مەملەكەت باسشىسى ماسكەۋدە وتەتىن جەڭىس شەرۋىنە قاتىسادى

 بۇل تۋرالى بۇگىن اقوردادا وتاندىق جانە شەت ەلدىك بۇقارالىق اقپارات قۇرالدارىنا سۇحبات بەرگەن ق ر پرەزيدەنتى نۇرسۇلتان نازاربايەۆ ايتتى.

«مەن شەشىم قابىلدادىم، 9 - مامىردا جەڭىس شەرۋىنە قاتىساتىن بولامىن. بىزدە 7 - مامىر - قازاقستان قارۋلى كۇشتەرىنىڭ قۇرىلعان كۇنى. بىزدە دە شەرۋ وتەدى. مەن وسى جەردە ءوزىمىزدىڭ ارداگەرلەرمەن كەزدەسەمىن جانە 8 - مامىردا ماسكەۋگە بارامىن. ويتكەنى، سول ۋاقىتتا ءبىزدىڭ ەۋرازيالىق ەكونوميكالىق كەڭەستىڭ جانە ۇجىمدىق قاۋىپسىزدىڭ ۇيىمىنىڭ جوعارى كەڭەسى وتەدى»، - دەدى ەلباسى.

ق ر پرەزيدەنتى ماسكەۋگە ساپارى بارىسىندا ر ف پرەزيدەنتىمەن جانە باسقا دا ارىپتەستەرىمەن ەكىجاقتى كەزدەسۋ وتكىزەتىندىگىن، ەلدەر اراسىنداعى ەكىجاقتى قارىم- قاتىناس ماسەلەلەرىن تالقىعا سالاتىن اتاپ ءوتتى. سونىمەن قاتار ق ر پرەزيدەنتى ۇلى جەڭىستىڭ 70 جىلدىق مەرەيتويىنا قاتىستى دا پىكىر ءبىلدىردى.

 «ءبىز سول ۋاقىتتا ءبىر ەل بولدىق جانە بىرگە سوعىستىق. سول كەزدە، سوعىس الدىندا قازاقستان حالقى 9 نەمەسە 10 ميلليون بولاتىن. ونىڭ 2 ميلليونى، حالىقتىڭ 20 پايىزى سوعىسقا شاقىرىلدى. ولاردىڭ جارتىسى سوعىس دالاسىنان ەلگە ورالمادى. سوندىقتان دا رەسەي مەن باسقا دا ەلدەردەگى سياقتى قازاقستاننىڭ ءاربىر وتباسى سوعىس سالدارىن بىلەدى. جىلدان- جىلعا ارداگەرلەر قاتارى سيرەپ بارادى. ولاردىڭ بارلىعىن ءبىز ءوز قامقورلىعىمىزعا الدىق»، - دەدى ن. نازاربايەۆ.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى