سپورت جۇلدىزدارى قازاقستاندىقتاردى ناۋرىز مەرەكەسىمەن قۇتتىقتادى
وسى تۇستا، اۋىر اتلەت ۆلاديمير سەدوۆ مەملەكەتتىك تىلدە: «ناۋرىز اماندىق، قۋانىش، جاقسىلىق اكەلسىن! كوكتەم جىلۋى مەن ءومىر قۋانىشىن تىلەيمىن! مىقتى دەنساۋلىق پەن ۇزاق ءومىر، قۇشاق تولعان گۇل مەن ىقىلاس تىلەيمىز!» دەگەن ءبىراۋىز قۇتتىقتاۋىن جولداپ، وقىرماندارىنا جاقسى سىيلىق جاسادى.
تاعى بىر اپايتوس زىلتەمىرشىمىز جاسۇلان قىدىربايەۆ تا مەرەكەدەن تىس قالعان جوق. تاۋ بوكتەرىندە ول ارنايى بەينە قۇتتىقتاۋ ءتۇسىرىپ جىبەرگەن. وندا ول: «بارلىقتارىڭىزدى ۇلىستىڭ ۇلى كۇنى - ناۋرىز مەرەكەسىمەن قۇتتىقتايمىن! ناۋرىزدان ناۋرىزعا جەتە بەرەيىك، تابىس-بەرەكەگە جەتە بەرەيىك! ناۋرىز قۇتتى بولسىن!» دەپ جۇرەكجاردى لەبىزىن جەتكىزگەن.
زارينا دياس تا ءوزىنىڭ جىلى لەبىزىن قالدىرۋدى ۇمىتپادى. «ناۋرىز قۇتتى بولسىن!» دەپ قانا حالقىن قۇتتىقتاعان تەننيسشى قىزىمىزدىڭ ءوز انا تىلىنە، سالت-داستۇرىنە دەگەن قۇرمەتى ءتانتى ەتتى.
كاسىپقوي بوكسشىمىز رومان جايلاۋوۆ ەرگە ءتان مىنەزبەن كوپ سوزگە جول بەرمەگەنگە ۇقسايدى. «ناۋرىز قۇتتى بولسىن!» دەگەن سوزدەرىمەن قاتار، ينستاگرام ارقىلى قۇتتىقتاۋ سۋرەتىن سالىپ جىبەردى. قازىر رومان ا ق ش- تا كەلەسى جەكپە-جەگىنە قىزۋ جاتتىعۋدا.
اۆتور: جاسۇلان جولدىبايەۆ
