قازاقستان يراندىق يادرولىق ماسەلە بويىنشا كەلىسسوزدەر ۇردىسىنە ءوزىنىڭ تاجىريبەلىك ۇلەسىن قوستى - ە. ىدىرىسوۆ
دەپ جازادى ق ر سىرتقى ىستەر ءمينيسترى ەرلان ىدىرىسوۆ ءوزىنىڭ بلوگىندا.
«قازاقستان يادرولىق قارۋدى تاراتپاۋ ءتارتىبىن تۇراقتى ۇستاناتىن جانە يادرولىق قارۋدان ءوز ەركىمەن باس تارتقان ەل رەتىندە كەلىسسوزدەر ۇردىسىنە (يراندىق يادرولىق باعدارلاما بويىنشا - رەد. ) ءوزىنىڭ تاجىريبەلىك ۇلەسىن قوستى. ەلىمىز 2013 - جىلى ساۋىردە كەلىسسوزدەردىڭ ەكى راۋندىن وتكىزۋ ءۇشىن الاڭ ۇيىمداستىرىپ، يران جانە «التىلىق» اراسىندا كەلىسسوزدەر بارىسىندا ءوزارا سەنىم قالپىن تۋدىرۋ جانە سىندارلى ديالوگ ىلگەرىلەتۋ ءۇشىن ۇلەس قوستى»، دەپ اتاپ ءوتتى مينيستر.
ق ر س ءى م باسشىسى استاناعا جاقىندا يراننىڭ سىرتقى ىستەر ءمينيسترى دجاۆاد ءزاريفتىڭ كەلىپ كەتكەنىن ەسكە سالدى.
«يراندىق ارىپتەسىمنىڭ كەلۋى قازاقستاندىق جانە شەتەلدىك ب ا ق وكىلدەرى تاراپىنان زور قىزىعۋشىلىق تۋدىردى. بۇل، ەڭ الدىمەن، ارىپتەسىمنىڭ قازاقستانعا كەلۋى الدىندا عانا وتكەن لوزانناداعى كەلىسسوزدەرگە بايلانىستى بولدى. وندا يران جانە يراندىق يادرولىق باعدارلاما بويىنشا حالىقارالىق دەلدالدار «التىلىعىنىڭ» اراسىندا ساياسي شەكتى كەلىسىمدەر ورنادى. بۇل ءبىز ءۇشىن دە وتە قۋانىشتى جاعداي بولدى، سەبەبى يراندىق يادرولىق باعدارلاما اينالاسىنداعى جاعدايدىڭ بەيبىت ساياسي- ديپلوماتيالىق جولمەن شەشىلۋى ءوڭىرىمىزدىڭ دە، جالپى الەمنىڭ دە قاۋىپسىزدىك جۇيەسىن نىعايتۋ ءۇشىن ماڭىزى زور، جانە سول ماسەلەدەن ءبىز تىس قالا المايمىز»، - دەيدى ە. ىدىرىسوۆ.
ءمينيستردىڭ مالىمدەۋىنشە، ەل باسشىلىعىنىڭ م. زاريفپەن جوعارى جانە وزگە دەڭگەيلەردە وتكەن كەزدەسۋلەرى بارىسىندا اتالعان ماسەلە بويىنشا قورىتىندى كەلىسىمگە قول جەتكەنىنشە قازاقستاننىڭ ءتيىستى قولداۋ كورسەتۋگە دايىندىعى بىرنەشە رەت اتاپ ءوتىلدى.
«ارينە، تاراپتاردىڭ ۋاعدالاستىقتارى ۇزاق جولدىڭ تەك جارتىلاي ناتيجەسى عانا، دەگەنمەن، بۇل كەلىسسوزدەرگە قاتىسۋشى ەلدەردىڭ ساياسي نيەتى ساقتالىپ، يراندىق يادرولىق باعدارلاما بويىنشا جالپىعا بىردەي كەلىسىمگە ءتيىستى مەرزىمىندە قول جەتۋدىڭ كەپىلىنە اينالادى دەگەن ءۇمىتىمىزدى ۇزبەيمىز»، - دەپ تۇيىندەدى ول.
