قىتايداعى الەمدىك دودادا قازاق قىزدارى ءۇندىستان قۇراماسىن ۇتتى

ۇلتتىق كوماندامىزدىڭ باپكەرلەرى پاۆەل كوتسۋر مەن سەرىكباي تەمىربايەۆ اسپاناستى ەلىندەگى باسەكەدە گۇلىسحان ناقبايەۆا، دينارا ءسادۋاقاسوۆا، جانسايا ابدىمالىك، گۇلميرا داۋلەتوۆا جانە ءمادينا داۋلەتبايەۆا سىندى مىقتىلارعا سەنىم ارتتى.

ەسىمدەرى اتالعانداردىڭ بارلىعى دا ءتۇرلى حالىقارالىق دودالاردا جۇلدە الىپ جۇرگەن ەلىمىزدىڭ بەتكەۇستار شاحماتشىلارى. الەمدىك دودانىڭ تۇساۋكەسەر كەزدەسۋىندە ءبىزدىڭ قىزدار ءۇندىستان قۇراماسىن ۇتىپ، ءوز جانكۇيەرلەرىن ءبىر قۋانتىپ تاستادى.

شاحماتتان كوماندالىق الەم چەمپيوناتى 1985-جىلدان بەرى ۇزدىكسىز ۇيىمداستىرىلىپ كەلەدى. اۋەلى ول ەرلەر اراسىندا وتكىزىلسە، كوپ ۇزاماي قىزدار دا شەبەرلىك بايقاسا باستادى. ايەلدەردىڭ الەمدىك دوداسى بۇعان دەيىن ءتورت رەت ۇيىمداستىرىلدى.

2007-جىلى رەسەيدىڭ ەكاتەرينبۋرگ جانە 2009- جىلى قىتايدىڭ نينبو قالالارىندا جالاۋى جەلبىرەگەن جارىستا باس جۇلدە اسپاناستى ەلىنىڭ ارۋلارىنا بۇيىرسا، كۇمىس پەن قولا مەدالدى رەسەي مەن ۋكراينا ولجالادى. 2011-جىلى تۇركيادا قايتا قىتاي توپ جارسا، رەسەي مەن گرۋزيا ەكىنشى جانە ءۇشىنشى تۇعىرعا كوتەرىلدى.

2013-جىلعى دۇنيە جۇزىلىك دودا استانادا وتكەن بولاتىن. بۇل باسەكەدە ۋكراينادان كەلگەن قىزدار قارسىلاس شىداتپادى. جەڭىمپاز كوماندانىڭ ساپىندا ەكاتەرينا لاگنو، اننا ۋشەنينا، ماريا مۋزىچۋك، ناتاليا جۋكوۆا جانە يننا يانوۆسكايا ونەر كورسەتتى. قىتايلار ەكىنشى ورىن السا، ورىستار ءۇشىنشى ساتىعا تابان تىرەدى.

استاناداعى جارىستا قازاقستان قۇراماسى دا باق سىناپ، جەتىنشى ورىنعا جايعاسقان بولاتىن. بۇل كۇندەرى اسپاناستى ەلىندە ونەر كورسەتىپ جاتقان قانداستارىمىزدىڭ بارلىعى دا وسىدان ەكى جىل بۇرىنعى الەم چەمپيوناتىنا قاتىستى.

ايتۋلى باسەكە 29- ساۋىرگە دەيىن سوزىلادى. وعان تەك الەمنىڭ ەڭ ۇزدىك 10 كومانداسى عانا قاتىسادى. بىلتىرعى شاحماتشىلاردىڭ دۇنيە جۇزىلىك وليمپياداسىندا قازاقستاننىڭ ايەلدەر قۇراماسى 127 كوماندانىڭ اراسىندا التىنشى ورىندى يەلەنىپ، ايدى اسپانعا شىعارعان بولاتىن.

عالىم سۇلەيمەن

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى