عالىمدار: ءتۇنى بويى ۇيىقتاماي ەمتيحانعا دايىندالۋ ەش ناتيجە بەرمەيدى
زەرتتەۋلەر بارىسى اقپاراتتى ۇمىتپاي، ۇزاق ەستە ساقتاۋ ۇردىسىندە ۇيقىنىڭ ماڭىزدى زور ەكەنىن كورسەتتى، دەپ حابارلايدى University Herald.
ماماندار Drosophila شىركەيىنە زەرتتەۋ جۇرگىزدى. ولار شىبىنداردا ەستە ساقتاۋ قابىلەتىنە قىزمەت ەتەتىن DPM- نەيروندارىن زەردەلەدى. زەرتتەۋ بارىسىندا DPM- نەيرونى بەلسەندى بولعان كەزدە شىبىندار ۇيىقتاعان، ال نەيروندار قىزمەتى توقتاعاندا، كەرىسىنشە شىبىندار سەرگەك ۇشىپ جۇرگەن. اقپارات قىسقا ۋاقىت ەستە ساقتاۋدان ۇزاق ۋاقىت ەستە ساقتاۋعا كوشە باستاعاندا، شىبىندار ۇيقىعا كەتكەن. ياعني، ۇيقىسىز اقپارات يگەرىلمەگەن.
اتالمىش ءۇردىس گيپپوكامپقا ۇقساس ميدىڭ ساڭىراۋقۇلاق تارىزدەس بولىگىندە ورىن العان. شىبىنداردا ەستە ساقتاۋعا جاۋاپ بەرەتىن ساڭىراۋقۇلاق تارىزدەس بولىك ۇيقى مەن سەرگەكتىك ۇردىستەرىن رەتتەيدى ەكەن. زەرتتەۋشىلەر وزدەرىنىڭ تۇجىرىمدارى ادامداردىڭ ۇيقىسى مەن ەستە ساقتاۋ قابىلەتى اراسىنداعى بايلانىستى كوبىرەك بىلۋگە جاردەمدەسەدى دەپ ۇمىتتەنەدى.
