە سالا كەتسەك، توعىز قۇمالاق ويىنى ۇلتىمىزدىڭ ەرتەدەن جالعاسىپ كەلە جاتقان ءداستۇرلى ءتول مۇراسى ءارى بۇقارالىق سپورت ونەرى. ول لوگيكالىق ويلاۋ ، ماتەماتيكالىق ەسەپتەۋ قاتارلى ەرەكشەلىككە يە بولىپ، ويىنشىنىڭ جىلدام ويلاۋىن، جۇرەتىن جولىن الدىن الا بولجاپ، ەسەپتەپ وتىرۋىن قاجەت ەتەدى. بۇل ويىن العاشىندا ورىستە، جەردەن شۇڭقىرلار قازىلىپ، قۇمالاقپەن وينالعان. ال قازىر ون سەگىز وتاۋ، ەكى قازاننان تۇراتىن ارنايى تاقتادا ءجۇز الپىس ەكى تاسپەن وينالادى.
ۇلتىمىزدىڭ ءداستۇرلى سپورت ويىنى بولعان توعىز قۇمالاق حالىقارادا جوعارى دەڭگەيدە دامىپ وتىرعانىمەن، ەلىمىزدە ءتۇرلى سەبەپتەردەن كەنجەلەگەن. كەزەكتى جارىس تۇڭعىش رەت وتكىزىلگەنىمەن ءار جاقتىڭ ورتاق قۇلشىنۋىندا ءساتتى بولىپ، ءوز مارەسىنە جەتتى. الداعى جەردە مۇنداي يگى باستامالاردىڭ كوبەيە بەرۋىنە تىلەكتەسپىز!
