گۇلنارا كاريموۆانىڭ «اشكوزدىگى» اشكەرەلەندى
ازاتتىقتىڭ وزبەك قىزمەتى «پرەزيدەنتتىڭ تاشكەنتتە ءۇي قاماعىندا وتىرعان قىزى گۇلنارا كاريموۆا وزبەكستاندا بۇرىن جۇمىس ىستەگەن جانە قازىر جۇمىس ىستەپ جاتقان حالىقارالىق ۇيالى بايلانىس كومپانيالارىن «ساۋىن سيىرعا» اينالدىرىپ، ءبىر ميلليارد دوللار الدى» دەپ حابارلادى.
باتىستىڭ بەلگىلى كومپانيالارىنان بۇل اقشانىڭ كوپ بولىگىن كاريموۆا ءوز ادامدارى ارقىلى كۇدىكتى جولدارمەن العان.
ناۋرىزدىڭ 21 ى كۇنى كوررۋپتسيالىق جانە ۇيىمداسقان قىلمىستاردى زەرتتەۋ ورتالىعى (OCCRP) بۇل ىسكە قاتىستى جۋرناليستىك تەكسەرۋ ناتيجەلەرىن نورۆەگيانىڭ تونسبەرگ قالاسىندا جينالعان جۇزدەگەن ءجۋرناليستىڭ الدىندا جاريالادى.
جۋرناليستىك زەرتتەۋ ناتيجەسىندە تابىلعان قۇجاتتار رەسەيدىڭ متس، UCell برەندى بويىنشا جۇمىس ىستەگەن شۆەدتىك TeliaSonera, Vimpelcom (Beeline برەندى) جانە Mirkony Investment group ltd جانە Eastwell group سياقتى كومپانيالاردان گۇلنار كاريموۆانىڭ ءوز سىبايلاستارى ارقىلى ءبىر ميللياردتان كوپ ا ق ش دوللارىن قالاي العانىن كورسەتەدى.
ءۇش جىلعا سوزىلعان زەرتتەۋ جۇمىسىنىڭ ناتيجەسى - 10 پاراقتان تۇراتىن ەسەپتى OCCRP ورتالىعىنىڭ جەتەكشى ساراپشىسى ميراندا پاترۋچيچ (Miranda Patrucic) پەن ەۋروپانىڭ 10-نان اسا جۋرناليسى ازىرلەگەن.
كوررۋپتسيالىق جانە ۇيىمداسقان قىلمىستاردى زەرتتەۋ ورتالىعى مىڭداعان بەتتەن تۇراتىن ءارى كاريموۆاعا قارسى ايىپتاۋلاردى راستايتىن قۇجاتتاردى مۇقيات تەكسەرىپ شىققان.
كونبەگەنگە كوك شىبىن ۇيمەلەتكەن
دالەل رەتىندە كەلتىرىلگەن قۇجاتتاردىڭ ىشىندە كومپانيالاردىڭ قارجى ەسەپتەرى، وففشورلىق رەەستەرلەر مەن بانكتەگى ەسەپ- شوتتار تۋرالى مالىمەتتەر، قارجى قۇجاتتارى مەن قولحاتتار بار.
- «گۇلنارا كاريموۆا سكانديناۆيالىق جانە رەسەيلىك ۇيالى بايلانىس كومپانيالارىن پارا تولەۋگە ماجبۇرلەيدى» دەگەن سوزدەر باياعىدان ايتىلىپ كەلەدى. ءبىزدىڭ قولىمىزعا تۇسكەن قۇجاتتار گۇلنارا كاريموۆانىڭ ءبىز ويلاعاننان دا اشكوز جان ەكەنىن ءارى ونىڭ كوررۋپتسيالىق ارەكەتتەرىنىڭ تامىرى تىم تەرەڭدە جاتقانىن كورسەتتى، - دەيدى ميراندا پاترۋچيچ.
