اسكەردەن جالتارعاندارعا اكىمشىلىك جانە قىلمىستىق جاۋاپكەرشىلىك كۇشەيتىلدى

سوعان وراي، اكىمشىلىك قۇقىق بۇزۋشىلىق كودەكسى مەن قازاقستان رەسپۋبليكاسىنىڭ قىلمىستىق كودەكسىنە وزگەرتۋلەر مەن تولىقتىرۋلار ەنگىزىلدى.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر قارۋشى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى - جاساقتاۋ باسقارماسىنىڭ باستىعى پولكوۆنيك امانتاي وسەربايەۆ ءمالىم ەتتى.

جاڭا قىلمىستىق كودەكستە اسكەري بورىشىن وتەۋدەن جالتارعانى ءۇشىن جازالاۋ شارالارى كۇشەيتىلدى. اتاپ ايتقاندا، زاڭ بۇزۋشىلارعا اقشالاي ايىپپۇل سالۋمەن قاتار، اسكەرگە شاقىرۋدان جۇيەلى تۇردە باس تارتقان ازاماتتاردى قاماۋعا الۋ جازاسى قاراستىرىلعان.

«اسكەردەن جالتارعاندارعا 1 مىڭ اەك نەمەسە 1,8 ميلليون تەڭگە ايىپپۇل جانە قىلمىستىق جاۋاپكەرشىلىك قاراستىرىلعان. الايدا ءبىزدىڭ ەلدە بۇنداي وقيعالار تىركەلگەن ەمەس. ازاماتتارىمىز زاڭعا مويىنسۇنادى جانە شاقىرتۋ تۇسكەن جاعدايدا ۋاقىتىندا كەلەدى»، - دەدى ول.

​بيىل قورعانىس مينيسترلىگىنىڭ باسشىلىعى قويعان تاپسىرمالارعا سايكەس جەرگىلىكتى اسكەري باسقارۋ ورگاندارى كەلىسىمشارت بويىنشا اسكەري قىزمەتشىلەر مەن مەرزىمدى اسكەري قىزمەت جاۋىنگەرلەرىنىڭ اراقاتىناسى %80  دە %20 قۇرايتىندىعىن اتادى. وتكەن جىلى بۇل

اراقاتىناس %70 تە %30 قۇراعان بولاتىن.

جەرگىلىكتى اتقارۋشى ورگانداردىڭ شەشىمى بويىنشا اسكەرگە شاقىرۋ ناۋقانى كەزىندە ازاماتتاردى دارىگەرلىك كۋالاندىرۋدى قامتاماسىز ەتەتىن شاقىرۋ جانە مەديتسينالىق كوميسسيا قۇرىلادى.

ەستەرىڭىزگە سالا كەتسەك، مەرزىمدى اسكەري قىزمەتكە شاقىرۋ قازاقستان رەسپۋبليكاسىنىڭ «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭىنا سايكەس جىلىنا ەكى مارتە وتكىزىلەدى.

بيىل اسكەرگە شاقىرۋ 1 - ساۋىردەن باستالادى. جالپى 2015 - جىلى 29 مىڭنان استام ەر ازاماتتار مەرزىمدى اسكەري قىزمەتكە شاقىرىلۋعا جاتادى.

 قازاقستان رەسپۋبليكاسى قارۋلى كۇشتەرى قاتارىنا 4 مىڭعا جۋىق ازاماتتاردى اسكەرگە شاقىرۋ جوسپارلانۋدا، ال قالعان ازاماتتار قازاقستان رەسپۋبليكاسى مەملەكەتتىك كۇزەت قىزمەتى، قازاقستان رەسپۋبليكاسى ۇلتتىق ۇلانى مەن قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ اسكەري بولىمدەرىنە جىبەرىلەتىن بولادى.

زاماناۋي تالاپتاعى اسكەرگە شاقىرىلۋدىڭ ەرەكشەلىگى - ونىڭ اشىقتىعى. بۇل ەڭ الدىمەن قوعام وكىلدەرىنىڭ شاقىرۋ كوميسسياسىنىڭ جۇمىسىنا قاتىسۋى ارقىلى جۇزەگە اسىرىلادى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى