الماتى جۇرتشىلىعى مەملەكەت جانە قوعام قايراتكەرى نۇرلان قاپپاروۆتى اقتىق ساپارعا شىعارىپ سالدى

«عىلىم ورداسى» ر م ك كەشەنىندە وتكەن قارالى جيىنعا نۇرلان قاپپاروۆپەن بىرگە ىسكەن ارىپتەستەرى، ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ، ق ر ەنەرگەتيكا ءمينيسترى ۆلاديمير شكولنيك، الماتى قالاسىنىڭ اكىمى احمەتجان ەسىموۆ، ق ر پارلامەنتىنىڭ دەپۋتاتتارى، وبلىس اكىمدەرى جانە قالا تۇرعىندارى كەلىپ، مارقۇمنىڭ وتباسىنا كوڭىل ايتىپ، قايعىلارىنا ورتاقتاستى.

ءوز سوزىندە الماتى قالاسىنىڭ اكىمى احمەتجان ەسىموۆ نۇرلان قاپپاروۆتىڭ نەبارى 45 جىل ءومىر سۇرسە دە ارتىنا وشپەس ءىز قالدىرعانىن ايتا كەلە، ەلباسى نۇرسۇلتان نازاربايەۆتىڭ جەدەل حاتىن وقىپ بەردى.

«نۇرلان قاپپاروۆ تاۋەلسىزدىگىمىزدىڭ العاشقى جىلدارىندا جاستار اراسىنان دارالانىپ شىعىپ، كاسىپكەر رەتىندە تانىلعان ەدى. سودان ءار جىلدارى «قازاقويل» ۇلتتىق مۇناي گاز كومپانياسىن، ق ر قورشاعان ورتا جانە سۋ رەسۋرستارى مينيسترلىگىن باسقاردى. «قازاتومونەركاسىپ» ا ق باسقارما ءتوراعاسى بولدى. وزىنە جۇكتەلگەن مىندەتتەردى ابىرويمەن اتقارا ءبىلدى. مول ءبىلىمى مەن تاجىريبەسىن ەلىمىزدىڭ ءوسىپ- وركەندەۋىنە جۇمسادى. امال قانشا، حالقىنا بەرگەنىنەن بەرەرى كوپ ەدى. ەندى حالقى ونىڭ ەسىمى مەن ەڭبەگىن ەشقاشان ۇمىتپايدى دەپ ويلايمىن»، - دەلىنگەن جەدەلحاتتا.

وسى قارالى جيىندا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ تا قايعىرىپ كوڭىل ايتتى.

«وسى تاياۋدا ءوزىمنىڭ ويلانباي جاساعان ارەكەتىم ءۇشىن نۇرلاننىڭ رۋحى الدىندا كەشىرىم سۇرايمىن. نۇرلان ەكولوگيا مينيسترلىگىنەن كەتىپ، «قازاتومونەركاسىپ» ا ق باسقارىپ جۇرسە دە، «ەكسپو-2017» ديرەكتورلار كەڭەسىنىڭ ءتوراعاسى بولاتىن.

ول ەلباسىنىڭ قابىلداۋىنا دايىندالىپ ءجۇردى. ويتكەنى قازاق ۇلتتىق پاۆيلونىنىڭ قۇرىلىمىنا جاۋاپتى ەدى. ءبىز پرەمەر-ءمينيستردىڭ الدىندا ارنايى روليكتى تاماشالادىق. ونى كورىپ بولعان سوڭ مەن ءبىر ەسكەرتپەمنىڭ بار ەكەندىگىن ايتتىم. نۇرلان وسىعان بايلانىستى جوباسىن قايتا وڭدەيمىن دەگەنشە 10 كۇن ۋاقىتى كەتتى. قازىر سول ايتقان ەسكەرتپەم ءۇشىن قاتتى وكىنەمىن. ەگەر ايتپاعانىمدا ول ءوز يدەياسىمەن جانە دايىنداعان روليگىمەن ەلباسىنىڭ قابىلداۋىندا بولار ەدى. مۇمكىن، جوباسى ماقۇلدانىپ، ءبىز نۇرلاننىڭ جاساعان ەڭبەگىن كورەر مە ەدىك. مەن بۇل روليكتىڭ ەلباسىنىڭ قاراۋىندا بولاتىندىعى جونىندە نۇرلاننىڭ رۋحى الدىندا ۋادە ەتەمىن. ويتكەنى، ول ءوزىنىڭ وسى جوباسىنا بار ىنتاسىمەن كىرىسكەن بولاتىن»، - دەدى ساعىنتايەۆ.

پاۆلودار وبلىسىنىڭ اكىمى قانات بوزىمبايەۆ ءوز سوزىندە نۇرلان قاپپاروۆتىڭ ءوز ىسىنە قاشاندا ۇقىپتى بولعاندىعىن جەتكىزدى.

«قاي ءىستى قولعا الماسىن، ءمىنسىز جاسايتىن. كەزىندە «قازترانسويل» كومپانياسىن تابىستى كومپانياعا اينالدىردى. «قازاق ويلدا» جۇمىس ىستەپ ءجۇرىپ، قازاقستان مۇنايىنىڭ ەكسپورتىن بىرنەشە ەسەگە ارتتىردى. سونىڭ ارقاسىندا ەل قازىناسىنا قوماقتى قارجى كەلىپ تۇسە باستادى. ۇلتتىق قوردى قۇرۋدا دا نۇرلاننىڭ ۇلەسى وتە زور. ول وسى قورعا قاتىستى جۇمىس توبىنىڭ مۇشەسى بولدى. سونىڭ ارقاسىندا قورعا قارجى كەلىپ تۇسە باستادى. ونىڭ اتوم ونەركاسىبى سالاسىن دامىتۋعا قاتىستى دا جوسپارلارى كوپ بولاتىن. كومپانيانى وسى سالانىڭ كوشباسىنا شىعارعىسى كەلدى. نۇرلاننىڭ قازاسى - ءبىز ءۇشىن ورنى تولماس اۋىر قازا»، - دەدى ق. بوزىمبايەۆ.

مارقۇم كەڭساي زيراتىنا جەرلەندى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى