قاراعاندى اكىمى جاۋاپسىز حاتتار ءىسى بويىنشا سوت پروتسەسىندە ۇتىلدى
قازىبەك ءبي اۋداندىق №2 سوتى قالا باسشىسىن قىزمەتتىك مىندەتتەرىن ادال اتقارۋعا مىندەتتەدى.
ارىزدانۋشى سەرگەي فەدوروۆ جەكە قۇرىلىس سالۋعا جەر تەلىمىن سۇراۋ ءۇشىن قاراعاندى اكىمىنە ءۇش مارتە ءوتىنىش بىلدىرگەن. ءبىراق قىركۇيەكتە، سودان كەيىن قازان ايىنىڭ ورتاسىندا، قازان ايىنىڭ سوڭىندا جىبەرىلگەن ءوتىنىشتى شەنەۋنىك ەلەمەي قويعان.
ءوز قۇقىعىن قۇرمەتتەمەگەنى جانە «جەكە جانە زاڭدى تۇلعالاردىڭ وتىنىشتەرىن قاراۋ ءتارتىبى تۋرالى» زاڭنىڭ بۇزىلعانى ءۇشىن فەدوروۆ اۋباكىروۆتىڭ ۇستىنەن ارىزداندى.
ارىزىندا ول ارەكەتسىزدىك دەرەگىن تانۋدى سۇراپ، شەنەۋنىكتى كوررەسپوندەنسياعا قۇرمەتپەن قاراۋدى مىندەتتەۋدى تالاپ ەتتى. شاعىمدانۋشى سوت زالىندا دالەل رەتىندە ءوزىنىڭ حاتتارىن كەڭسە ءبولىمىنىڭ قىزمەتكەرلەرىنىڭ العانىن راستايتىن تۇبىرتەكتى كورسەتتى.
ءوز وتىنىشتەرىنە جاۋاپتىڭ بەرىلمەگەنىن ەر ادام باس پروكۋراتۋرانىڭ قۇقىقتىق ستاتيستيكا جانە ارنايى ەسەپ جونىندەگى كوميتەتتىڭ سايتىنداعى كوشىرمەلەرمەن دالەلدەدى.
ايتا كەتەيىك، اتالعان سايتتا وتىنىشتەردىڭ قارالماعاندىعى كورسەتىلگەن.
جاۋاپكەر سوتقا كەلمەدى. اكىم نۇرلان اۋباكىروۆ ءوزىنىڭ ورنىنا سەنىمدى وكىلى رەتىندە اكىمدىك زاڭگەرىن جىبەردى. اۋباكىروۆتىڭ وكىلى شاعىمدى مويىندامادى، ول بارلىق وتىنىشكە جاۋاپ بەرىلگەنىن مالىمدەدى.
بۇدان كەيىن ول تۇبىرتەك پەن جونەلتپە قۇجاتتى كورسەتتى. ارىزدانۋشىنىڭ نەلىكتەن جاۋاپتى الماعانى تۋرالى سۇراققا زاڭگەر بىلمەيتىنىن ايتتى. سوت بۇل دالەلدى قابىلداماي، فەدوروۆتىڭ ارىزىن تولىقتاي قاناعاتتاندىردى.
«كورسەتىلگەن جونەلتپە قاعاز بەن تۇبىرتەكتە وتىنىشتەردىڭ قاراستىرىلۋى عانا ەمەس، سونىمەن قاتار، جاۋاپتاردىڭ شىن مانىندە جونەلتىلگەنى تۋرالى اقپارات تا جوق. جاۋاپكەر نۇرلان اۋباكىروۆ فەدوروۆتىڭ وتىنىشتەرىنە جازباشا جاۋاپ بەرمەدى، مۇنى ارەكەتسىزدىك دەپ تانۋعا بولادى»، - دەدى سۋديا زاۋرەش يبرايەۆا.
سۋديا اۋباكىروۆتىڭ «جەكە جانە زاڭدى تۇلعالاردىڭ وتىنىشتەرىن قاراۋ ءتارتىبى تۋرالى» زاڭىنىڭ 9-بابىندا كورسەتىلگەندەي، ءوز قۇزىرى اياسىندا ءوتىنىشتى ءوز ۋاقىتىندا جانە وبەكتيۆتى تۇردە قاراستىرۋى كەرەك بولعانىن اتاپ ءوتتى.
«سوت تالاپ ارىزىن تولىقتاي قاناعاتتاندىرادى جانە قاراعاندى اكىمىنىڭ ارەكەتسىزدىگىن (ءۇش ءوتىنىشتى ەلەمەۋ تۇرىندە) زاڭسىز دەپ تاپتى. سوت نۇرلان اۋباكىروۆتى سەرگەي فەدوروۆتىڭ زاڭمەن قورعالاتىن قۇقىعى مەن مۇددەسىن بۇزدى، سوندىقتان بۇل ولقىلىقتى جويۋدى مىندەتتەدى»، - دەدى زاۋرەش يبرايەۆا.
ايتا كەتەيىك، ارىزدانۋشى ءمورالدىق شىعىن تالاپ ەتپەدى، ول سوتتان قاراعاندى اكىمىنىڭ زاڭدى بۇزعانىن راستاۋدى سۇرادى.
