فرانسيادا اپاتقا ۇشىراعان ۇشاقتىڭ ەكىنشى ۇشقىشى ونى ادەيى جويعان - مارسەل پروكۋرورى
پروكۋرور بريس روبەننىڭ ايتۋىنشا، نەمىستىڭ «Germanwings» اۋە كومپانياسىنىڭ يەلىگىندەگى اەروبۋستىڭ ەكىنشى ۇشقىشى ۇشاقتى پيكەگە «سانالى تۇردە» باعىتتاپ، جەرگە قۇلاۋ كەزىندە ءتىرى بولعان، دەپ حابارلايدى The Guardian. «ونىڭ ۇشاقتى جويۋ نيەتى بولعان»، - دەدى ول. ۇشۋدىڭ سوڭعى 30 مينۋتى تۋرالى اقپارات داۋىستار جازىلعان «قارا جاشىكتىڭ» مالىمەتتەرىن وقۋ كەزىندە الىنعان.
پروكۋرور ەكيپاج كومانديرىنىڭ كابينادان شىعىپ كەتكەندە، ەكىنشى ۇشقىش باسقارۋدى وزىنە الىپ، ۇشاقتى تومەن باعىتتاعان. روبەننىڭ ايتۋىنشا، كابينادا ۇرەي بەلگىلەرى بولعان جوق، ەكىنشى ۇشقىش جاقسى تىنىس العان، ول ۇشاق جەرگە قۇلاعانشا بىردە ءبىر ءسوز ايتپادى.
فرانسيالىق پروكۋرور ەكىنشى ۇشقىشتىڭ ەسىمى اندرەاس لۋبيتس ەكەنىن، ونىڭ گەرمانيا ازاماتى ەكەنىن مالىمدەدى.
ول 28 جاستا بولعان، دەپ اتاپ وتەدى The Wall Street Journal. ول رەينلاند- پفالتس جەرىندەگى مونتەباۋر قالاسىنىڭ تۋماسى. رەيتەرس لۋبيتستىڭ تاجىريبەسىندە نەبارى 630 ساعات بولعانىن، ال نەگىزگى ۇشقىش ەڭبەك جولىندا بارلىعى 6000 ساعات ۇشقانىن اتاپ وتەدى.
Bild بەرگەن مالىمەتتەرگە سايكەس، كەمە كومانديرىنىڭ ەسىمى پاتريك س. بولعان، ول ديۋسسەلدورفتا دۇنيەگە كەلگەن.
ۇشۋدىڭ سوڭعى 10 مينۋتىندا كوماندير ەكىنشى ۇشقىشتى جابىق تۇرعان ەسىكتىڭ ار جاعىنان بىرنەشە رەت شاقىردى. پروكۋرور لۋبيتستىڭ ارەكەتتەرىن ءوزىن- ءوزى ءولتىرۋ دەپ اتاۋدان باس تارتتى، سونداي-اق ونىڭ «لاڭكەس رەتىندە تانىلماعانىن» مالىمدەگەن. ول اپاتتىڭ لاڭكەستىك ارەكەت بولعانىن كورسەتەتىن ەشقانداي مالىمەتتەردىڭ ازىرگە جوق ەكەنىن اتاپ ءوتتى.
«مەن ونى ءوزىن-ءوزى ءولتىرۋ دەپ ايتا المايمىن، ءبىراق ءىس جۇزىندە بۇل نۇسقانى قاراستىرۋ كەرەك»، - دەدى روبەن.
«قارا جاشىكتىڭ» جازبالارىن وقۋ كەزىندە اپاتتىق جاعدايدىڭ ورىن الۋىنا 20 مينۋت قالعاندا ەكى ۇشقىشتىڭ ءبىر-بىرىمەن جاقسى سويلەسكەنى اڭعارىلادى. «ءبىز ۇشاقتىڭ قۇلاۋىنا بىرنەشە مينۋت قالعانداعى ايقاي- شۋدى ەستي الاتىن ەدىك»، - دەدى روبەن.
مارسەلدەگى ديسپەتچەرلەردىڭ ۇشاقپەن بايلانىسقا شىعۋعا بىرنەشە رەت ارەكەتتەنگەندەرىنە قاراماستان، ولارعا ەشكىم جاۋاپ بەرمەدى، دەپ تۇيىندەدى پروكۋرور.
ەستەرىڭىزگە سالا كەتەيىك، نەمىستىڭ «Germanwings» لوۋكوستەرىنىڭ «Airbus A320» ۇشاعى 24 - ناۋرىز كۇنى فرانسيالىق الپىدە اپاتقا ۇشىرادى. «بارسەلونا- ديۋسسەلدورف» باعىتىمەن ۇشىپ كەلە جاتقان اۋە كەمەسىنىڭ ىشىندە 144 جولاۋشى مەن ەكيپاجدىڭ التى مۇشەسى بولعان. ۇشىپ شىققاننان كەيىن 30-40 مينۋت وتكەن سوڭ كرەيسەرلىك بيىكتىككە ەندى عانا جەتكەن لاينەر تومەندەي باستاعان. بۇدان كەيىن ديسپەتچەرلەر ونىمەن بايلانىستى ءۇزىپ الدى. ۇشاقتىڭ سىنىقتارى جوعارى پروۆانستاعى ءالپى دەپارتامەنتىندە تەڭىز دەڭگەيىنەن 2 شاقىرىمعا جۋىق بيىكتىكتەگى شاتقالدان تابىلدى.
