قازاقستان بالتىق تەڭىزىندە جانە پارسى شىعاناعىندا تەرمينالدار سالادى

بۇل تۋرالى «ەۋرازيانىڭ كولىكتىك دالىزدەرى: ىنتىماقتاستىقتىڭ جاڭا جولدارى» اتتى حالىقارالىق فورۋمدا «قازاقستان تەمىر جولى» ا ق ۆيتسە- پرەزيدەنتى باۋىرجان ورىنباساروۆ ءمالىم ەتتى. 

«بالتىق تەڭىزىندە جانە پارسى شىعاناعىندا تەرمينالدار سالۋ جوباسى قاراستىرىلۋدا. ول كولىكتىك جەلىلەرمەن بايلانىس ورناتىپ، الەمدىك مۇحيتقا شىعۋعا مۇمكىندىك بەرەدى»، - دەپ اتاپ ءوتتى ول.  

ب. ورىنباساروۆتىڭ سوزىنە قاراعاندا، ق ت ج زامان اعىسىنا ساي كاسىپكەرلىكتى ترانسفورماتسيالاۋ ساياساتىن جۇرگىزبەك.

كومپانيا تەك، تەمىرجول قىزمەتىمەن شەكتەلىپ قانا قويماي، بىرىككەن لوگيستيكالىق قىزمەت: تەڭىز، اۋە جانە كولىك تاسىمالىمەن اينالىسۋدى، سونداي- اق زاماناۋي تەرمينالدار سالۋدى جوسپارلاپ وتىر.

«ءبىز ترانسكاپسيلىك ايماقتى دامىتۋعا مۇددەلىمىز. 2013 - جىلى بىزدە كەمە كومپانياسى قۇرىلدى. قازىرگى ۋاقىتتا كاسپي ارقىلى جۇك تاسىمالداۋ جولعا قويىلدى. 2020 - جىلعا قاراي قازاقستاندىق فلوتتىڭ كەمە سانى 20 عا جەتەدى»، - دەپ اتاپ ءوتتى ول.

«قازاقستان جەرىمەن ەرتە زامانداردا ءىرى ساۋدا كەرۋەنى - ۇلى جىبەك جولىنىڭ ەداۋىر بولىگى وتەتىن بولعان. ول ءوز كەزەگىندە ەۋرازيالىق ايماقتىڭ ساۋدا- ساتتىق جولدارىنىڭ دامۋىنا ۇلكەن ىقپال ەتتى. ەۋرازيا قۇرلىعىنىڭ قاق ورتاسىندا جايعاسقان، اشىق تەڭىزگە شىعاتىن مۇمكىندىگى جوق قازاقستان مەملەكەتى تاريحي ساۋدا باعىتتارىن قايتا جاڭعىرتۋعا مۇددەلى. الەمدىك ەكونوميكالاردىڭ ەكى پوليۋسى اراسىندا تۇرعان ءبىزدىڭ مەملەكەت ترانزيتتىك الەۋەتتى دامىتۋعا ۇلكەن ءمان بەرىپ كەلەدى.

 ساراپشىلاردىڭ بولجامىنشا، ايماقتا ساۋدا كولەمى 1,5 ەسەگە وسەدى: 2014 - جىلى - 800 ميلليارد دوللار بولسا، 2020 - جىلى 1 تريلليون دوللاردان اسادى. ءبىز 2020 - جىلعا قاراي قازاقستان ارقىلى وتەتىن ترانزيتتىك جۇك اعىمىن قوسىمشا 10 ميلليون تونناعا دەيىن ارتتىرۋدى كوزدەۋدەمىز. قازىر ونىڭ كولەمى - 117 ميلليون توننا، ونىڭ 90 پايىزى تەڭىز كولىگىنە تيەسىلى»، - دەدى ول.  

ونىڭ پىكىرىنشە، جۇك اعىمىن ۇلعايتۋ ءۇشىن قازاقستان الەمدىك كولىك جۇيەلەرىمەن جالعاسقان دامىعان كولىكتىك ينفراقۇرىلىمعا يە بولۋى شارت.  

«وسى ماقساتتا «قازاقستان تەمىر جولى» ۇلتتىق كومپانياسى 2020 - جىلعا دەيىن 36 ميلليارد دوللار ينۆەستيتسيا سالۋدى جوسپارلاۋدا. قازىردىڭ وزىندە قازاقستان مەن قىتاي 40 ميلليون توننا جۇك تاسىمالداۋعا مۇمكىندىك بەرەتىن شەكارانىڭ ەكى جەرى ارقىلى وتەتىن تەمىرجول- كولىكتىك ينفراقۇرىلىمى قۇرىلىسىن اياقتادى. رەسەيمەن، قىتايمەن، پارسى شىعاناعى ەلدەرىمەن جانە ەۋروپا وداعى مەملەكەتتەرىمەن ارادا ساۋدا- ساتتىق ءوسىپ، قازاقستاندا كولىكتىك دالىزدەردىڭ جاڭا ارحيتەكتۋراسى قالىپتاسۋدا. تەمىرجول جەلىلەرىنىڭ ءتيىمدى قۇرىلىمىن قالىپتاستىرۋ ماقساتىندا 2014 - جىلى سولتۇستىك- وڭتۇستىك، شىعىس- باتىس باعىتتارىنداعى جولداردى 1 مىڭ شاقىرىمعا دەيىن قىسقارتۋعا مۇمكىندىك بەرگەن جاڭا تەمىرجول سالىندى. ول كولىكتىك شىعىنداردى 30 پايىزعا دەيىن ازايتۋعا مۇمكىندىك بەرەدى. ال جۇك تاسىمالىنىڭ ۋاقىتى 3 تاۋلىككە دەيىن قىسقاردى. بۇل ەلدەگى ترانزيتتىك الەۋەتتى ارتتىراتىنى ءسوزسىز»، - دەپ اتاپ ءوتتى ب. ورىنباساروۆ.  

اۆتور:   جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى