مەملەكەتتىك قىزمەتكە تۇسەردە ماگيستراتۋرا مەن شەتەلدىك ديپلوم تالاپ ەتىلمەك
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى جەمقورلىق تاۋەكەلدەرىن تالداۋ جانە انىقتاۋ باسقارماسىنىڭ باسشىسى دينارا جانەنوۆا ءمالىم ەتتى.
ونىڭ ايتۋىنشا، مەم قىزمەتكە تۇسەر الدىندا ۇمىتكەرلەرگە ءبىرقاتار جوعارى تالاپتار قويىلاتىن بولادى.
«تاعى ءبىر ايتا كەتەرلىك جايت، تالاپتار قاتارىنا ماگيستراتۋرا، سونىڭ ىشىندە شەتەلدىك ماگيستراتۋرا دەڭگەيى ەنگىزىلمەك. نەمەسە، ۇمىتكەردىڭ ءبىلىمى تولىقتاي شەتەلدىك ءبىلىم بولۋى كەرەك دەگەن تالاپ تا بولادى. بۇنىڭ سەبەبى، قازىر مەملەكەتتىك قىزمەتكەرلەر شەتەلدىك ارىپتەستەرىمەن، شەتەلدىك مەملەكەتتىك ورگاندارمەن كوپ جۇمىس ىستەيدى. سوندىقتان، ءار ءتۇرلى كەلىسسوزدەر بارىسىندا، قانداي دا ءبىر شەشىم قابىلداناردا، ۇكىمەتتىك قۇجاتتاردى دايىنداعاندا ءبىزدىڭ مەملەكەتتىك قىزمەتكەرلەردىڭ ءبىلىمى باسەكەگە قابىلەتتى بولۋ كەرەك. سوندىقتان، ءبىز لاۋازىمداردىڭ جەكەلەگەن تۇرلەرى ءۇشىن تالاپتى كۇشەيتپەكپىز»، - دەپ اتاپ ءوتتى د. جانەنوۆا.
مەملەكەتتىك قىزمەتكە تۇسەردە ۇمىتكەردىڭ جەكە قاسيەتتەرى دە ەسكەرىلەتىن بولادى.
ونىڭ ايتۋىنشا، كوپ ۇزاماي مەملەكەتتىك قىزمەتكە تۇسۋگە نيەت تانىتقان ۇمىتكەرلەرگە قويىلاتىن بىلىكتىلىك تالاپتارىن كۇشەيتىلمەك.
«قازىرگى ۋاقىتتا ونىڭ جۇمىس ءوتىلى مەن جوعارى ءبىلىمنىڭ بولۋى تالاپ ەتىلەدى. ءبىراق مەملەكەتتىك قىزمەتتە جۇمىس ءتۇرى ءار ءتۇرلى كەلەدى. ءبىر جۇمىس اناليتيكالىق، ياعني بايىپتىلىقتى، ءبىر ورىندا وتىرۋدى، قۇجاتتارمەن جۇمىس ىستەۋدى تالاپ ەتسە، ەكىنشى ءبىرى ۇيىمداستىرۋشىلىق قاسيەتتەردى قاجەت ەتەدى. ءۇشىنشىسى حالىقپەن جۇمىس ىستەۋدى، ولارعا كەڭەستەر بەرۋگە نەگىزدەلەدى. سوعان بايلانىستى قىزمەتكەرلەردەن ءتۇرلى ماشىقتار، ەپتىلىك پەن يكەمدەر قاجەت بولادى. سوندىقتان ءبىز مەملەكەتتىك قىزمەتتەگى بارلىق لاۋازىمدارعا فۋنكتسيونالدىق شولۋ جاساۋدامىز. سوعان قاراپ، مەملەكەتتىك قىزمەتكەلەردىڭ قۇزىرىنىڭ پروفيلىن جاساۋدامىز. ياعني مەم قىزمەتكە قاجەتتى ماشىق، يكەم مەن قاسيەتتەردىڭ ءتىزىمى جاسالادى. سوعان وراي، ءبىز مەملەكەتتىك قىزمەتكە تۇسەردە وسى تالاپتاردى بىلىكتىلىك تالاپتارىنا ەنگىزەتىن بولامىز»، - دەدى ول.
اۆتور: جاسۇلان جولدىبايەۆ
