تۇڭعىش پرەزيدەنت مۋزەيىندە «ءداستۇر جالعاستىعى» كورمەسى اشىلادى
كورمە مۋزەيدىڭ «ۇكىلى ءۇمىت» اتتى شىعارماشىل جاستاردى قولداۋعا ارنالعان جوباسى اياسىندا ۇيىمداستىرىلدى.
قازاقستاننىڭ بەينەلەۋ ونەرىندەگى كەنجەلەۋ قالعان تۇسى - بۇل كەسكىندەمە ونەرىندەگى بىزكەستە ءادىسى. بۇگىندە ءداستۇرلى ونەرىمىزدىڭ زاماناۋي ۇلگىدە دامىتا وتىرىپ، بەلگىلى ءبىر رامكاعا كەستەلەنىپ تۇسكەن كومپوزيتسيا (بۇل جەردە رامكانىڭ ءوزى ءاردايىم شىعارماشىلىقتىڭ قايتالانباس ەلەمەنتى ەكەندىگى بەلگىلى) ەكى جانردىڭ ءبىر جەردە توعىسۋىن، ياعني قوندىرمالى (كەسكىندەمەلى) - دەكوراتيۆتى شىعارمانىڭ تۋىنداۋىنا مۇمكىندىك بەرەدى.
اعايىندى گۇلنازىم مەن اينۇر ءومىرزاقتار ت. جۇرگەنوۆ اتىنداعى قازاق ۇلتتىق ونەر اكادەمياسىندا وقىپ سۋرەتشى-كەسكىندەمەشى ماماندىعى بويىنشا ءبىلىم العان. گۇلنازىم مەن اينۇردىڭ ومىردە سەرىك ەتكەن كاسىپتەرى بىزكەستە ءادىسىن جان-جاقتى مەڭگەرگەن شەبەرلەر رەتىندە ەلىمىزگە تانىمال وتباسى. بىزكەستە تەحنيكاسىندا ورىندالعان ولاردىڭ تۋىندىلارى، قازىرگى كورەرمەندەر ءۇشىن تىڭ جاڭالىق بولىپ سانالاتىن، وزىندىك لەيتموتيۆى، سيمۆولدارى بار تولىققاندى سيۋجەتتەن تۇرادى.
گۇلنازىم ءومىرزاق 2009-جىلى ت. جۇرگەنوۆ اتىنداعى قازاق ۇلتتىق ونەر اكادەمياسىنداعى ماگيستراتۋرانى بىتىرگەن. 1986-جىلدىڭ 11- ناۋرىزىندا تۋىلعان. سۋرەت سالۋمەن جاستايىنان اينالىسقان ول، بىرنەشە سەرتيفيكاتتار مەن العىس حاتتارعا يە بولدى.
1996-جىلى جاس تالانتتاردىڭ «اينالايىن» 1- حالىقارالىق فەستيۆالىنىڭ لاۋرەاتى اتانادى. 2002-جىلى استانا قالاسىندا 5- حالىقارالىق مەرەكەلىك «شابىت» شىعارماشىل جاستار فەستيۆالىنىڭ لاۋرەاتى بولىپ التىن مەدالىمەن ماراپاتتالدى. 2003-جىلى يۋنەسكو-نىڭ الماتىداعى بيۋروسىنىڭ «ريسۋيۋت دەتي ميرا: قازاقستان» اتتى حالىقارالىق البومدار سەرياسىنا ەنگەنى ءۇشىن سەرتيفيكاتقا يە بولدى. 2006-جىلى فرانسيادا اكادەميا اتىنان ماماندىعىن شىنداپ قايتتى. 2010-جىلى رەسپۋبليكالىق «قاناتتى ايەل-3» يدەيالار مەن تاۋارلار جارمەڭكەسىنە قاتىسىپ ديپلوممەن ماراپاتتالعان.
اينۇر ءومىرزاق 1982-جىلدىڭ 10- مامىرىندا دۇنيەگە كەلگەن. 2013-جىلدان بەرى قازاقستان سۋرەتشىلەر وداعىنىڭ مۇشەسى. 2006-جىلى قازاق مەملەكەتتىك قىزدار پەداگوگيكا ينستيتۋتىندا وقىتۋشى بولىپ قىزمەت ىستەگەن. 2009-جىلدان تىكەلەي شىعارماشىلىق جۇمىستارمەن اينالىسىپ كەلەدى. ولار 1989-جىلدان باستاپ كوپتەگەن رەسپۋبليكالىق جانە حالىقارالىق كورمەلەر مەن قازاقستاننىڭ شەت مەملەكەتتەردەگى وتكىزىلگەن مادەنيەت كۇندەرىنىڭ بەلسەندى قاتىسۋشىسى بولىپ تابىلادى.
بۇگىنگى تاڭدا ءوز ونەرلەرىمەن ەلىمىزگە جانە شەتەلدەرگە تانىمال بولعان گۇلنازىم مەن اينۇر ءومىرزاقتىڭ شىعارماشىلىق جۇمىستارى لوندون، ليۋكسەمبۋرگ قالالارى جانە گەرمانيا، فرانسيا، تۇركيا، رەسەي ەلدەرىندەگى ونەر گالەرەيالارىندا ساقتاۋلى، سونىمەن قاتار ەلىمىزدەگى مەملەكەتتىك مەكەمەلەر مەن قوعامدىق ۇيىمداردىڭ ينتەرەرىنە قويىلعان.
«ءداستۇر جالعاستىعى» كورمەسى 2015-جىلدىڭ 20- ساۋىرىنە دەيىن جالعاسادى.
