تاجىكستان ىشىمدىك ىشۋدەن رەسەيدى باسىپ وزدى
ءتىزىمدى جاساۋ بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ كورسەتكىشتەرى نەگىزگە الىنعان.
بۇل تۋرالى news-asia.ru حابارلادى.
كەلتىرىلگەن مالىمەتكە سۇيەنسەك، 15 جاستان اسقان ءاربىر تاجىكستاندىققا جىلىنا ورتا ەسەپپەن 30,3 ليتر ىشىمدىكتەن كەلەدى ەكەن. سونىڭ ىشىندە ىشىمدىك ىشەتىن ءبىر ەر ادامعا 31,1 ليتردەن كەلسە، الكوگولدەن باس تارتپايتىن ءار تاجىك ايەلى جىلىنا 28,3 ليتر اراق- شاراپ تۇتىنادى.
بۇل كورسەتكىش بويىنشا ىشىمدىك ىشۋدەن الدىنا جان سالمايتىن رەسەيدىڭ ءوزى تاجىكتەرگە جول بەرىپ تۇر. ءاربىر رەسەيلىك ورتا ەسەپپەن جىلىنا 22 ليتر الكوگول ونىمدەرىن تۇتىنادى. دەگەنمەن، ىشىمدىك ىشەتىن ءار ەر ادامنىڭ كورسەتكىشى بويىنشا سولتۇستىك كورشىمىز الدا كەلەدى (32 ليتر).
ال رەسەي ايەلدەرى 12,6 ليتر ىشىمدىك ىشەدى ەكەن. The Lancet مەديتسينالىق جۋرنالىنىڭ زەرتتەۋى بويىنشا سوڭعى كەزدەرى ەۋروپا پەن امەريكادا ىشىمدىك ءىشۋ كورسەتكىشى تومەندەگەن. كەرىسىنشە، ازيا حالىقتارى اراسىندا بۇل ءۇردىس كەڭ ەتەك جايۋدا.
ماسەلەن، ءبىزدىڭ ەلدە جان باسىنا شاققانداعى ءبىر جىلدىق كورسەتكىش 26,2 ليترگە تەڭ. وزبەكستاندا 12,3 ءليتردى قۇراسا، ءار قىرعىزعا جىلىنا 11,3 ليتر الكوگول تيەدى.
ءبىر قىزىعى، 2008-2010 - جىلدارى جۇرگىزىلگەن زەرتتەۋ جۇمىستارىنىڭ ناتيجەسىندە، تاجىكستاندا ءار ادامعا ءبىر جىلدا 2,8 ليتر سپيرتتىك ونىمنەن كەلگەن. ءتىپتى دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا بەس جىل بۇرىن تەك ءاربىر 11- تاجىكستاندىق قانا ىشىمدىك ىشەتىن.
ول از دەسەڭىز، سول كەزدە ەرلەردىڭ 86,1 پايىزى، ال ايەلدەردىڭ 95,2 پايىزى مۇلدەم اشى سۋدى تاتىپ كورمەگەنىن ايتقان. وسىنشا از ۋاقىتتىڭ ىشىندە جاعدايدىڭ كۇرت ناشارلاپ كەتۋىنىڭ سەبەبىن ماماندار انىقتاي الماۋدا.
ونىڭ ۇستىنە، بۇگىندە تاجىكتەردىڭ 89 پايىزى كۇشى جوعارى ىشىمدىكتى قالايدى ەكەن. تەك 10 پايىزى عانا سىرا ونىمدەرىن تۇتىنسا، 1 پايىزى شاراپپەن شەكتەلۋدى ءجون سانايدى. باتىس ەلدەرىندەگى زەرتتەۋشىلەردى سارى قۇرلىقتاعى بۇل جاعداي قاتتى الاڭداتىپ وتىر.
سەبەبى، ازيا حالىق ەڭ كوپ شوعىرلانعان قۇرلىق. ال ىشىمدىكتى تۇتىنۋ ءدال وسى باعىتتا جالعاسا بەرسە، ادامداردىڭ قالىڭ وشاعى سان ءتۇرلى اۋرۋدىڭ وزەگىنە اينالۋى ابدەن مۇمكىن. قازىردىڭ وزىندە قىتايدا 300 مىڭ ادام الكوگول ونىمدەرىنەن قايتىس بولادى.
ەلامان قوڭىر. دەرەك: news-asia.ru.
«ەگەمەن قازاقستان»
