استانا تۇرعىنى قىس بويى جەيدەمەن جۇرگەن

14 جاسىندا قايىربەك وڭتۇستىك قازاقستاننان استاناعا كوشىپ كەلگەن.

ول 7  جىلدان بەرى ەرەكشە جاتتىعۋمەن دەنساۋلىعىنىڭ مىقتى بولۋى ءۇشىن نەمەسە اۋىرماۋ ءۇشىن ەمەس، قىزىعۋشىلىقتان عانا اينالىسا باستاپتى. اياز كۇندەرى ول جىلى كيىم كيمەيدى، شالبارمەن جانە شولاق جەڭدى جەيدەمەن جۇرەدى. العاشقى جىلداردا ەر ادام جازعى اياق كيىممەن دە جۇرگەن.

«وسى قىس اۋا تەمپەراتۋراسى 40 گرادۋسقا جەتپەگەندىكتەن جانە بىرنەشە عانا 30 گرادۋس ايازبەن كۇرەسكەندىكتەن مەن ءۇشىن جەڭىل بولدى. 30 گرادۋس ايازدا مەن شىداي الامىن. دالادا 30-40 مينۋتتاي توڭباستان جۇرە الامىن، ءتىپتى جەڭىل تۇردە سۋىقتا تيمەيدى، اۋرىتپالىقتى سەزىندىرەتىن جاعدايلار - ساۋساقتاردىڭ ايازدان ءۇسۋى، مۇرىننىڭ توڭۋى بولمايدى. كۇشتى جەل سوققاندا عانا دالادا بولاتىن ۋاقىتتى قىسقارتامىن»، - دەيدى قايىربەك اياشيەۆ.

ول مۇنداي ەكسپەريمەنتتەردەن كەيىن ەشقاشان اۋىرىپ كورمەگەن، ءارقاشان جەڭىل كيىنگەن. بالا كەزىنەن يممۋنيتەتى جاقسى ءارى سۇيەگى مىعىم بولعانىن ايتتى.

قايىربەك اياشيەۆ وزىندە جىلى كيىمدەر بولعانىنا قاراماستان، قىستا ءبارىبىر قالىڭ كيىنبەيتىنىن ايتادى. «40 گرادۋس اياز بولعاندا پيدجاك كيۋىمە تۋرا كەلدى. ال كەيدە ونسىز دا شىدادىم»، - دەيدى ول. سونىمەن قاتار، اياشيەۆ كوشەدە كوپتەگەن ادامداردىڭ نازار اۋداراتىنىن ايتادى.

«مەن بىرەۋلەر توناپ كەتتى دەپ نەمەسە قيىن جاعدايدا  ما دەپ ويلاپ قالادى، رۋحاني نەمەسە ماتەريالدىق جاعىنان قينالعان ادام دەيدى. كەيبىرەۋلەرى كومەك ۇسىنباق بولعان كەزدەردە بولدى. مەنىڭ ماتەريالدىق جاعدايىمنىڭ بارىن جانە جان كۇيزەلىسىمنىڭ جوق ەكەنىن تۇسىنگەن بىرەۋلەر مۇنى پيار(جارناما) دەپ ويلايدى، ماقتانشاق دەسىپ، جاقتىرماي جاتادى. ال تاعى بىرەۋلەر بولسا مەنىڭ شىڭدالىپ جۇرگەنىمدى تۇسىنىپ، بۇل ىسىمە قولداۋ بىلدىرەدى. كوپتەگەن جۇرگىزۋشىلەر جولدان ءوتىپ بارا جاتقانىمدا سيگنال بەرەدى. ال بىرەۋلەر «جارايسىڭ، جالعاستىرا بەر!» دەپ كەتەدى»، - دەيدى قايىربەك.

قايىربەك اياشيەۆ 36 جاستا. ونىڭ ماماندىعى - ەكونوميست، قازىرگى ۋاقىتتا نازاربايەۆ ۋنيۆەرسيتەتىندە عىلىمي قىزمەتكەر. ماكروەكونوميكالىق مودەلدەۋمەن اينالىسادى. سۋىقتاپ شىنىعۋدىڭ الدىندا ول يوگامەن اينالىسىپتى.

«نەگىزىندە، يوگا - ەكسپەريمەنت جاساۋ، ءوز- ءوزىڭدى تابۋ. وزىڭمەن ەكسپەريمەنت جاساۋ، ءوز دەنەڭمەن، ءوز ەموتسياڭمەن. وسى ەكسپەريمەنتتەردىڭ قورىتىندىسىندا ايازبەن جۇمىس ىستەپ كورۋىم كەرەك ەكەنىن ءتۇسىندىم. بىرنەشە جىل وتكەننەن كەيىن يوگادا سونداي باعىتتىڭ بار ەكەنىن جانە تارالىپ جاتقانىن ءبىلدىم»، - دەيدى ول.

سونىمەن قاتار، قايىربەك قىستا سۋعا تۇسەدى. اڭگىمەسىن اياقتاعان ول ايازعا جىلى كيىمسىز شىعىپ، ەكسپەريمەنت جاساماۋ كەرەك ەكەنىن ايتتى. "بۇعان ادامنىڭ بەيىمى بولۋى كەرەك. ماقال دا كەلتىرەيىن: وتكەلدى كورمەي تۇرىپ، سۋعا تۇسپە. استانادا بۇل وتە قاۋىپتى تاجىريبە، بۇل ەكسترەمالدى تاجىريبە، سەبەبى مۇندا اياز قاتتى. ەگەر ادام پروتسەستى سەزبەسە، دەنەسىنىڭ اۋىرعانى مەن سۋىقتاعانىن سەزبەسە، بۇل قاۋىپتى»، - دەدى قايىربەك اياشيەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى