عالىمدار ۇشاقتى ميمەن باسقارتاتىن باس كيىم ويلاپ تاپتى

پورتۋگاليادا كوپشىلىك نازارىنا ويمەن باسقارىلاتىن دروندار ۇسىنىلدى. بۇل تەحنولوگيا ۇشاق باسقاراتىن ۇشقىشتاردىڭ ساپارعا دايىندىق ۋاقىتىن اناعۇرلىم قىسقارتپاق. سونداي-اق مۇمكىندىگى شەكتەۋلى ادامدارعا دا بۇل تاپتىرماس، قۇرال بولعالى تۇر.

ەندى ۇشۋ قۇرالىن باسقارۋ ءۇشىن قول تيگىزبەك تۇگىل، قىبىر ەتپەۋگە دە بولادى. پورتۋگاليا عالىمدارى وسىنداي عاجايىپ باس كيىم ويلاپ شىعاردى. ول ۇشاقتاردى ميدان تىكەلەي كەلەتىن ءيمپۋلستى تولقىندار ارقىلى باسقارۋعا مۇمكىندىك بەرەدى. ونەرتاپقىشتار مۇنداي جەتىستىككە نەيروبيولوگيا سالاسىنداعى تەرەڭ زەرتتەۋلەر ناتيجەسىندە قول جەتكىزىپ وتىر.

پەدرو سينوگاش، Tekever كومپانياسىنىڭ ديرەكتورى:

- ءبىز قولدانىلعان ءتاسىل ميدان كەلەتىن دابىلدار نەگىزىندە جاسالدى. الگوريتمدەردى جيناۋ ارقىلى سيگنالدار ءتۇرلى قۇرالداردى باسقارۋ جۇيەسىنە اينالادى.

ماماندار ۇشار الدىندا درونعا ارناپ باعدارلاما تۇزەدى. ال وپەراتور ونىڭ قوزعالىسىن باقىلاپ وتىرادى. ينجەنەرلەر بۇل تەحنولوگيانى كوممەرسيالىق اۆياتسياعا ەنگىزۋگە نيەتتى.

ريكاردو مەندەس، Tekever كومپانياسىنىڭ قىزمەتكەرى:

- ءبىز بۇل جوبانى اياقتاعان سوڭ ونى جەردە سىناپ كورمەكپىز. سوسىن تىڭ جوبانى اۋە- عارىش سالاسىندا قولدانۋ ماسەلەسىن باسشىلارمەن تالقىلاپ، باسىن اشىپ الۋىمىز كەرەك. مامانداردىڭ ايتۋىنشا، جاڭا تەحنولوگيا ۇشۋ قۇرالدارى مەن اۋە كولىگىن عانا باسقارىپ قويمايدى. ماسەلەن كەز كەلگەن كولىكتى، ءتىپتى مۇگەدەكتەرگە ارنالعان اربانى دا ميدىڭ بۇيرىق بەرۋى ارقىلى قوزعالتۋعا بولادى.

ريكاردو مەندەس، Tekever كومپانياسىنىڭ قىزمەتكەرى:

- ەگەر ءسىزدىڭ وسىنداي قۇرالىڭىز بولسا، ۇيدەگى زاتتاردى ميدىڭ كومەگىمەن قوسىپ- ءسوندىرۋ دە ءسوز ەمەس. بۇل مۇگەدەكتەر ءۇشىن زور مۇمكىندىك. ولار قولارباسىن تەك ويلاۋ جۇيەسىنىڭ كومەگىمەن-اق باسقارا الادى.

قۇرالدى جاساۋشىلاردىڭ سوزىنە سەنسەك، بولاشاقتا ۇشقىشى جوق ۇشاقپەن ساپار شەگەتىن كۇن دە الىس ەمەس سياقتى. عالىمدار «بۇل تىڭ دۇنيە تالايدى تاڭ قالدىرعانمەن، ءالى-اق تاڭسىق بولۋدان قالادى» دەپ وتىر.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى