قازاق- وزبەك شەكاراسىن زاڭسىز بۇزىپ وتپەك بولعاندار ۇستالدى

بۇل تۋرالى ق ر ۇ ق ك  ش ق- ءنىڭ باسپا ءسوز قىزمەتىنەن حابارلايدى.

«قاقپاق» زاستاۆاسىنىڭ كەلىسىمشارت قىزمەتىنىڭ قاتارداعى جاۋىنگەرلەر جاساعى ۋ. جۇماحوۆ پەن ن. ابدىراشيەۆ مەملەكەتتىك شەكارانىڭ قازاق- وزبەك ۋچاسكەسىن كۇزەتىپ تۇرعان ەدى.

اينالانى قاراپ جۇرگەن شەكاراشىلار ىرگەلەس اۋماقتا جۇرگەن بەلگىسىز ەكى ادامدى كورىپ، ولاردى باقىلاۋعا العان. بۇل ادامداردىڭ شەكارادان زاڭسىز ءوتۋ ءۇشىن قولايلى ورىن ىزدەپ جۇرگەندەرى تۇسىنىكتى بولدى.

قولايلى ءساتتى تاڭداعان قاسكۇنەمدەر شەكاراعا قاراي ءجۇردى. جاساق راديوستانسادان بولىپ جاتقان جاعداي تۋرالى بىردەن زاستاۆاعا حابارلاعان. بىرنەشە مينۋتتىڭ ىشىندە بولىمشە كوماندا بويىنشا كوتەرىلگەن. «دابىل توبىن» زاستاۆانىڭ باستىعى، كاپيتان ت. جاقىپوۆ باسقاردى.

وزدەرىنە جاقىنداپ كەلە جاتقان شەكارالىق «ۋاز» كولىگىن كورگەن شەكارا بۇزۋشىلار قاشا جونەلەدى. شەكاراشىلار بىرەۋىن بىردەن ۇستادى. وزىمەن بىرگە پىشاعى بولعان ەكىنشىسى قارسىلىق تانىتتى. قول جەكپە- جەگى ادىستەرىن قولدانعان اعا سەرجانت ن. ايداروۆ ونى قارۋسىزداندىردى.

ۇستالعان قازاقستاننىڭ 30 جاستاعى ازاماتى مەن وزبەكستاننىڭ 35 جاستاعى ازاماتى اعايىندىلار بولىپ شىقتى. تەكسەرۋ بارىسىندا ۇستالعاندار وزبەكستاندا قارۋدى ۇرلاۋ جانە زاڭسىز ساقتاعانى ءۇشىن سوتتالعاندارى انىقتالعان.

ولارعا قاتىستى «قازاقستان رەسپۋبليكاسىنىڭ مەملەكەتتىك شەكاراسىن زاڭسىز قاساقانا بۇزۋ» جانە «قىزمەتىن اتقارعان بيلىك وكىلىنە قارسىلىق تانىتۋ» باپتارى بويىنشا قىلمىستىق ءىس قوزعالدى.

 جاساق قۇرامى قىزمەتىن قىراعىلىقپەن جۇرگىزگەنى ءۇشىن ماراپاتقا ۇسىنىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى