قازاقستان رەسەيمەن تەڭ ءتۇستى

ماتچتىڭ ءبىرىنشى تايمىندا تابلوداعى ەسەپ وزگەرگەن جوق. قازاقستان قۇراماسى قورعانىس پەن شابۋىلدى قاتار الىپ جۇرۋگە تىرىستى. قوس كوماندا ءبىرىنشى تايمداعى جاساعان قاۋىپتى سوققىلارىنىڭ سانى - 6:3 بولدى.

رەسەي قۇراماسى ءبىرىنشى تايم ورتاسىندا قازاقستان قاقپاسىنا ءبىر مارتە قاۋىپ توندىرگەنىمەن ستاس پوكاتيلوۆ ويىندى قۇتقارىپ قالدى.

ەكىنشى تايمدى قازاقستان وتە بەلسەندى باستادى. باۋىرجان يسلامحان ەكى بىردەي قورعاۋشىنى الداپ ءوتىپ، تەپكەن دوبى باعانادان ءسال بيىك كەتتى. 48 مينۋتتا لودىگين وزىنە ءتيىستى ايماقتان شىعىپ، دوپ ۇستاعانى ءۇشىن تورەشى ايىپ الاڭىنىڭ سىرتىنان ايىپ دوبىن بەلگىلەدى. ءبىراق سامات سىماقوۆ تەپكەن ايىپ دوبى قورعاۋشىلارعا ءتيىپ، كەرى سەرپىلدى.

58 مينۋتتا باۋىرجان يسلامحان رەسەي ايىپ الاڭىنا ەركىن ەنىپ، كوماندالاستارىنا ادەمى پاس شىعارىپ بەرگەن. ءبىراق بۇل مۇمكىندىكتى توقتار جاڭعىلىشباي پايدالانا المادى. 70 مينۋتقا دەيىن الاڭ يەلەرى پوكاتيلوۆ قورعاعان قاقپاعا بىرنەشە مارتە شابۋىل ۇيىمداستىرۋعا تىرىسقانىمەن قورعاۋشىلار ءساتتى قورعانا ءبىلدى. 74 مينۋتتا گەورگي جۋكوۆ تا لودىگين قاقپاسىنا جاقىن ماڭنان سوققى جاساعان. ايتپاقشى، جۋكوۆ ۇلتتىق قۇراما ساپىنداعى العاشقى ويىنىن وتكىزدى.

90 مينۋتقا دەيىن قوس كوماندا ۇتىمدى شابۋىل ۇيىمداستىرعانىمەن قورعانىس سىر بەرگەن جوق. تورەشى قوسقان ءۇش مينۋتتا دا تابلوداعى 0:0 ەسەبى وزگەرمەدى. قازاقستان بيىلعى ماۋسىمداعى ەكىنشى جولداستىق كەزدەسۋىن تەڭ اياقتادى. وسىعان دەيىن كراسنوجان باپتايتىن قۇراما مولدوۆامەن تەڭ تۇسكەن - 1:1.

ماسكەۋدەگى ماتچتقا رەسەيدە تۇراتىن جۇزدەن استام قازاقستاندىق ارنايى كەلىپ تاماشالادى.

2008-جىلى قازاقستان رەسەيمەن جولداستىق ماتچ وتكىزىپ، 0:6 ەسەبىمەن جەڭىلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى