اقىلبەك جەمەنەيگە «قىزىل ورىك» ءانى قانشا تابىس اكەلدى؟
قىزىل ورىك، قىزىل ورىك،
قويشى ماعان كوڭىل ءبولىپ، دەپ كەلەتىن كوڭىلدى ءان وينالسا، بيگە يكەمى جوق جانداردىڭ ءوزى دوڭگەلەنىپ بيلەپ كەتەدى.
تويدىڭ حيتىنا اينالعان « قىزىل ورىك» اقىلبەكتى تويدىڭ كورولىنە اينالدىردى. وزىنە ساتتىلىك اكەلگەن وسى ءان ارقىلى اقىلبەك قانشا تابىس تاپتى؟ ءدال وسى سۇراققا اقىلبەك جەمەنەي «Comode» جۋرنالىنا بەرگەن سۇقباتىندا ايتىپ بەرگەن ەدى.
اقىلبەك جەمەنەيدىڭ ايتۋىنشا، ول « قىزىل ورىك» ءانى سونشالىقتى حالىقتىڭ كوڭىلىنەن شىعىپ، حيت بولادى دەپ ويلاماعان. «كەيىنگى كەزدە قازاق ەستراداسىندا شەتەلدىك اندەردى قايتالاپ ورىنداۋ سانگە اينالدى ەمەس پە. مەن دە وسى ادىسپەن ءان ايتىپ كورەيىن دەدىم. ءاننىڭ وريگينال نۇسقاسى « قىزىل ورۇكتىڭ» نەگزىگى ورىنداۋشىسى ميرلان الىقۇلوۆ اتتى قىرعىز ءانشىسى. ميرلان وسى انگە اۆتورلىق قۇقىق تۋرالى پاتەنت العان سوڭ ول جاقىندا الماتىعا كەلدى. ەكەۋمىز شىعارماشىلىقتا ءارى قاراي بىرلەسىپ جۇمىس ىستەۋ تۋرالى كەلىسىمشارتقا وتىردىق. « قىزىل ورىك» - مەنىڭ رەپەرتارىمداعى وزگە ەلدەن الىنعان ءبىرىنشى ءان.
اندە جاس جىگىتتىڭ قىزىل كويلەكتى ارۋعا عاشىق بولعانى تۋرالى ايتىلادى. ۇناتقان قىزىنىڭ ەسىمىن سۇراۋعا باتىلى جەتپەگەن جىگىت ونى « قىزىل ورىك» دەپ اتايدى. ءبىز ءاننىڭ ءماتىنىن عانا اۋداردىق، ال اۋەنى وزگەرىسسىز قالدى. قازاق تىلىندەگى ءماتىننىڭ اۆتورى بەلگىلى اقىن رينات زايىتوۆ.
ءاننىڭ ءماتىنى دە، اۋەنى دە وتە قاراپايىم، جەڭىل. « قىزىل ورىك» ءانىنىڭ كوپشىلىككە ۇناعانى دا وسىدان شىعار. ءاننىڭ شىققانىنا 3 جىل بولدى، مەن قازىر بۇل ءاننىڭ حالىقتىڭ جۇرەگىنەن ورىن العانىن نىق سەنىممەن ايتا الامىن. وسى ءاندى حالىق تىڭدايدى، بىرگە شىرقايدى، تويلاردا بيلەيدى، شاتتانادى. ەڭ باستىسى، حالىق بۇل ءاننىڭ ءوز تويلارىندا ورىنداعانىن قالايدى. انشىگە بۇدان اسقان قۇرمەت بار ما؟
اقىلبەك جەمەنەيدىڭ « قىزىل ورىككە» دەيىن دە قازاقشا جاقسى اندەرى بولدى، «قىزىل ورىكتەن» كەيىن دە اندەرى جازىلىپ جاتىر. ءبىراق ءانشىنىڭ تانىمالدىعىن ارتتىرىپ، حالىقتىڭ الدىنداعى جاۋاپكەرشىلىگىن سەزىندىرگەن دە، ءانشىنى تابىسقا كەنەلتكەن دە وسى - « قىزىل ورىك» .
ءانشى « قىزىل ورىكتىڭ» ارقاسىندا ءبىراز بايىپ قالعانىن جاسىرمايدى. «كولىك الدىم، باسپانالى بولدىم، ءوزىمنىڭ جەكە دىبىس جازۋ ستۋديامدى اشتىم» ، دەيدى ءانشى. دەمەك، تابىسى جامان ەمەس. قازاق شوۋ- بيزنەسىندە تويدىڭ ءرولى وتە ماڭىزدى ەكەنىن ەسكەرسەك، تالاي ءانشىنىڭ قالتاسىن قامپايتقان قازاق تويى باردا، ءالى تالاي توي حيتتەرى تۋاتىنى بەلگىلى. ال اقىلبەكتىڭ رەپەرتۋارى كونتسەرتكە جانە تويعا ارنالعان اندەردەن تۇرادى. ويتكەنى ءانشى توي اندەرىنە قاشاندا سۇرانىس جوعارى بولاتىنىن ايتادى. سونداي- اق اقىلبەك شەتەلدىڭ اندەرىن قازاقشالاپ ايتۋعا دا وڭ كوزقاراسپەن قارايدى. تەك اۆتورلىق قۇقىقتى ساقتاۋعا ءمان بەرگەن ءجون ەكەنىن ايتادى ول. ءانشىنىڭ ويىنشا، كەيبىر انگە قازاقشا ءار بەرىپ، وزگەشە وڭدەسە ءاننىڭ ەكىنشى تىنىسى اشىلىپ، جاڭاشا شىرقالادى.
بۇگىندە ءانشى ءوزىنىڭ رەپەرتۋارىن تولىقتىرا ءتۇسۋ ماقساتىندا ەڭبەك ەتىپ جاتقان كورىنەدى. ويتكەنى ءانشى ءوزىن حالىق تەك ءبىر ءاننىڭ ورىنداۋشىسى رەتىندە قابىلداعانىن قالامايتىنىن ايتادى.
«الاش ايناسى»
