مينيستر ۇلتتىق كيىم كۇنى تۋرالى يدەياعا قولداۋ ءبىلدىردى
وسىعان دەيىن ەرىكتىلەر توبى ۇلتتىق كيىم كۇنىن جىلدىڭ جىلى مەرزىمىندە تويلاۋدى ۇسىنعان بولاتىن.
مينيستر ارىستانبەك مۇحامەدي ۇلى قازاقتىڭ ۇلتتىق كيىمى كۇنىن عانا ەمەس، ەلدە تۇرىپ جاتقان بارلىق ۇلتتىڭ كيىمى كۇنىن ەنگىزۋدى ۇسىندى. مينيسترلىك باسشىسىنىڭ پىكىرىنشە، ءبىرىنشى كەزەكتە ناۋرىز مەيرامىن بۇدان دا كەڭ كولەمدە تويلاپ، ونى بالالارعا ارناۋ كەرەك.
ال ۇلتتىق كيىمگە كەلسەك، مۇحامەدي ۇلى ۇلتتىق كيىمدى ناۋرىز مەيرامىن تويلاۋ كۇندەرى كيۋ كەرەك دەپ ەسەپتەيدى. ونىڭ ايتۋىنشا، ادامدارعا ۇلتتىق كيىمدى كۇشتەپ كيگىزبەۋ كەرەك، ياعني پرەزيدەنتتىڭ جارلىعى ارقىلى نەمەسە ۇكىمەتتىڭ قاۋلىسى ارقىلى كۇشتەپ كيگىزۋ دۇرىس ەمەس.
«بىزدە ناۋرىز مەيرامىن تويلاۋ بويىنشا كونسەپسيا جاسالدى. ادامدار كيىز ۇيگە بارىپ، تاماق ءىشىپ قانا قويماۋ كەرەك (...) ءبىرىنشى كەزەكتە، بۇل مەيرام بالالارعا ارنالۋى ءتيىس. ءبىز جاڭا جىلدا نە ىستەيمىز؟ ءبارىمىز بالالارعا سىيلىق اپەرەمىز، شىرشا ارلەيمىز (...) مەنىڭشە، ناۋرىزدى بالالاردىڭ مەيرامى ەتپەسەك، ونى ساقتاپ قالۋ قيىن. ۇلتتىق كيىمدى كيۋگە ۇيالاتىنداي جاعدايعا جەتتىك»، - دەيدى مينيستر.
- ناۋرىز كۇنى ءاربىر قازاقستاندىق كوشەگە ۇلتتىق كيىممەن شىقسا. مىندەتتى تۇردە ساۋكەلە مەن ۇلكەن شاپان كيۋ ەمەس، ءجاي عانا ەلەمەنتتەرىمەن كيسە (...). قازاقتار ءوز كيىمىمەن، ورىستار ءوز كيىمدەرىمەن، قالعان حالىقتار دا ءوز ۇلتتىق كيىمدەرىن كيسە. بۇل ارقىلى مەيرامعا ءسان بەرەمىز. بۇل كۇن كۇنتىزبەدە پرەزيدەنتتىڭ جارلىعىمەن نەمەسە ۇكىمەتتىڭ قاۋلىسىمەن پايدا بولماۋى كەرەك، قوعامدىق باستاما بولۋى كەرەك»، - دەدى ول.
ەسكە سالايىق، قازاقستاندا ۇلتتىق كيىم كۇنىن بەلگىلەۋدى تاريحشى، جازۋشى، ۇلى دالا مادەنيەتىنىڭ ناسيحاتتاۋشىسى ارمان نۇرمۇحانبەتوۆ ۇسىنعان ەدى. نۇرمۇحانبەتوۆ بۇل كۇنى قازاقتىڭ ءداستۇرلى كيىمىن نەمەسە ونىڭ زاماناۋي ۇلگىلەرىن كيۋدى ۇسىنىپ وتىر.
ەرىكتىلەر مۇنىڭ وتە ادەمى بولاتىنىنا جانە پاتريوتتىق سەزىمدى وياتاتىنىنا سەنىمدى. سونىمەن قاتار، يدەيا اۆتورى بۇل باستامانىڭ وتاندىق جەڭىل ونەركاسىپ پەن ءتۋريزمنىڭ دامۋىنا ۇلەس قوساتىنىن ايتادى. نۇرمۇحانبەتوۆتىڭ ايتۋىنشا، قازاقتىڭ ۇلتتىق كيىمى كۇنىن جۇمىس كۇنىنە بەلگىلەۋ كەرەك - ماسەلەن، ساۋىرگە، مامىرعا نەمەسە قىركۇيەككە.
