تۇرىكتەر «كوك جوتەلگە» قۇدا ءتۇستى
بۇل جولى تۇرىكتەر قازاق انىنە «قۇدا ءتۇستى». ولار ەلىمىزدە «اق تىلەك»، «كوك جوتەل» اندەرىمەن تانىلعان ءانشى، عالىمجان جولداسبايعا حابارلاسىپ، ۇسىنىس جاساعان. ەكىجاقتى كەلىسىم ناتيجەسىنىڭ قانداي بولعانىن سۇراپ، عالىمجانمەن سۇحباتتاستىق.
- الدىمەن تۋىندايتىن سۇراق: «تۇرىكتەردىڭ قۇلاعىنا قازاق ءانى قالاي جەتتى؟»
- مەنى كوپشىلىككە تانىمال ەتكەن وسى «اق تىلەك» پەن «كوك جوتەل» ءانى. ەكەۋىنە بىردەي بەينەبايان ءتۇسىرىپ، بارلىعى سياقتى عالامتورعا جۇكتەدىم. تۇرىك اعايىندارىمىز بەينە كليپتى تاماشالاي وتىرىپ، تۇركى حالىقتارىنا ورتاق داستۇرلەردى كورگەن. سودان سوڭ، سول ءاندى سۇراپ، قولقا سالىپ مەنى ىزدەي باستاپتى.
- انگە «قۇدا ءتۇسۋىنىڭ» باستى ماقساتى نە؟
- «اق تىلەك» پەن «كوك جوتەلگە» سۇرانىس تۋدىرعان باستى ماقسات - تۇركياداعى ۇلتشىل قوزعالىس پارتيالارىنىڭ سايلاۋى. اتالعان شارادا ءاربىر ۇمىتكەر پارتيا ءوز ءانۇراندارى ارقىلى ۇگىت-ناسيحات جۇمىستارىن جۇرگىزەدى ەكەن. مەنىڭ اندەرىمدى لايىق دەپ تاۋىپتى.
- ەندى اندەردىڭ تۇرىك تىلىندەگى نۇسقاسىن كىم ورىندايدى؟
- ەكى ءان دە حالقىمىزدىڭ ءتول تۋىندىسى. ونى ەسترادا باعىتىندا جاڭاشا وڭدەگەن - ءوزىم. مەنى تاپقاننان سوڭ، تۇرىك باۋىرلارىمىز ءوز تىلىندە جازىلعان ماتىنمەن قازاق ءانىن قوسىپ ورىنداۋعا ۇسىنىس جاساعان بولاتىن. كەيىننەن، تۇركيالىق انشىگە ورىنداتاتىن بولدى.
- سونىمەن، پارتيانىڭ ءانۇرانى قاي ءان بولاتىن بولدى؟ «اق تىلەك» پە الدە «كوك جوتەل» مە؟
- ەكەۋىن دە مەنەن رۇقسات ارقىلى سۇراپ الدى. ال، پارتيانىڭ ءانۇرانى «اق تىلەك» بولاتىن بولىپتى. تۇركيادا قازاقتىڭ قاي ءانى شىرقالسا دا ۇلتىمىز ءۇشىن ەرەكشە قۋانارلىق جايت دەپ بىلەمىن.
- ءاننىڭ «قالىڭمال» جايى قالاي بولدى؟
- قاراجات جاعى ءالى شەشىلە قويعان جوق. ايتارىم، ءان تەگىن بەرىلگەن جوق. جاقىن ارادا ءبارى ءوز شەشىمىن تابادى.
baistars.kz
