ا ق ش- تىڭ بالتيمور قالاسىندا شەرۋ سوڭى جاپپاي تارتىپسىزدىككە ۇلاستى

ەرەۋىلشىلەر بىرنەشە پوليتسيا كولىگىن قيراتىپ، دۇكەندەر مەن ساۋدا ورتالىقتارىن توناعان. بۇدان باسقا، جاراقات العان وفيتسەلەر دە بار.

قالانىڭ بىرنەشە جەرى ورتەنىپ جاتىر. قالا باسشىلىعى نارازى توپ مۇشەلەرىن قاساقانا وت قويدى دەپ ايىپۋدا. قالانىڭ ورتاسىندا بىرنەشە عيمارات ورتكە وراندى. وت سالدارىنان جاراقات العاندار تۋرالى اقپارات تۇسكەن جوق.

ءبىراق تارتىپسىزدىكتەن 15 پوليتسەي جاراقات العان. ەكى ساقشى اۋرۋحانادا جاتىر. بۇلىكتىڭ ارتىندا قىلمىستىق توپتار تۇرعان كورىنەدى.

ەريك كوۆالچيك، بالتيمور پوليتسياسىنىڭ كاپيتانى:

- ءبىر توپ قىلمىسكەر ءبىزدىڭ قىزمەتكەرلەرگە شابۋىل جاسادى. جەتى وفيتسەر اۋىر جارالاندى. سۇيەگى سىنعاندار بار. بىرەۋى ەسسىز كۇيدە جاتىر.

مەريلەند شتاتىنىڭ باسقا قالالارىنان 500 قۇقىق قورعاۋشى شۇعىل شاقىرتىلدى. بالتيمور بيلىگى كورشىلەس شتاتتاردان كومەككە تاعى 5 مىڭ وفيتسەر جىبەرۋدى سۇراپ وتىر. ءتىپتى قالاعا ا ق ش- تىڭ ۇلتتىق گۆارديا اسكەرىن ەنگىزۋگە تۋرا كەلگەن.

لارري حوگان، مەريلەند شتاتىنىڭ گۋبەرناتورى:

- شتات تۇرعىندارىنىڭ ومىرىنە ءقاۋىپ توندىرگەن زورلىق-زومبىلىق پەن ۇرلىقققا جاۋاپ رەتىندە بالتيموردا توتەنشە جاعداي جاريالاندى. مەن مەريلەندتىڭ ۇلتتىق گۆارديا كۇشتەرىن ءتارتىپتى قالپىنا كەلتىرۋ جۇمىسىنا جۇمىلدىردىم. بۇل وڭاي شەشىم ەمەس. ۇلتتىق گۆارديانى تارتۋ -  شاراسىزدىق بەلگىسى.

پوليتسيانىڭ وزبىرلىعىنا قارسى نارازىلىق 25 جاستاعى افروامەريكالىق فرەدي گرەيدىڭ قازاسىنان كەيىن باستالدى. ەرەۋىلشىلەردىڭ ايتۋىنشا، ول پوليتسەيلەردىڭ قاتىگەزدىگىنەن كوز جۇمعان. ءتارتىپ ساقشىلارى بۇلىككە قاتىسقان 25 ادامدى قاماۋعا الدى. قالا مەرى بالتيموردا كەشكى ساعات 10:00 نان تاڭعى 05:00 كە دەيىن كومەندانتتىق ءتارتىپ ەنگىزدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى