ەلوردا مەشىتىنەن سۋ اپاتىنان زارداپ شەككەن قاراعاندىلىقتارعا «قايىرىمدىلىق كەرۋەنى» اتتاندى
ءۇش ءىرى جۇك كولىگىنە ازىق-تۇلىك، تۇرمىستىق كەرەك-جاراقتارى تيەلىپ، اپاتتان اۋىر سىناققا ۇشىراعان اعايىندارعا بەت تۇزەگەن كوشتى ەلوردا يمامدارى ۇيىمداستىرىپ وتىر، دەپ حابارلانعان «نۇر استانا» مەشىتىنىڭ سايتىندا.
«قايىرىمدىلىق كەرۋەنى» يگى شاراسىن ق م د ب- نىڭ استاناداعى وكىلدىگى «نۇر استانا» ورتالىق مەشىتى وتكەن جۇما قارساڭىندا قولعا الىپ، استانا تۇرعىندارىن اسارعا شاقىرعان بولاتىن. ق م د ب- نىڭ وكىل يمامى ناۋرىزباي قاجى قايىرىمدىلىق قازاققا ءتان قاسيەت ەكەنىن ايتىپ، اعايىن-جۇرتتىڭ كوڭىلىن سۇراپ، جاعدايىنا قارايلاسۋ مۇسىلماننىڭ مىندەتى دەپ بىلەتىندىگىن جەتكىزدى.
«3 كولىككە حالىققا ەڭ قاجەتتى تۇرمىستىق زاتتارىن، ازىق-تۇلىكتەرىن تيەپ، اپارا جاتىرمىز. وسى ىسكە ۇلەس قوسقان بارشا استانا تۇرعىندارىنا مىڭ العىس. بۇل ءبىزدىڭ شىن باۋىر، جاناشىرلىعىمىزدىڭ ايقىن بەلگىسى. اللا بارشامىزعا رازى بولعاي. جەرىمىزدىڭ تىنىشتىعىن، ەلىمىزدىڭ بەيبىتشىلىگىن ودان ءارى ارتتىرعاي»، - دەدى ناۋرىزباي قاجى.
