شىمكەنت تۇرعىندارىنا جاڭا پاتەرلەردىڭ كىلتتەرى تابىستالدى - فوتو

مامىر ايىنىڭ سوڭىنا دەيىن ەل يگىلىگىنە تاپسىرىلاتىن پاتەرلەردىڭ 50 پايىزى جاس مولشەرى 35 جاسقا دەيىنگى جاس وتباسىلار اراسىندا بولىنگەن. قالعان بولىگى بيۋدجەتتىك ۇيىمداردىڭ ەڭبەككەرلەرىنە، مەملەكەتتىك قىزمەتشىلەرگە، كوپ بالالى وتباسىلارعا، مۇگەدەك بالالاردى اسىراۋشى وتباسىلارعا، اتا-انا قامقورلىعىنسىز قالعان جەتىم بالالارعا، تولىق ەمەس وتباسىلارعا جانە ورالماندار مەن اسكەري قىزمەتشىلەرگە بەرىلەدى.

«بايتەرەك» حولدينگى» جانە «قازاقستان يپوتەكالىق كومپانياسى» ي ۇ» ا ق جالعا بەرىلەتىن تۇرعىن ءۇي باعدارلاماسى اياسىندا جاڭا پاتەرلەردىڭ كىلتىن جيىرماعا جۋىق وڭتۇستىكقازاقستاندىق ازاماتقا تابىس ەتتى. سالتاناتتى شاراعا وڭتۇستىك قازاقستان وبلىسى اكىمىنىڭ ءبىرىنشى ورىنباسارى بەرىك وسپانوۆ، «بايتەرەك» ۇ ب ح» باسقارما ءتوراعاسىنىڭ ورىنباسارى الينا الدامبەرگەن، «قازاقستان يپوتەكالىق كومپانياسى» ي ۇ» ا ق باسقارما ءتوراعاسى ازامات يبادۋللايەۆ جانە قالا تۇرعىندارى مەن باق وكىلدەرى قاتىستى.

تۇرعىن ءۇي كەزەگىندە تۇرعان ازاماتتار اۋدانى 32 دەن 69 عا دەيىنگى شارشى مەترلىك «تازا» ارلەنگەن 1, 2, 3 بولمەلى پاتەرلەردىڭ كىلتىن الدى. 20 جىل مەرزىمگە ساتىپ الۋ قۇقىعىمەن جالعا بەرىلگەن باسپانالاردىڭ اي سايىنعى تولەمى ورتا ەسەپپەن 1 بولمەلى پاتەرگە - 21 مىڭ، 2 بولمەلى پاتەرگە - 35 مىڭ، 3 بولمەلى پاتەرگە - 46 مىڭ تەڭگەنى قۇرايدى.

بيىل وڭتۇستىك قازاقستان وبلىسىندا بارلىق باعىتتار بويىنشا 405,5 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان. بۇگىندە وڭىردە قۇرىلىسى ءجۇرىپ جاتقان 69 تۇرعىن ءۇيدىڭ 12 سى (984 پاتەر) رەسپۋبليكالىق، 57 سى (2377 پاتەر) وبلىستىق بيۋدجەت ەسەبىنەن سالىنۋدا.

جالپى، جىل سوڭىنا دەيىن وڭىردە 43 ءۇيدىڭ قۇرىلىسى اياقتالادى، ال 26 ءۇيدىڭ قۇرىلىسى 2016 -جىلعا وتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى