استانا ىرگەسىندەگى قوياندىدان قۋانىشتى حابار جەتتى
بيلىك قوياندىداعى 170 كە جۋىق باسپانانى تراكتورمەن بۇزبايمىز، مەملەكەتتىك اكتىلەرىن جاساپ بەرەمىز دەگەن ۋادەلەرىندە تۇردى.
شەتەلدەن كوشىپ كەلگەن اعايىن، تەلىمدەرىنىڭ قۇجاتتارىن ەندىگى جەردە قالاي رەتتەۋىنە بولادى، اكىمدىك قانداي تاسىلدەر ۇسىنىپ وتىر؟
استانا ىرگەسىندەگى قوياندى اۋىلىنداعى 170 كە جۋىق ءۇيدى شەتتەن كەلگەن اعايىن 2007 - جىلدارى تۇرعىزعان. ياعني، قىتاي مەن موڭعوليادان كوشىپ كەلگەن قانداستارىمىز «جاڭا قادام» قوعامدىق بىرلەستىگى ارقىلى 24 گەكتار تەلىمدى ساتىپ الىپ، زاڭسىز باسپانا سوققان. الايدا، سودان بەرى ءۇنسىز كەلگەن بيلىك وتكەن جىلى جەر داۋى ۋشىققان كەزدە، زاڭسىز ۇيلەر سالىنعان 167 تەلىمدى زاڭداستىرىپ بەرۋگە ۋادە بەرگەن بولاتىن. جەرگىلىكتى اكىمدىك سودان بەرى جەر يەلەرىمەن كەلىسسوزدەر جۇرگىزدى. وسىلايشا 8 جىل بويى قاشان ءۇيىمىز تراكتوردىڭ تابانىندا قالادى دەپ ۇرەيلەنىپ كەلگەن اعايىننىڭ تەلىمدەرىن زاڭداستىرۋ باستالدى. بۇگىن العاشقى 9 تۇرعىن قولىنا مەملەكەتتىك اكتىسىن الىپ، كۇپتى كوڭىلدەرى ورنىنا ءتۇستى.
قۋانىشىمەن ءبولىسىپ تۇرعان بۇل ازاماتتار ۇيلەرى سالىنعان جەردىڭ يەسىمەن كەلىسىم- شارت جاساپ، تەلىمدى نارىقتان ەكى- ءۇش ەسە ارزان باعاعا ساتىپ الىپ جاتىر. ال سەلينوگراد اۋدانى اكىمدىگى، قوجايىندارمەن كەلىسسوز جۇرگىزىپ، ءار تۇرعىننىڭ تەلىمىن قاتاڭ قاداعالاۋىندا ۇستاپ، زاڭگەرلىك كومەك كورسەتۋدە. ياعني، شەندىلەر قوياندى اكىمدىگىنە تۇرعىندارعا كەڭەس بەرەتىن ادۆوكات پەن قۇجاتتاردى بىردەن رەتتەيتىن نوتاريۋس اكەلىپ قويعان.
الما ايتقوجينوۆا، اقمولا وبلىسى، سەلينوگراد اۋدانى اكىمىنىڭ ورىنباسارى:
ءبىز زاڭگەرلىك جاعىنان كومەكتەسىپ جاتىرمىز. ياعني، جەر يەسى تەلىمدى باسقالارعا ەمەس، زاڭسىز سالىنعان ءۇيدىڭ قوجايىنىنا ساتۋىن قاداعالايمىز. ەرتەڭ ءۇي بىرەۋدىڭ اتىندا، جەر باسقا بىرەۋدىڭ اتىندا بولماس ءۇشىن.
ال زاڭسىز باسىپ العان 167 جەردىڭ 78- ءى مەملەكەتكە تيەسىلى. جەرگە موراتوري جاريالانعاندىقتان اكىمدىكتىڭ اعايىنعا كەشىرىم جاساۋعا قۇقى جوق. سوندىقتان، قانداستارىمىزدىڭ ۇيلەرى كۇرەلمەس ءۇشىن، اكىمدىك جەكەمەنشىك فيرمالارمەن كەلىسىم- شارت جاساسىپ، جەر الماستىرماقشى. زاڭسىز ۇيلەر سالىنعان تەلىم كاسىپكەردىڭ قاراماعىنا ءوتىپ، ورنىنا باسقا جەر بەرىلەدى. ال تۇرعىندار ولاردان ارزان باعاعا ساتىپ الۋىنا بولادى. ال جەر ءتالىمىن زاڭداستىرۋدىڭ تاعى ءبىر ءتاسىلى 6 - ساۋىردە وتەتىن اۋكسيون دەيدى شەنەۋنىكتەر.
الما ايتقوجينوۆا، اقمولا وبلىسى، سەلينوگراد اۋدانى اكىمىنىڭ ورىنباسارى:
ەگەر ءۇيدىڭ ىرگەتاسى سالىنعان بولسا، وندا ول جەردى اۋكسيونمەن ساتىپ السا بولادى. ول جەرگە دۇكەن، كەز- كەلگەن عيمارات سالۋىنا رۇقسات. ءبىز بۇل جەڭىلدىكتى، قوياندىداعى بوس جەرلەردى زاڭسىز باسىپ الماس ءۇشىن ىستەپ وتىرمىز.
ال قىزىل سىزىقتا تۇرعان ۇيلەر دە كۇرەلىپ كەتپەس ءۇشىن، اۋىلدىڭ جوسپارى دا سولاردىڭ ىڭعايىنا قاراي وزگەرتىلىپتى. سونداي- اق قوياندىداعى جەرلەردى زاڭداستىرۋ باستالعالى بەرى اۋىلدا اكىمدىك تەگىن تەلىم تاراتىپ جاتىر دەگەن سىبىس تاراپ كەتكەن. الايدا، شەندىلەر مۇنداي قاڭقۋ سوزدەرگە جانە الىستان كەلگەن اعايىننىڭ اراسىنا ىرىتكى سالىپ، نارازىلىق شارالارىن ۇيىمداستىرىپ جۇرگەندەرگە سەنبەۋگە شاقىرادى. جانە 167 ۇيدەن بولەك، جەردى زاڭسىز باسىپ العاندارعا ەشقانداي جەڭىلدىك بولمايتىنىن قاتاڭ ەسكەرتەدى.
گۇلبانۋ ءانيات قىزى، سانات يمانعاليەۆ.
