الەمگە ايگىلى كومپانيا «اقىلدى ساعاتتارىنىڭ» نارىققا شىعاتىن ناقتى ۋاقىتىن بەلگىلەدى
Apple كومپانياسىنىڭ «اقىلدى ساعاتتارىنا» تاپسىرىستار 10 - ءساۋىر كۇنى سولتۇستىك امەريكالىق ۋاقىت بويىنشا ساعات 12:01 دە الىنا باستايدى.
بۇل تۋرادى كومپانيانىڭ رەسمي حابارلاماسىنا سىلتەمە جاساعان ت ا س س حابارلادى.
سول كۇنى «اقىلدى ساعاتتار» Apple دۇكەندەرىنىڭ سورەلەرىنە شىعارىلىپ، ساتۋشىلار ولارمەن تانىسۋ مۇمكىندىگىن الادى.
ءبىرىنشى ساتىلىم ەكى اپتا وتكەن سوڭ - 24 - ساۋىردە باستالماق. بۇل كۇنى ولار سەگىز ەل: ا ق ش، ۇلى بريتانيا، اۆستراليا، كانادا، قىتاي، فرانسيا، گەرمانيا جانە جاپونيانىڭ ساۋدا جەلىسىنە جەتكىزىلەدى.
«اقىلدى ساعات» نەمەسە Apple Watch تى كومپانيانىڭ باسشىسى تيم كۋك 9 - ناۋرىزدا سان-فرانسيسكودا تانىستىرعان. قازىرگى كەزدە ماماندار تانىمال كومپانيانىڭ بۇل جاڭا ءونىمىنىڭ قانشالىقتى تابىستى بولاتىنىن بولجاپ وتىر.
ساعاتتىڭ اليۋميني كورپۋسى بار بازالىق مودەلىنىڭ باعاسى - 349 دوللار. توت باسپايتىن بولاتتان جاسالعان ساعات 549 دوللار تۇراتىن بولادى. ساتىپ الۋشىلارعا سونداي-اق 18 كاراتتىق التىننان جاسالعان كورپۋسى بار ساعات ۇسىنىلادى. ونىڭ باعاسى 10 مىڭ دوللاردان 17 مىڭ دوللارعا دەيىن بولماق.
Apple Watch كومپانيانىڭ بارلىق سمارتفوندارىندا بار باعدارلامالىق حابارلاندىرۋلارعا يە. ساعات ارقىلى الەۋمەتتىك جەلىگە شىعۋعا، جاڭالىقتاردى وقۋعا، سپورتتىق كورسەتىلىمدەردىڭ قورىتىندىلارىن باقىلاۋعا، سونداي- اق اۋا رايىن بىلۋگە بولادى.
سونداي-اق ساعاتتىڭ كومەگىمەن تەلەفون قوڭىراۋلارىن قابىلداپ، SMS- حابارلامالاردى وقۋعا بولادى. بۇدان باسقا، قۇرال پايدالانۋشىسىنىڭ فيزيكالىق بەلسەندىلىگىن قاداعالاپ، جەكە جاتتىقتىرۋشىنىڭ ءرولىن دە اتقارا الادى. ساعات 18 ساعاتقا دەيىن قۋات كوزىنسىز جۇمىس ىستەي الادى.
