اۋعانستان پرەزيدەنتى قازاقستانعا ساپارلايدى
بۇل تۋرالى ق ر س ءى م باسپا ءسوز قىزمەتى حابرلايدى.
سۇحبات بارىسىندا ەكى ەل سىرتقى ىستەر مينيسترلىگىنىڭ باسشىلىعى اراسىنداعى قابىل قالاسىندا الداعى ساياسي كونسۋلتاتسيالاردىڭ، قازاقستان- اۋعانستان ساۋدا- ەكونوميكالىق ىنتىماقتاستىق جونىندەگى بىرلەسكەن ۇكىمەتارالىق كوميسسياسىنىڭ كەزەكتى 7- وتىرىسىنىڭ جانە اۋعانستان پرەزيدەنتى م. ا. عانيدىڭ ەلىمىزگە ساپارىن ۇيىمداستىرۋ ماسەلەلەرى تالقىلاندى.
س. رابباني مەملەكەتىمىزدى ورتالىق ازياداعى ماڭىزدى ارىپتەسى ءارى دوستاس جانە باۋىرلاس ەل رەتىندە قاراستىراتىنىن ايتتى. قازاقستان دامۋىنىڭ ۇلكەن جەتىستىكتەرىن جانە رەسپۋبليكا باسشىسى ن. نازاربايەۆتىڭ ءرولىن ايرىقشا اتاپ وتىرىپ، س. رابباني مۇقتاجدىق كورىپ وتىرعان اۋعان حالقىنا كورسەتكەن گۋمانيتارلىق كومەگى ءۇشىن ق ر ۇكىمەتىنە ريزاشىلىعىن ءبىلدىردى.
مەملەكەتتىك ءبىلىم باعدارلاماسىنىڭ جالعاستىرىلۋىنا جانە ەلىمىزدە اۋعان ۇلتتىق كادرلارىن دايارلاۋىنىڭ ۇزارتىلۋىنا مۇددەلىگىن ءبىلدىردى. اتالعان باعدارلاما شەڭبەرىندە قازاقستاندىق جوعارى وقۋ ورىندارىندا 2010 - جىلدان باستاپ مىڭعا جۋىق اۋعان ازاماتتارى بەيبىت ماماندىقتارى بويىنشا دايارلانىپ ءجۇر.
اۋعان ءمينيسترى قازاقستانعا العاش رەت 1999 - جىلعى ەكونوميكالىق ىنتىماقتاستىق ۇيىمىنىڭ سامميتىنە قاتىسقان اكەسى اۋعانستاننىڭ بۇرىنعى پرەزيدەنتى، لاڭكەستەر قولىنان قازا تاپقان بۋرحانۋددين راببانيمەن بىرگە كەلگەنىن ايتتى. سول ساپاردا الماتىدان ۇلكەن اسەر العانىن، ال ەندى، كوپكە جاقسى تانىمال قازاقستاننىڭ جاڭا ەلورداسى - استانانى كورگىسى كەلەتىنىن مالىمدەدى.
