اقتوبەدە ءاليا مولداعۇلوۆانىڭ سىڭلىسىنە حالىق قولداۋ كورسەتتى

بۇعان دەيىن ول باتىر اپاسىنىڭ جەرلەنگەن جەرىنە بارۋعا قاراجات تابا الماي، بيلىك پەن بۇقارادان ماتەريالدىق كومەك سۇراعان ەدى.

ارادا بىرنەشە كۇن وتكەننەن كەيىن، ول كىسىنىڭ ماسەلەسى وڭ شەشىمىن تاپتى. جەرگىلىكتى حالىقتان جارتى ميلليون تەڭگە جينالىپتى. ال اكىمشىلىكتەگىلەر رەسەيگە باراتىن ۇشاققا بيلەت الىپ بەرگەن جانە جول شىعىندارىنا 100 مىڭ تەڭگە بەرىپتى.

ءالىپ ۇسەنوۆا اتى اڭىزعا اينالعان تۋىسىن ۇنەمى تۇسىندە كورەتىنىن ايتتى جانە ەندى اپاسىنىڭ باسىنا بارىپ قۇران باعىشتاماقشى.

بيىل جەڭىستىڭ 70 جىلدىعىنا وراي رەسەيدىڭ پسكوۆ وبلىسى موناكوۆو جەرىندە ءاليا مولداعۇلوۆانىڭ ەسكەرتكىشى كۇردەلى جوندەۋدەن وتكىزىلگەن. ونىڭ ۇستىنە، بيىل قازاقتىڭ باتىر قىزىنىڭ 90 جىلدىعى. بۇيىرسا، ءالىپ اپاي بەيسەنبى كۇنى جولعا شىعادى.

«قۇران وقىپ، اقتىق بايلاپ، رۋحىنا ريزامىن دەپ باس ءيىپ كەلەمىن. قازىر قۋاتتى بولعانىممەن  ءبارى ءبىر اللانىڭ قولىندا عوي. مەن سول نيەتپەن بارا جاتىرمىن»، -  دەيدى ءاليا مولداعۇلوۆانىڭ ءسىڭلىسى ءالىپ ۇسەنوۆا.

ءالىپ اپايدىڭ قولداۋ كورسەتكەن حالىققا ايتار العىسى شەكسىز. ءاليا مولداعۇلوۆانىڭ قازاقتان شىققان باتىر قىز ەكەندىگىن ماقتانىشپەن ناسيحاتتاپ، رەسەيگە ۇلتتىق كيىم كيىپ باراتىندىعىن جەتكىزدى

دەرەككوز: 7 كانال

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى