بايقوڭىردا رەسەيدە جالدا تۇرعان جەردى قايتارىپ الۋعا بايلانىستى الدىن-الا كەلىسىم جاسالدى

بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆتىڭ بايقوڭىر قالاسىنا جۇمىس ساپارى بارىسىندا فەدەرالدىق عارىش اگەنتتىگىنىڭ ءتوراعاسى ي. ا. كوماروۆپەن كەزدەسۋى كەزىندە ءمالىم بولدى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

ماسەلە وڭىنان شەشىلسە، بۇل جەردىڭ 3579 گەكتارى تورەتام كەنتىنە بەرىلەدى. ونىڭ 184 گەكتارى جاڭادان كەنت ورتالىعىن سالۋعا، 90 گەكتار كاسىپكەرلىكتى دامىتۋعا، 145 گەكتار جەر كەنتتىڭ اۋماعىن كەڭەيتۋگە باعىتتالماق. ال 122 گەكتار جەر اققايىڭ اۋماعىن كەڭەيتۋگە پايدالانىلادى.

سونداي-اق 21344 گەكتار جەر حالىقارالىق «باتىس ەۋروپا - باتىس قىتاي» كولىك ءدالىزىنىڭ بويىندا كولىك- لوگيستيكالىق ينفراقۇرىلىمىن سالۋعا جانە «بەينەۋ- شىمكەنت» گاز قۇبىرىنىڭ جەلىلىك بولىگىن وتكىزۋ ماقساتىنا قولدانىلادى.

سونىمەن قاتار باسقوسۋدا بايقوڭىر قالاسىندا ءتۋريزمدى دامىتۋ، 6 مەكتەپتى قازاقستاندىق ستاندارتقا كوشىرۋ، جەڭىستىڭ 70 جىلدىعىن جانە «بايقوڭىر» كەشەنىنىڭ 60 جىلدىعىن مەرەكەلەۋ ماسەلەلەرى تالقىلاندى.

بولاشاقتا «بايقوڭىر» عارىش ايلاعى تۋريستىك ورتالىققا اينالادى. بۇل ماقساتتا عارىش كەمەلەرىنىڭ ۇشۋىن تاماشالايتىن ارنايى كەشەندەر سالىنباق. قازىرگى «كرايني» اۋەجايى كۇردەلى جوندەۋدەن وتكىزىلىپ، استانا- قىزىلوردا- بايقوڭىر، الماتى- قىزىلوردا- بايقوڭىر باعىتتارىندا اۋە رەيستەرىن اشۋ باعىتىندا جۇمىستار جاسالۋدا. بۇعان قوسا، بايقوڭىرعا كىرۋگە رۇقسات بەرۋگە ارنالعان قۇجاتتاردى دايىنداۋ جەڭىلدەتىلمەك.

 اۆتور: ەلۋباي اۋەزوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى