اقتوبەلىك ايەل كۇيەۋىنە قالاي توقال الىپ بەرگەنىن ايتىپ بەردى
«توقال شىن مانىندە وتباسىن ورتاسىنا تۇسىرەتىن نارسە عوي. ءبىراق مەن جولداسىما توقال الۋعا ءوزىم رۇقسات بەردىم. باسقا امالىم دا بولمادى»، - دەپ جازادى حات اۆتورى.
حات اۆتورىنىڭ ايتۋىنشا، كۇيەۋى ەكەۋى ءبىر-ءبىرىن ءسۇيىپ قوسىلعان. وتاناسى 30 جاسقا كەلگەندە ءۇشىنشى قىزىن اۋىر بوسانىپ، دارىگەرلەر ءومىرىن ازەر ساقتاپ قالادى. وسىدان سوڭ، ول تاعى دا بالا سۇيە الماعان.
«قازاقتا ەر بالا دەپ، دۇنيەگە ۇل كەلۋىن ەرەكشە كۇتەدى عوي. مەنىڭ دە جولداسىمنىڭ جولداستارىمەن جينالعاندا باسقا جولداستارىنىڭ كىشكەنتاي ەر بالالارىن مويىنىنا سالىپ، ءوزى ات بولىپ، ولاردى ارقالاپ، بوكس قولعابىن كيىپ، جۇدىرىقتاسىپ ويناعاندارىن كورىپ، ەت-باۋىرىم ەزىلەتىن.
ءوزى تۋىمىسىنان بالاجان، جۇمساق ادام. قىزدارىن دا قاتتى ەركەلەتەدى. ءبىراق ەر بالاعا دەگەن ىقىلاسىنىڭ ەرەكشە ەكەنىن ءتىپتى بايقايتىنمىن. ءبىر-ەكى رەت ەر بالا اسىراپ الۋ تۋرالى ايتقانىممەن قارسىلىعىن ءبىلدىردى. ءبىراق «ءوز تۇياعىڭ بولعانعا نە جەتسىن» دەگەن ەمەۋرىنىن بايقاپ قالدىم»، - دەپ جازادى اۆتور.
كەيىن ۇلىنىڭ جوقتىعىنا قايعىرىپ، ىشكىلىككە سالىنعانىن كورگەن ول كۇيەۋىنە توقال الۋ تۋرالى ۇسىنىس بىلدىرگەن. وزىنە اۋىر بولسا دا بۇل قادامعا بارعان ونىڭ ۇسىنىسىن كۇيەۋى دە قابىل الادى.
«قانشا جەردەن قيماسام دا ەڭ الدىمەن ءوزىمدى كوندىردىم. ودان كەيىن قىزدارىما جۇقالاپ جەتكىزدىم. كىشى قىزى قانشا ايتقانمەن كەنجەلىكپەن ەركە بولىپ قالعان ءبىراز بۇرتاڭدادى. ودان مەنى ايادى ما قۇشاقتاپ جىلاپ، ءبىراز قينالىپ ءجۇردى. اقىرىندا كوندىكتى.
كوپ ۇزاماي اراعا جولداستارى ءتۇسىپ ءجۇرىپ، مەكتەپتە ءمۇعالىم بولىپ جۇرگەن 33 تەگى تۇرمىسقا شىقپاعان قىزبەن كەلىستىرىپتى دەپ ەستىدىم. مەن دە ول ۇيگە قونباعان كۇنى تۇنىمەن جىلاپ ۇيىقتاماي شىعاتىنمىن. تالاي رەت ءتۇننىڭ ورتاسىندا ۇيقىمنان تۇرىپ الىپ جىلادىم. ەسىمدى جيا الماي ءبىراز ءجۇردىم. ۋاقىت ءبارىن ءوزى ەمدەيدى ەكەن. ەكى جىل بولدى جولداسىم توقالىنان ۇلدى بولدى. قازىر ۇيگە وتە سيرەك كەلەدى»، - دەيدى اۆتور.
ول ايەل رەتىندە ءوزىن تاستاندى سەزىنەتىنىن جازادى.
«قانشا جولداسىمدى كەشىرۋگە، تۇسىنۋگە تىرىسسامدا جەكە باسىنىڭ قىزىعىن ويلاعانى، ءبىر ۇل دەپ ءۇش قىزى مەن مەنى تارك ەتكەنى جانىما باتادى. قارتايىپ تۇرعام جوق ەلۋدەن ەندى استىم. پوشتادا قىزمەت ەتەمىن. ءبىراق كۇيەۋىم كەتكەلى قاتتى قارتايىپ كەتكەنىمدى سەزەمىن. بالكىم مەنىڭ دە ماڭدايىما جازىلعان تاعدىر وسى شىعار»، - دەپ اياقتاعان ول حاتىن.
«الاش ايناسى»
