بيىل جازدا استانا مەن سەۋل اراسىندا جاڭا اۋە باعدارى اشىلادى

جاڭا باعىتتار «نۇرلى جول» باعدارلاماسىنا (كولىكتىك لوگيستيكانىڭ ساۋلەلىك ءپرينتسيپى) سايكەس ەلىمىزدىڭ كولىكتىك-لوگيستيكالىق جۇيەنى جەتىلدىرۋ اياسىندا اشىلۋدا.

اتاپ ايتقاندا، قازىرگى كەزدە ەكى باعىت اشىلىپ ۇلگەرىلدى. 29- ناۋرىزدا «ەير استانا» اۆياكومپانياسى «بوينگ-757» اۋە كەمەسىمەن استانا -پاريج باعىتىندا ءوزىنىڭ العاشقى تىكەلەي رەيسىن اتقاردى. استانادان پاريجگە بەتتەگەن رەيستە 71 ادام، ال پاريجدەن استاناعا دەيىنگى رەيستە 54 ادام بولدى. رەيستەر اپتاسىنا ءۇش رەت (سارسەنبى، جۇما جانە جەكسەنبى) ىسكە اسىرىلاتىن بولادى. ۇشۋ ۋاقىتى 7 ساعاتقا سوزىلادى.

وتكەن جىلعى قازان ايىندا قازاقستان جانە فرانسيانىڭ اۆياتسيا سالاسىنىڭ بيلىك باسىنداعىلار كەلىسسوزدەر جۇرگىزگەن بولاتىن. تاراپتار قازاقستاندىق تاسىمالداۋشىلاردىڭ تۇراقتى رەيستەر اتقارۋى جونىندەگى ءوزارا تۇسىنىستىك تۋرالى مەموراندۋمعا قول قويدى.

مۇنىمەن قوسا، 29- قازاندا «ەير استانا» اۆياكومپانياسى كۇن سايىنعى استانا - ورال - استانا اۆيامارشرۋتىن اشتى. رەيستەر «ەيرباس-320» جانە «ەمبراەر-190» ءتيپتى اۋە كەمەلەرىمەن اتقارىلادى.

«سونىمەن قاتار، بيىلعى جىلعى جازدا استانادان سەۋلگە جانە تبيليسيگە جاڭادان حالىقارالىق باعىتتار اشۋ جوسپارلانۋدا. وسى باعىتتاردا دا تاسىمالداۋشى رەتىندە «ەير استانا» اۋە كومپانياسى بولادى»، - دەلىنگەن مينيسترلىك مالىمەتىندە.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى