تاجىكستاندا جاقىن تۋىستاردىڭ نەكەلەسۋىنە تىيىم سالىنۋى مۇمكىن
بۇل تۋرالى news-asia.ru عا سىلتەمە جاساپ، «ەگەمەن قازاقستان» گازەتى حابارلادى.
قازىرگى تاڭدا ەلدىڭ دەنساۋلىق ساقتاۋ مينيسترلىگى اتالعان جاعداياتقا بايلانىستى زاڭ جوباسىن ازىرلەۋ قاجەتتىگىن العا تارتىپ وتىر.
مينيسترلىكتىڭ مۇنداي باستاما كوتەرۋىنە ءبىر- بىرىمەن ۇيلەنگەن وتە جاقىن تۋىستاردىڭ وتباسىلارىندا تۋعان بالالاردىڭ اراسىندا مۇگەدەكتەردىڭ تىم كوبەيىپ كەتكەنى ءماجبۇر ەتكەن. وسى ورايدا ۆەدومستۆا ماماندارى حاتلون وبلىسىندا جۇرگىزگەن زەرتتەۋ ناتيجەلەرىن العا تارتقان. حاتلون وبلىستىق دەنساۋلىق ساقتاۋ باسقارماسى ءمالىم كەتكەندەي، وڭىردە 18 جاسقا دەيىنگى 9700 مۇگەدەك بار ەكەن. ولاردىڭ 1546 سى جاقىن تۋىستاردىڭ نەكەلەسۋىنەن تۋعاندار كورىنەدى.
رەسپۋبليكادا وسىنداي نەكەلەردەن دەنە جانە اقىل-ەس كەمىستىگى بار بالالار كوپ تۋىلىپ جاتقانى دالەلدەنسە دە، ەلدە بۇعان توسقاۋىل قويار زاڭ جوق. وسى جونىندە 2013 - جىلى قىزۋ تالقىلاۋ بولعان. ءبىراق ول بوس ءسوز رەتىندە قالىپ قويعان-دى. ەندى مىنە، بۇل تاقىرىپ قايتادان ءسوز بولا باستادى.
بۇل جولى اتالمىش ماسەلەنى ەل پرەزيدەنتى ەمومالي راحمون كوتەردى. دەمەك، وتە جاقىن تۋىستاردىڭ شاڭىراق كوتەرۋىنە زاڭ جۇزىندە توقتاۋ سالۋ ءىسى ءوز شەشىمىن تاباتىنى ابدەن مۇمكىن. جالپى، ءداستۇرلى، ابدەن قالىپتاسىپ قالعان ۇردىسكە پرەزيدەنتتىڭ ءوزى قارسى شىقسا، مۇنداي نەكەلەردەن تاجىك ۇلتىنىڭ كوپ زارداپ شەگىپ وتىرعانىن انىق اڭعارۋعا بولادى. ە. راحمون: «مەملەكەتتە 13 مىڭ مۇگەدەك بالا بار. ولاردىڭ باسىم بولىگىنىڭ اكە-شەشەلەرى وتە جاقىن تۋىستار. سوندىقتان، دەنساۋلىق ساقتاۋ جانە الەۋمەتتىك قامسىزداندىرۋ مينيسترلىگى مۇنداي نەكەلەسۋدى ءتۇپ-تامىرىمەن قۇرتۋ ماقساتىندا جۇمىس ىستەۋ كەرەك»، دەدى.
ارينە، قوعام بولعان سوڭ ءارتۇرلى پىكىرلەر ايتىلىپ جاتادى. تاجىكستان پرەزيدەنتىنىڭ ءسوزىن حالىقتىڭ ءبىر بولىگى قولداسا، ەكىنشى بولىگى قابىلداعىسى جوق. تۋىسقانداردىڭ نەكەلەسۋىن قولدايتىنداردى دا تۇسىنۋگە بولار.
ويتكەنى، مۇنداي وتباسى قۇرۋ ءداستۇرى تاجىكتەردىڭ اراسىندا كوپتەگەن عاسىرلار بويى جالعاسىپ كەلگەن. ال وسىلايشا قالىپتاسقان ۇردىستەن حالىقتى بىردەن اجىراتۋ وڭاي شارۋا ەمەس. كوپتەگەن ادامدار وزگە، تۋىستىق جاعىنان الىس وتباسىمەن قۇدا بولۋدى جاراتپايدى. مۇنداي پىكىردەگىلەر تۋىستاردىڭ نەكەسىنەن تۋعان بالالاردىڭ گەنىندە كىنارات بار ەكەنىن راستايتىن ناقتى عىلىمي دايەكتەر كەرەك دەپ سانايدى.
ال ءدىن وكىلدەرىنىڭ سوزىنە قاراعاندا، نەمەرەلەس تۋىسقانداردىڭ نەكەلەسۋىن يسلام ءدىنى قولدامايدى، ءبىراق، وعان تىيىم دا سالمايدى ەكەن. دەگەنمەن، يسلام عالىمدارى تۋىستىق جاعىنان الىس جانداردىڭ نەكەسىنەن تۋعان بالالاردىڭ دەنساۋلىقتارى جاقسى بولاتىنىن ايتادى. ايتا كەتەيىك، ۇلى بريتانيادا جۇرگىزىلگەن news-asia.ru سوڭعى زەرتتەۋ ناتيجەسىندە تۋىسقان ادامداردىڭ نەكەسىنەن تۋعان سابيلەر اراسىندا دەنە جانە اقىل-ەس كەمىستىگى بار بالالاردىڭ كوپ كەزدەسەتىنى انىقتالعان.
