ديزەل وتىنى رەسەيدەن تاسىمالدانبايدى
ەلىمىزدە جانارماي بولشەك ساۋداسىنىڭ باعامى كۇرت ءوسىپ، ءبىر جاعىنان تاپشىلىق ماسەلەسى دە قاتتى سەزىلگەن.
ءتىپتى كەيبىر جانار-جاعارماي ساتاتىن بەكەتتەر بەنزيندى تالونمەن بەرۋگە ءازىر بولدى. ەل ايعايعا باستى، شۋلادى، دۇرلىكتى.
ناتيجەسى جەمىسىن بەرىپ، جاڭا جىل قارساڭىندا بەنزين باعامى كۇرت تومەندەدى. راسى كەرەك، ەلىمىزدە ءۇش مۇناي وڭدەۋ زاۋىتىنىڭ بار ەكەنىن ەسكەرە وتىرساق، ىشكى نارىقتاعى جانار-جاعارماي ۇلەسىن سۇرانىسقا قاناعاتتاندىرا الماي وتىرعانىمىز ۇياتتى جاعداي. ءتىپتى جوعارى سورتتى بەنزيننىڭ 50 پايىزى رەسەيدەن تاسىمالداندى.
ماماندار «رەسەيدە بەنزين باعاسى جوعارى، ول بىزگە ءوز ىشكى نارىعىنداعى باعا كورسەتكىشىمەن ەكسپورتتايدى»، - دەگەن بولاتىن. وسىدان كەيىن ۇكىمەت قازاقستانداعى ءۇش بىردەي مۇناي وڭدەۋ زاۋىتتارىن جاڭارتىپ، 2017 -جىلعا تامان تۇبەگەيلى ماسەلەنى شەشۋدى نىقتاپ تاپسىرعان.
سودان بەرى ەلىمىزدە رەسەي نارىعىنان بەنزين الۋ شەكتەلىپ، باعا تۇراقتى بولىپ كەلەدى. ەندى مىنە، ۇكىمەت رەسەيدەن سولياركا تاسىمالداۋدى دا ۋاقىتشا توقتاتتى.
تىيىم رەسەيدەن تەمىرجول ارقىلى توننالاپ كەلەتىن ديزەل وتىنىنا قاتىستى. ەنەرگەتيكا مينيسترلىگىنىڭ شەكتەۋى مامىر ايىنىڭ سوڭىنا دەيىن جالعاسپاق. ۇكىمەت تاراپى بولسا بۇل جاعدايدى قويماعا سىيماي جاتقان جانارمايدىڭ كوپتىگىمەن ءتۇسىندىردى. مينيسترلىكتىڭ ايتۋىنشا، ەگىس ناۋقانىنا قاجەتتى قور بار، تاپشىلىق بولمايدى جانە باعا دا وسپەيدى دەپ سەندىرۋدە. ماسەلە توڭىرەگى سايلاۋدان كەيىن قۇبىلىپ كەتپەسە بولعانى.
«شىن- اقپارات»
