قازاقستان جەنيەۆادا ادام قۇقىقتارى جونىندەگى ۇلتتىق باياندامانى ءساتتى بەكىتتى
ق ر ادىلەت ءمينيسترىنىڭ ورىنباسارى ەلۆيرا ءازىموۆا باستاعان دەلەگاتسيا كەڭەس مۇشەلەرىنە 2014-جىلعى قازاندا وتكەن شولۋ اياسىندا ۇلتتىق باياندامامىزدى قورعاۋدان بەرگى مەرزىمدەگى قازاقستاننىڭ الەۋمەتتىك-ەكونوميكالىق دامۋى تۋرالى جاڭارتىلعان اقپاراتتى ۇسىندى. ەلىمىز امبەباپ كەزەڭدىك شولۋ شەڭبەرىندە قابىلداعان ۇسىنىستاردى، ونىڭ ىشىندە ادام قۇقىقتارىن قورعاۋ جانە ىلگەرىلەتۋ جونىندەگى بارلىق حالىقارالىق ينسترۋمەنتتەرگە قوسىلۋ بويىنشا ۇسىنىستى جۇزەگە اسىرۋ بويىنشا ۇدەمەلى جۇمىس اتقارۋدا.
اتاپ ايتقاندا، 2015-جىلعى اقپاندا قازاقستان مۇگەدەكتەردىڭ قۇقىقتارىن قورعاۋ تۋرالى حالىقارالىق كونۆەنتسيانى رەسىمدەدى. ادام قۇقىقتارى سالاسىندا 2020-جىلعا دەيىنگى ەكىنشى ۇلتتىق ءىس-شارالار جوسپارىنىڭ تۇجىرىمدىق نەگىزىن جاساۋ ناقتى ارەكەتتەر قولعا الىنىپ كەلەدى. تەڭدەسى جوق ينستيتۋت - قازاقستان حالقى اسسامبلەياسى قىزمەتىنىڭ ارقاسىندا ەلىمىزدە ۇلتارالىق جانە كونفەسسياارالىق كەلىسىم قالىپتاسقان. ۇستىمىزدەگى جىلعى 10-11- ماۋسىمدا استانادا وتەتىن الەمدىك جانە ءداستۇرلى ءدىن باسشىلارىنىڭ V سەزى قازاقستان رەسپۋبليكاسىنىڭ ءدىنارالىق ديالوگتى ىلگەرىلەتۋ جانە دامىتۋ بويىنشا دۇنيە جۇزىلىك ۇدەرىسكە قوسىپ كەلە جاتقان ەلەۋلى ۇلەسى ەكەنى مويىندالىپ وتىر.
سونىمەن قاتار، ق ر ادىلەت ءمينيسترىنىڭ ورىنباسارى بەيبىتشىلىك، تۇراقتىلىق جانە ەل بىرلىگى قازاقستاندىق قوعامنىڭ بەرەكەلى بولۋىنىڭ نەگىزى بولىپ قالا بەرەتىنى تۋرالى حابارلادى. ەلباسىمىزدىڭ «نۇرلى جول» قازاقستان حالقىنا جولداۋىندا ەلىمىز دامۋىنىڭ باسىمدىقتارى رەتىندە الەمنىڭ ادامداردىڭ قاۋىپسىز جانە جايلى ءومىر ءسۇرۋى قامتاماسىز ەتىلگەن ەلىن قۇرۋ انىقتالعان. وسى رەتتە، ماڭىزدى قادامداردىڭ ءبىرى «اشىق ۇكىمەت» مەحانيزمىن نىعايتۋ، ونىڭ ىشىندە اشىق اقپاراتقا قول جەتكىزۋ تۋرالى زاڭدى ازىرلەۋ مەن قابىلداۋ، سونداي-اق ازاماتتىق قوعامنىڭ ءوزىن-ءوزى رەتتەۋ قاعيداتتارىن كۇشەيتۋ بولماق.
ق ر دەلەگاتسياسى باسشىسىنىڭ بايانداماسىنان كەيىن بولعان ينتەراكتيۆتى ديالوگ بارىسىندا ب ۇ ۇ ادام قۇقىقتارى جونىندەگى كەڭەسىنە مۇشە جانە بايقاۋشى مەملەكەتتەر، سونداي-اق ۇكىمەتتىك ەمەس ۇيىمدار قازاقستانداعى ەتنوسارالىق جانە ءدىنارالىق كەلىسىمدى ساقتاۋداعى زاڭنامالىق، سوت جانە اكىمشىلىك ءىس-شارالاردى دامىتۋداعى ۇدەمەلى پروگرەستى، سونداي-اق زاڭ ۇستەمدىگى قاعيداتتارىنىڭ جۇزەگە اسىرىلۋىن اتاپ ءوتتى.
اۆتور: جاسۇلان جولدىبايەۆ
