قازاقستاندا تۇرمىس قۇرماعان قىزداردىڭ سانى كۇرت ارتتى
تۇرمىس قۇرماعان نازىك جاندىلار جالعىزدىقتان ارىلۋ ءۇشىن تانىسۋ اگەنتتىكتەرىنە، حالىق ەمشىلەرىنە دە جۇگىنۋگە ءازىر، - دەپ حابارلادى 31- ارنا.
«قوعامدا ايەل جالعىز بولسا، ەشكىمگە كەرەگى جوق دەگەن پىكىر قالىپتاسقان. كۇيەۋى جوقتىعىنا قىمسىناتىنداردىڭ قاتارىندا جاس قىزدار دا بار»، - دەيدى تانىسۋ اگەنتتىگىنىڭ باسشىسى راۋشان بازاربايەۆا.
راۋشانعا جۇگىنەتىندەر - كوبىنە 30 دان اسقان ەر كىسىلەر مەن ايەل الۋعا اسىقپايتىنداردىڭ انالارى. ولاردىڭ بولاشاق ايەلگە قوياتىن تالاپتارى بىردەي: مەنمەندىگى جوق، تىم اقىلدى ەمەس، سابىرلى جانە ەڭ باستىسى جاسى 27 دەن اسپاعان ايەل بولۋى شارت.
كەيبىرەۋلەر حالىق ەمشىلەرى وزدەرىن جالعىزدىقتان قۇتىلۋعا كومەكتەسەتىنىنە كادىمگىدەي سەنىپ جاتادى.
«قىزدار ەر كىسىنىڭ باسىن اينالدىرىپ بەرۋدى سۇراپ كەلىپ جاتادى. باستى قالاۋلارى - كۇيەۋگە شىعۋ. ونداي ايلدەردىڭ كوبى 30 جاستا»، - دەيدى ەمشى ۆيكتور دۋبوۆوي.
تۇرمىس قۇرماعانداردىڭ قامىن ويلاعان دەپۋتاتتار بىرەسە بالاسى جوقتارعا سالىق سالۋدى، ەندى بىردە كوپ ايەلدىلىكتى زاڭداستىرۋدى ماسەلەنىڭ شەشىمى رەتىندە ۇسىنعان بولاتىن.
قىزىلوردا وبلىسىندا 18-60 جاس ارالىعىنداعى 380 مىڭ ايەلدىڭ ءاربىر بەسىنشىسى وتباسىن قۇرۋدى ارمانداۋمەن ءجۇر.
ەستەرىڭىزگە سالساق، جاقىندا ينتەرنەتكە قازاقستاندىقتاردىڭ قالىڭدىق گۇلىنە تالاسىپ، توبەلەسكەن ۆيدەوسى جۇكتەلگەن بولاتىن. سەنىم بويىنشا قالىڭدىقتىڭ گۇلىن قاعىپ ۇلگەرگەن ايەل جاقىن ارادا تۇرمىسقا شىعادى.
