دەنيس تەن: جانكۇيەرلەرىمە قولداۋ كورسەتكەندەرى ءۇشىن العىس ايتامىن
«الەم چەمپيوناتىنىڭ تاعى ءبىر القاسىنا يە بولعانىما قۋانىشتىمىن. - دەدى دەنيس تەن. - بۇل ناتيجە جامان ەمەس. ەركىن باعدارلامادا ۇزدىك اتانعانىما ريزامىن. جانكۇيەرلەرىمە قولداۋ كورسەتكەندەرى ءۇشىن العىس بىلدىرگىم كەلەدى. بۇل جولى ولاردىڭ قاتارى قالىڭ بولدى. مۇندايدى كۇتپەگەندىكتەن ريزا بولىپ قالدىم. جاڭا عانا ماعان فلەشموب تۋرالى ايتتى، سوڭعى كەزدەرى الەۋمەتتىك جەلىلەردە وتىرمايمىن. بارلىعىنا العىسىم شەكسىز. مەن سىزدەردىڭ باستامالارىڭىزدى جوعارى باعالايمىن. مەنىڭ كورسەتكەن ونەرىم سىزدەرگە كىشكەنتاي بولسا دا قۋانىش سىيلادى دەپ ۇمىتتەنەمىن. الدا جۇزەگە اسىراتىن اۋقىمدى جوسپارلارىم بار»، - دەدى د. تەن.
سونداي-اق مانەرلەپ سىرعاناۋشى ءتىلشىنىڭ: «ءسىزدىڭ باستى ماقساتىڭىز 2018-جىلعى وليمپيادا ما؟» دەگەن سۇراعىنا جاۋاپ بەردى.
«قازىرگى باستى مىندەتىم - العا قاراي جىلجۋ. 2018-جىلى كورەيادا مۇمكىندىگىمدى سىناعىم كەلەدى. وسى مەرزىمگە دەيىن جاقسىلاپ دايىندالۋىم كەرەك. وليمپيادا ماۋسىمى اياقتالعان سوڭ باستى ماقساتىما جەتۋ ءۇشىن جاعدايلاردى جاساۋ ماڭىزدى»، - دەدى ول.
ەسكە سالا كەتەيىك، يسپانيالىق حاۆەر فەرناندەس الەم چەمپيونى اتاندى، ەكىنشى ورىنعا جاپونيالىق يۋدزۋرۋ حانيۋ يە بولسا، ۇزدىك ۇشتىكتى دەنيس تەن تۇيىقتادى. دەنيس تەننىڭ قىسقا باعدارلاماسى الدىندا ونىڭ قازاقستانداعى جانە شەتەلدەردەگى جانكۇيەرلەرى سۇيىكتى مانەرلەپ سىرعاناۋشىلارىن قولداۋ ماقساتىندا فلەشموب ۇيىمداستىرعان.
