ك. ءماسىموۆ سينگاپۋردىڭ تۇڭعىش پرەمەر-ءمينيسترى لي كۋان يۋدى جەرلەۋ راسىمىنە قاتىستى

كارىم ءماسىموۆ مەملەكەت باسشىسى نۇرسۇلتان نازاربايەۆ پەن قازاقستان حالقى اتىنان سينگاپۋر رەسپۋبليكاسىنىڭ پرەمەر-ءمينيسترى لي سيان لۋنگە - وسى ەلدىڭ لي كۋان يۋدىڭ ۇلىنا كوڭىل ايتتى، دەپ جازادى primeminister.kz.

ەسكە سالا كەتەيىك، ەلباسى وسىعان دەيىن سينگاپۋر پرەمەر-ءمينيسترىنىڭ اتىنا كوڭىل ايتۋ جەدەلحاتىن جولداعان بولاتىن، وندا نۇرسۇلتان نازاربايەۆ سينگاپۋردىڭ الەمدىك بەدەلىن نىعايتىپ، ونىڭ ازياداعى جەتەكشى ەل رەتىندە قالىپتاسۋى ءۇشىن لي كۋان يۋدىڭ وراسان كۇش-جىگەر جۇمساعانىن جانە سول ارقىلى ارتىنا وشپەس مۇرا قالدىرعانىن اتاپ وتكەن.

ەل ۇكىمەتىن 1959-جىلدان 1990-جىلعا دەيىن باسقارعان لي كۋان يۋدى سينگاپۋردىڭ نەگىزىن قالاۋشى- اكەسى دەپ سانايدى.

ەكى مەملەكەتتىڭ اراسىندا بەرىك دوستىق قاتىناستاردى نىعايتۋعا قوسقان زور ۇلەسى ءۇشىن ق ر پرەزيدەنتى لي كۋان يۋدى «دوستىق» وردەنىمەن جانە «قازاقستان رەسپۋبليكاسىنىڭ تاۋەلسىزدىگىنە 20 جىل» مەدالىمەن ماراپاتتاعان بولاتىن.

جەرلەۋ راسىمىنە مالايزيا كورولى ابدۋل حاليم، يندونەزيا پرەزيدەنتى دجوكو ۆيدودو، جاپونيا پرەمەر-ءمينيسترى سيندزو ابە، ءۇندىستان پرەمەر-ءمينيسترى نارەندرا مودي، وڭتۇستىك كورەيا پرەزيدەنتى پاك كىن حە، اۆستراليا پرەمەر-ءمينيسترى توني ەببوتت، كاتار ءامىرى تاميم بين حاماد ءال تاني، ا ق ش- تىڭ ەكس-پرەزيدەنتى بيلل كلينتون، ق ح ر ءتوراعا ورىنباسارى لي يۋانچاو، رەسەي پرەمەر-ءمينيسترىنىڭ ءبىرىنشى ورىنباسارى يگور شۋۆالوۆ جانە باسقالارى قاتىستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى