ينتەرنەتتە ەلىمىزدەگى رەستورانداردىڭ «قارا ءتىزىمى» جاريالانادى
بۇل تۋرالى today.kz حابارلادى.
بۇدان بىلاي قازاقستاندىقتار ەلىمىزدەگى رەستورانداردا جۇرگىزىلگەن سانيتارلىق تەكسەرۋلەردىڭ قورىتىندىسى تۋرالى ينتەرنەت ارقىلى بىلە الادى. مۇنداي ورىنداردىڭ «قارا ءتىزىمى» قازاقستان رەسپۋبليكاسىنىڭ «اقپاراتتاندىرۋ تۋرالى» زاڭى قابىلدانعاننان كەيىن ارنايى سايتتاردا جاريالانباق.
تاياۋدا اتالعان زاڭدى ءماجىلىس ءبىرىنشى وقىلىمدا ماقۇلداعان بولاتىن. اقپاراتتاندىرۋ تۋرالى زاڭ جوباسىندا مەملەكەتتىك ورگاندارعا وزدەرى جايلى كەي مالىمەتتەردى جاريالاۋدى مىندەتتەيتىن نورما قاراستىرىلعان. بۇل اقپاراتتار ينۆەستيتسيالار جانە دامۋ مينيسترلىگىنىڭ كەلىسىمىمەن تاراتىلادى.
«ءبىز بۇل مىندەتتى مەملەكەتتىك ورگانداردىڭ تۇراقتى تۇردە ورىنداۋىن قالايمىز. سونداي- اق، جاريالاناتىن مالىمەتتەردىڭ وزەكتى بولعانى ماڭىزدى. ماسەلەن، ا ق ش-تا Don't eat at (« بۇل جەردەن تاماقتانبا») دەگەن قوسىمشا بار.
بۇل اقپارات كوزى ارقىلى قاي جەردە قانداي رەستوران بار ەكەنىن، ولاردىڭ اس ءمازىرىن، سانيتارلىق نورماعا جاۋاپ بەرە مە، جوق پا - بارلىعىن بىلە الامىز. ءسىز ءوزىڭىز اس ىشكىڭىز كەلگەن جەردى ءارى ءقاۋىپسىز تاماقتاناتىن ورىندى الدىن الا تاڭداي الاسىز. مالىمەتتەردىڭ اشىقتىعىن مەملەكەتتىك ورگاندار جانە كاسىپكەرلەرمەن بىرگە پىسىقتايتىن بولامىز»، - دەدى ينۆەستيتسيالار جانە دامۋ مينيسترلىگى بايلانىس، اقپاراتتاندىرۋ جانە اقپارات كوميتەتى اقپاراتتاندىرۋ سالاسىندا مەملەكەتتىك ساياساتتى قالىپتاستىرۋ باسقارماسىنىڭ باسشىسى جانات جاحمەتوۆا.
«بىرىنشىدەن، ءبىز تەمىر قۇرال-جابدىقتار ساتىپ المايمىز. سەرۆەرلىك عيماراتتاردى جابدىقتامايمىز. كەز كەلگەن مەملەكەتتىك ورگان نارىققا شىعىپ: «ماعان قۇجات اينالىمىمدى اۆتوماتتاندىراتىن اقپاراتتاندىرۋ جۇيەسى قاجەت»، - دەپ سۇراۋ سالا الادى. مۇنداي سۇرانىستى كورگەن كاسىپكەر شەشىمدەرىن قىزمەت كورسەتۋ تۇرىندە ۇسىنادى.
ەسەپ- قيساپ، قۇجات اينالىمى سەكىلدى تيپتىك قىزمەت كورسەتۋدىڭ بىرنەشە شەشىمى بولادى. سونداي- اق، باعاسى دا تومەن. ءبىزدىڭ IT- كومپانياعا بىرىنشىدەن، ءوز ونىمدەرىن ساتۋعا، ەكىنشىدەن بارىنشا باسەكەگە قابىلەتتى بولۋىنا مۇمكىندىك تۋادى»، - دەپ مالىمدەدى جانات جاحمەتوۆا.
سونداي-اق، زاڭ جوباسىن تالقىلاۋ بارىسىندا قازاقستاندا MNP قىزمەتىن ەنگىزۋ مۇمكىندىكتەرى دە قاراستىرىلدى. وسى قىزمەتتىڭ كومەگى ارقىلى قازاقستاندىقتار باسقا ۇيالى بايلانىس وپەراتورلارىنا بۇرىنعى نومىرلەرىن وزگەرتپەستەن اۋىسا الادى. «قازىرگى تاڭدا ءبىز وسى زاڭ جوباسىمەن اركىم ۇيالى بايلانىس تەلەفونى ارقىلى الاتىن قىزمەت تۇرلەرىن سايكەستەندىرگىمىز كەلەدى. ءسىز تەحنيكالىق بايقاۋدىڭ كۇنىن، مەكەنجاي انىقتاماسىن قاراي الاسىز. مۇنداي قىزمەتتەردىڭ سانى 50 دەن اسادى. جىل اياعىنا دەيىن ءبىز تاعى 22 قىزمەت ءتۇرىن قوسۋدى جوسپارلاپ وتىرمىز.
ال 2016 -جىلى مۇنداي قىزمەت 100 گە جۋىقتايدى. موبيلدى ۇكىمەت - بۇل ەلەكتروندى ۇكىمەتتىڭ جاڭا دامۋ كەزەڭى. ماسەلەن، ءسىز بانككە كەلدىڭىز، قانداي دا ءبىر قىزمەتتى پايدالانۋ ءۇشىن الدىمەن سىزگە مەكەنجاي انىقتاماسى كەرەك. ءسىز ونى بانك مەنەدجەرىنىڭ الدىندا تۇرىپ- اق ۇيالى تەلەفونىڭىزداعى ءموبيلدى قوسىمشا ارقىلى الا الاسىز»، - دەيدى باسقارما باسشىسى. ەستەرىڭىزگە سالا كەتەيىك، ينۆەستيتسيالار جانە دامۋ ۆيتسە-ءمينيسترى اسقار جۇماعۇلوۆ تاياۋدا ءوزىنىڭ twitter- دەگى پاراقشاسىندا اتالعان زاڭ جوباسىنىڭ جاڭاشىلدىقتارى تۋرالى ايتقان بولاتىن.
ەلامان قوڭىر.
اقپارات كوزى: «ەگەمەن قازاقستان»
