ا. ءمامين ق ح ر دەلەگاتسياسىمەن «چۇڭشيڭ- دۋيسبۋرگ» تەمىر جول باعدارىن ءارى قاراي دامىتۋ ماسەلەسىن تالقىلادى
كەزدەسۋ بارىسىندا قازاقستان اۋماعى ارقىلى وتەتىن « چۇڭشيڭ - دۋيسبۋرگ» تەمىر جول باعدارىن ءارى قاراي دامىتۋ ماسەلەسى تالقىعا سالىندى.
تاراپتار قازاقستان اۋماعى بويىنشا ترانزيتتەلەتىن، قىتايدىڭ ىشكى اۋداندارىن ەۋروپا ەلدەرىمەن بايلانىستىراتىن اتالعان حالىقارالىق ءدالىز اياسىندا تاسىمالداناتىن جۇك كولەمىن كوبەيتۋگە مۇددەلىلىگىن ءبىلدىردى.
بارشاعا ءمالىم، 2011 - جىلدان باستاپ « چۇڭشيڭ - دوستىق- دۋيسبۋرگ» باعدارىندا تۇراقتى كونتەينەرلىك پويىزدار قوزعالىسى ۇيىمداستىرىلۋدا. وتكەن جىلى بۇل تەمىر جولمەن قىتايدان گەرمانياعا 91 كونتەينەرلىك پويىز، كەرى باعىتتا 19 قۇرام ءجۇرىپ ءوتىپ، 2013 - جىلعا قاراعاندا ەكى جارىم ەسەگە كوپ كورسەتكىشكە قول جەتكىزىلدى. سونداي- اق بىلتىر كونتەينەرلەردەگى پوشتا جۇكتەرىن پيلوتتىق جونەلتۋ تابىستى قامتاماسىز ەتىلدى.
« چۇڭشيڭ - دۋيسبۋرگ» حالىقارالىق باعدارىنىڭ جۇمىس ىستەۋى ەۋرازيالىق ەكونوميكالىق ىنتىماقتاستىق پەن ساۋدا بايلانىستارىنىڭ بەلسەندىلىگىن ارتتىرۋعا سەپتىگىن تيگىزۋدە. 2015 - جىلى چۇڭشيڭنەن دۋيسبۋرگكە باراتىن كونتەينەرلىك پويىزدار سانىن قوس باعدارعا 91 دەن 250 گە دەيىن كوبەيتۋ جوسپارلانۋدا. وسىنىڭ ارقاسىندا رەفريجەراتورلىق پويىزدار قولدانىلاتىن سەرۆيس ءتۇرى جىل بويى قىزمەت كورسەتپەك.
وتكەن جىلعى تولىمدى ناتيجەلەر پارسى شىعاناعى ەلدەرى مەن تۇركيا نارىعىندا ءونىمدى وتكىزۋ ءۇشىن قاجەت كولىك باعىتتارىن يگەرۋ ستراتەگياسىن جاساۋعا ىقپال ەتتى.
ىسكەرلىك كەلىسسوزدەر جەمىسى رەتىندە «ق ت ج» ۇ ك» ا ق پرەزيدەنتى اسقار ءمامين مەن چۇڭشيڭ قالاسىنىڭ ۆيتسە- مەرى چەن حەپين ءارى قارايعى ىنتىماقتاستىق جايلى حاتتاماعا قول قويدى.
قۇجاتقا سايكەس، ق ت ج ەنشىلەس ۇيىمى - «KTZ Exspress» ا ق مەن «Minsheng Logistics Co., Ltd» قىتايلىق كومپانياسى اراسىندا ۇلى جىبەك جولىنا قوسىمشا جۇك اعىندارىن تارتۋ ماقساتىندا بىرلەسكەن كاسىپورىن قۇرۋ شەشىمى قابىلداندى. « چۇڭشيڭ - دۋيسبۋرگ» باعدارى بويىنشا كونتەينەرلىك پويىز قۇرامىندا پوشتا جۇكتەرى تاسىمالىن دامىتۋ جانە « چۇڭشيڭ - قازاقستان- تۇركيا» باعدارى بويىنشا العاشقى پيلوتتىق پويىزداردى ۇيىمداستىرۋ جونىندە ناقتى شارالار بەلگىلەندى.
