قازاقستاندا ۇلتتىق كيىم مەرەكەسىن اتاپ ءوتۋدى ۇسىندى
اۆتوردىڭ ويىنشا، تۇرعىندار سول كۇنى جاپپاي قازاقتىڭ ۇلتتىق كيىمىن كيۋ كەرەك. بۇل مەكەرەكەنى تويلاساق، جەڭىل ونەركاسىپ پەن تۋريزم قارىشتاپ داميدى دەپ سەنەدى.
كەشەدەن بەرى الەۋمەتتىك جەلىلەردە ارمان نۇرماعامبەتوۆتىڭ اتاعى جەر جاردى. ونىڭ يدەياسىن قولداۋشىلار تولاستاماي تۇر. عالامتوردا باستامانىڭ بەلسەندى تالقىلانۋىنا اۆتوردىڭ ءوزى دە اڭ-تاڭ.
«نەگە ءبىز ەۋروپالىق كيىمدى كيىپ جۇرەمىز؟ ءوزىمىزدىڭ ءسانىمىزدى باعالامايمىز. ءبىر كۇن بولسا دا جىلدا ۇلتتىق كيىم بۇكىل ەل كيىپ شىقسا پايدا كوپ. ءبىر جاعىنان ادەمى بولىپ شىعادى. ەلەستەتىڭىزشى قالالار، اۋىلداردا ۇلتتىق كيىم كيىپ شىعادى»، - دەيدى يدەيا اۆتورى ارمان نۇرماعانبەتوۆ.
تاريحشى اتاۋلى كۇن قازاقتىڭ بەشپەنت، قامزول، شاپانىن كيەتىن كۇننىڭ كەنجەلەپ قالعان وتاندىق جەڭىل ونەركاسىپ، تۋريزم سالاسىنا دا سەرپىلىس بەرەتىنىنە سەنىمدى. ول مەرەكەنى ءساۋىردىڭ سوڭى نەمەسە قىركۇيەكتە وتكىزۋ تۋرالى ۇسىنىس ءبىلدىرىپ وتىر.
ۇلتتىق كيىمدى جۇمىسقا كيىپ كەلۋگە، سانگە اينالدىرۋعا ەشكىم قارسى ەمەس. قۇندىلىقتارىمىزدى جاڭعىرتۋعا جاستار دا ءازىر. الايدا بۇل باستاما بولاشاقتا ۇردىسكە اينالا ما جانە باعاسى قولجەتىمدى بولادى ما؟ ول جاعى ۋاقىت ەنشىسىندە، دەپ جازادى tv7.kz.