ەسەپتە كورسەتىلگەندەي، ۇيالى بايلانىس وپەراتورلارى وزبەكستاندا 3G ليسەنزياسىن كەدەرگىسىز الۋ ءۇشىن، وپتيكالىق كابەل مەن WiMAX جانە WiFi جەلىلەرىن تارتۋعا رۇقسات الۋ ءۇشىن گۇلنارا كاريموۆانىڭ ەسەپ-شوتتارىنا كۇدىكتى تولەمدەر ارقىلى جۇزدەگەن ميلليون دوللار اۋدارعان.
ەسەپتە «تالابىنا كونبەگەن كومپانيالاردى گۇلنارا كاريموۆا وزبەكستاننىڭ مەملەكەتتىك مەكەمەلەرى ارقىلى جابامىن دەپ قورقىتقان. ول كومپانيالاردان تەگىن ءارى ەشبىر شارت قويماستان ۇلەس تولەۋىن تالاپ ەتكەن. ادەتتە ول كىرىسى مول تەلەكوممۋنيكاتسيالىق كومپانيالاردان 26 پايىز ۇلەس العان» دەپ جازىلعان.
مىسال رەتىندە كاريموۆانىڭ قىسىمىمەن وزبەكستان نارىعىنان كەتۋگە ءماجبۇر بولعان COSCOM ۇيالى بايلانىس كومپانياسى اتالادى.
كومبەنىڭ بەتى عانا
ميراندا پاترۋچيچ ەسەبىندە گۇلنارا كاريموۆانىڭ تەك تەلەكوم بيزنەسىندەگى 2001 - جىلدان بەرگى بۇكىل كىرىسىن عانا ەسەپتەپ شىعۋعا تىرىسقان. ورتالىق ساراپشىلارى وزبەكستانداعى گۇلنارا كاريموۆا باقىلاۋىندا ۇستاعان وزگە كومپانيالاردان تۇسكەن تابىسىن الداعى ايلاردا جاريالاماق.
قازىر شۆەيتساريادا گۇلنارا كاريموۆانىڭ يەلىگىندە دەپ بولجانعان Takiland ltd كومپانياسىنىڭ 800 ميلليون دوللارى، ال شۆەتسيادا 30 ميلليوننان كوپ ا ق ش دوللارى بۇعاتتالعان.
كوررۋپتسيالىق جانە ۇيىمداسقان قىلمىستاردى زەرتتەۋ ورتالىعى ساراپشىلارى بۇل ەسەپ ارقىلى تەرگەۋشىلەر نازارىن گۇلنارا كاريموۆانىڭ ونداعان ەسەپ- شوتتارى مەن ينۆەستيتسيالىق قورلارىندا ءالى قوزعالماي جاتقان جۇزدەگەن ميلليون دوللارىنا اۋدارعىسى كەلەدى.
2012 - جىلدان بەرى ەۋروپانىڭ وننان اسا ەلىندە قىلمىستىق ىستەر قوزعالىپ، نەگىزگى ايىپتالۋشىلارىنىڭ ءبىرى وزبەكستان پرەزيدەنتى يسلام كاريموۆتىڭ ۇلكەن قىزى دەپ تانىلعان. 42 جاستاعى گۇلنارا كاريموۆانىڭ بيزنەسىن وزبەكستاننىڭ باس پروكۋراتۋراسى دا تەكسەرىپ جاتىر.
وزبەكستان باس پروكۋراتۋراسىنىڭ 2014 - جىلدىڭ كۇزىندەگى سوڭعى مالىمدەمەسىنە سايكەس، گۇلنارا كاريموۆا ءۇي قاماعىندا وتىر. ونىڭ سىبايلاستارى ۇزاق جىلدارعا سوتتالعان.
كەيبىر ساراپشىلار ساياسي امبيتسيالارى بايقالعان سوڭ گۇلنارا كاريموۆا اكە قاھارىنا ۇشىرادى دەپ سانايدى.
«ازاتتىق راديوسى»
