باتىس قازاقستاندا جالپى قىلمىس دەڭگەيى ءوسىپ كەتىپ وتىر
بۇل تۋرالى وبلىس اكىمى جانىنداعى قۇقىقبۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيا وتىرىسىندا ءمالىم ەتىلدى.
ۋچاسكەلىك پوليتسيا ينسپەكتورلارىنىڭ جۇمىسىنا توقتالعان وبلىستىق ىشكى ىستەر دەپارتامەنتى اكىمشىلىك پوليتسياسى باسقارماسىنىڭ باستىعى ءمۇسىلىم جاردەموۆتىڭ ايتۋىنشا، بۇل ءوسىمدى نەگىزىنەن تومەنگى جانە ورتا دارەجەلى قىلمىستار مەن اكىمشىلىك قۇقىقبۇزۋشىلىق قۇراپ وتىر.
ۋچاسكەلىك ينسپەكتورلاردىڭ قىلمىستاردى اشۋى جىل وتكەن سايىن ءوسىپ كەلەدى. مىسالى، بىلتىرعى كەزەڭدە ۋچاسكەلىك ينسپەكتورلاردىڭ قاتىسۋىمەن 335 قىلمىس اشىلسا، بيىل ول 62,7 پايىزعا كوپ. تالداۋ كورسەتكەنىندەي، بيىلعى ءۇش ايدا قىلمىس جاساعان 1190 ادامنىڭ 980 ى - جۇمىسسىزدار.
بۇل تۇراقتى تابىستىڭ جوقتىعى ادامدى قىلمىسقا يتەرمەلەيتىنىن كورسەتەدى. سونىمەن بىرگە ۋچاسكەلىك پوليتسيا ينسپەكتورلارىنىڭ جۇمىسىندا كەمشىلىك تە جوق ەمەس.
وبلىستا 188 ۋچاسكەلىك پوليتسيا بەكەتى بولۋى ءتيىس. ۋچاسكەلىك پوليتسيا ينسپەكتورلارىندا 95 اۆتوكولىك بولسا، سونىڭ 71 اۋىلدا. اۋىلدىق جەرلەرگە قوسىمشا تاعى دا 83 كولىك كەرەك.
ۋچاسكەلىك ينسپەكتورلار مەن ولاردىڭ كومەكشىلەرىنىڭ ءۇي-جايمەن قامتىلۋى 69,8 پايىزدى قۇرايدى. بۇل باعىتتا ءتيىستى جۇمىستاردىڭ ءجۇرىپ جاتقانىنا قاراماستان، ءالى 60 ۋچاسكەلىك ينسپەكتور (ونىڭ ەلۋى اۋىلدا) مەن 60 كومەكشى پاتەرگە ءزارۋ. ال كومپيۋتەرمەن قامتىلۋ تىپتەن تومەن.
كوپتەگەن اۋىلداعى ۋچاسكەلىك بەكەتتەردە ول اتىمەن جوق. وسى جەردە جانىبەك اۋدانى اكىمدىگىنىڭ ءىس- تاجىريبەسىن وزگەلەرگە ۇلگى ەتۋگە بولادى. اۋدانداعى 9 ۋچاسكەلىك بەكەتتىڭ ءبارى قىزمەتتىك نوۋتبۋكپەن قامتىلعان.
ق ر ءى ءى م بيىلعى جىلدى ۋچاسكەلىك پوليتسيا جىلى دەپ بەلگىلەدى. سوعان وراي جەرگىلىكتى بيلىك قۇرىلىمدارى ۋچاسكەلىك پوليتسيا بەكەتتەرىن ماتەريالدىق- تەحنيكالىق جاعىنان جاراقتاندىرۋعا بارىنشا جاعداي تۋعىزۋى كەرەك-اق.
وتىرىستا سونداي-اق ب ق و ءى ءى د باستىعىنىڭ ورىنباسارى تالعات احايەۆ قۇقىقبۇزۋشىلىقتىڭ الدىن الۋ باعىتىندا اتقارىلىپ جاتقان جۇمىستاردى بايانداپ بەردى.
