قازاقستاندا ءبىرىنشى سىنىپ وقۋشىلارى ءۇشىن بەس كۇندىك وقۋ اپتاسى ەنگىزىلەدى
«قازىرگى ۋاقىتتا ءبىرىنشى سىنىپ وقۋشىلارى ءۇشىن پاندەردى قىسقارتۋ بويىنشا جۇمىستار جۇرگىزىلىپ جاتىر. سونىمەن قاتار، ولاردى بەس كۇندىك وقۋ اپتاسىنا اۋىستىرۋ جونىندە جۇمىستار ءجۇرۋ ۇستىندە»، - دەدى ق ر ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتايەۆا ورتالىق كوممۋنيكاتسيالار قىزمەتىندەگى بريفينگتە تىلشىلەردىڭ سۇراعىنا جاۋابىندا.
«30 مەكتەپتە سىناق وتكىزەمىز، 2015-2016 - جىلدارى بەس كۇندىك وقۋ اپتالىعى ەنگىزىلەدى. بارلىق وسى جاڭا ەرەجەلەردى ەڭگىزەمىز»، - دەدى جونتايەۆا. ونىڭ ايتۋىنشا، سىناق قورىتىندىسىندا بۇل ستاندارتتىڭ ەلدەگى بارلىق مەكتەپكە ەنگىزىلۋ- ەنگىزىلمەۋى بەلگىلى بولادى.
ايتا كەتەيىك، 2014 - جىلدىڭ كۇز ايىندا ماجىلىسمەندەر قازاقستاندىق وقۋشىلارعا بەس كۇندىك وقۋ اپتالىعىن ەنگىزۋدى ۇسىنعان بولاتىن.
وسىعان دەيىن قازاقستاندا ورتا ءبىلىم بەرۋدىڭ جاڭا ستاندارتتارى جاسالاتىنى حابارلانعان ەدى - قازاقستاندىق بالالاردىڭ مەكتەپكە دەيىنگى دايىندىعى 12 جىلدىق ءبىلىم بەرۋ ستاندارتىنا قوسىلادى.
«ءبىز 12 جىلدىق ءبىلىم بەرۋگە جاقىنداي بەرەمىز، ءبىراق، پرەزيدەنتتىڭ تاپسىرعانىنداي، بۇل پروتسەسس 11 جىلدىق ءبىلىم بەرۋ مەن وعان ءبىر جىل مەكتەپكە دەيىنگى دايىندىق اياسىندا جۇزەگە اسادى. بۇگىنگە دەيىن مەكتەپكە دەيىنگى دايىندىق باعدارلاماسى 6 جاستاعى بارلىق بالالاردىڭ 95 پايىزىن قامتيدى، ءبىز دامۋ جولىندا جۇرەمىز، ءدال وسى مەكتەپكە دەيىنگى دايىندىق باعدارلاماسىن مودەرنيزاتسيالايمىز.
بۇل 1 + 11 فورمۋلاسى ىسپەتتى بولادى. جىل سوڭىنا دەيىن 11 جىلدىق ءبىلىم بەرۋ مەن وعان تاعى ءبىر جىل مەكتەپكە دەيىنگى دايىندىقتى قوساتىن جاڭا ستاندارتتى دايىندايمىز»، - دەگەن ەدى ق ر ءبىلىم جانە عىلىم ءمينيسترى اسلان ءسارىنجىپوۆ.