ماسەلەن، ءى ءى د جەرگىلىكتى اتقارۋشى بيلىك قۇرىلىمدارىمەن بىرلەسىپ، مال ۇرلىعىنىڭ الدىن الۋ باعىتىندا مالعا GPS- ترەككەرلەر ورناتۋ ماسەلەسى بويىنشا جۇمىستانۋدا.
بۇگىنگى تاڭدا وبلىس كولەمىندە وسىنداي 37 قۇرىلعى ورناتىلعان. وتكەن جىلعى 707 مال ۇرلىعىنىڭ 72 پايىزى دالادا، جايىلىمدا جۇرگەندە ورىن الدى. اۋدانداردا مال باعۋ ءىسىن ۇيىمداستىرۋدىڭ تومەن ەكەندىگىن وسىدان-اق كورۋگە بولادى. بۇل، اسىرەسە، اقجايىق، قازتالوۆ، سىرىم، زەلەنوۆ، تەرەكتى، جاڭاقالا اۋداندارىنا قاتىستى.
بۇل ماسەلەگە بايلانىستى ىشكى ىستەر دەپارتامەنتى تاراپىنان اۋدان اكىمدەرىنە بىرنەشە مارتە حات جولدانعانىمەن، ول ءالى دە وڭ شەشىمىن تاپپاي وتىر. سول سەكىلدى ماس كۇيىندە قىلمىس جاساۋشىلىقتىڭ الدىن الۋدا دا كەيبىر مەكەمەلەرمەن ءوزارا ءتيىمدى بايلانىس جوق.
ايتالىق، ناركولوگيالىق ديسپانسەر دارىگەرلىك قۇپيانى العا تارتىپ، پوليتسياعا سوندا ەسەپتە تۇراتىنداردىڭ ءتىزىمىن بەرۋدەن باس تارتۋدا. تۇزەتۋ مەكەمەلەرىنەن جازاسىن وتەپ ورالعانداردى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىمەن بىرلەسە وتىرىپ، جۇمىسقا ورنالاستىرۋ ءىسى جالعاسۋدا.
ماسەلەن، وتكەن جىلى جۇمىسپەن قامتۋ ورتالىقتارىنا ءوتىنىش بىلدىرگەن جازاسىن وتەگەن 147 ادامنىڭ 116 سى ەڭبەك ورنىن تاپتى، 22 سى جاڭا ماماندىق بويىنشا وقۋعا جىبەرىلدى. دەگەنمەن سوتتالىپ كەلگەندەر اراسىندا ماسەلەلەرىن وزدەرى شەشكىسى كەلەتىندەر دە بار.
بۇلاردىڭ ءبىر بولىگى قىلمىستىق جولعا قايتا تۇسەتىنى جاسىرىن ەمەس. بۇرىن سوتتالعاندار اراسىنداعى قىلمىس جاساۋشىلىقتىڭ ۇلەس سالماعى ورال قالاسىندا (19,7 پايىز)، زەلەنوۆ (16,7 پايىز) جانە ءبورلى (14,7 پايىز) اۋداندارىندا جوعارى.
جيىنعا ءتوراعالىق ەتكەن وبلىس اكىمىنىڭ ورىنباسارى باقتيار ماكەن ۆەدومستۆوارالىق كوميسسيا وتىرىستارىنىڭ جەمىسسىز ەمەستىگىن، دەگەنمەن قىلمىستى تومەندەتۋ، الدىن الۋ باعىتىندا ءتيىستى شارالار الۋ باعىتىندا ءالى دە شيراتا تۇسەتىن جايتتاردىڭ بار ەكەنىن اتاپ ءوتتى. اسىرەسە، ۋچاسكەلىك پوليتسيا ينسپەكتورلارىنا جاعداي تۋعىزىپ، جاقسى قىزمەتىمەن كوزگە تۇسكەندەردى كوتەرمەلەپ وتىرۋ قاجەت.
اۆتور: ەلجان ەرالى
