يتالياندىق نەيروحيرۋرگ ادامنىڭ باسىن الماستىرۋ وپەراتسياسىن جاساماق

كاناۆەرونىڭ جوباسى ءساتتى اياقتالعان جاعدايدا قانشالىقتى شىنايى جانە ونىڭ ەتيكالىق، پسيحولوگيالىق سالدارى قانداي بولماق؟ 1954 - جىلى كەڭەس دارىگەرى ۆلاديمير دەميحوۆ 20 يتكە قوسىمشا باستار سالىپ بەردى. تاجىريبە جاسالعان جانۋارلار وپەراتسيادان كەيىن ءتىرى قالدى. الايدا ۇزاق ۋاقىتقا ەمەس، تەك بىرنەشە كۇنگە. 16 - جىلدان كەيىن امەريكاندىق عالىم روبەرت ۋايت ءبىر مايمىلدىڭ باسىن ەكىنشى مايمىلعا قويىپ، اۋىستىرادى. جانۋار 9 كۇن عانا ءومىر سۇرەدى جانە ونى ءومىر دەپ ايتۋ مۇمكىن ەمەس ەدى.

جۇلىنى كەسىلگەندىكتەن ول دەنەنى سەزبەي، ونى باسقارا الماي قالادى. كاناۆەرو بۇدان جاقسى ناتيجەدەن ءۇمىتتى. حيرۋرگ دەنەلەرى جارامسىز بولىپ قالعاندارعا - ەگەر مەتاستازا باسقا دەيىن جەتپەسە، قاتەرلى ىسىككە شالدىققاندارعا جانە ستيۆەن حوكينگ سياقتى بۇلشىقەت اتروفياسى بولعان ناۋقاستارعا كومەكتەسە الامىن دەگەن سەنىمدە. اعزاداعى راديكالدىق وزگەرىس كۇتپەگەن ناتيجە بەرۋى مۇمكىن. باسىن (دەنەسىن) اۋىستىرعان پاتسيەنت قولىن نەمەسە اياعىن «وزىمدىكى» دەپ تانىماۋى مۇمكىن.

بۇل جاعدايدا ول ادامعا كەدەرگى كەلتىرەدى، ويتكەنى ول ءاردايىم ءوز نازارىن سوعان اۋدارىپ تۇراتىن بولادى (بالالىق شاقتا جاڭا عانا ەمدەلگەن ءتىستى تىلمەن ءتيىسىپ كورگىڭىز نەمەسە جاراقاتتانعان جەردى قاسىعىڭىز كەلگەنىن ەسكە ءتۇسىرىڭىز).

باسقا دا نۇسقا بولۋى مۇمكىن: باس ميىنىڭ قىرتىسى بۇرىنعى دەنەدەگى اياق-قولدىڭ ورنالاسۋىن، فورماسىن جانە كۇشىن ەستە ساقتايتىن بولادى. ال سەزىم ەشقايدا جوعالماسا، وندا بۇرىنعى سول اياق-قولدار فانتومدى رەتىندە قابىلداناتىن بولادى. ارينە مۇمكىن بولاتىن بارلىق پروبلەما بۇلار عانا ەمەس. باسىن اۋىستىرعان ادامنىڭ جەكە تۇلعاسى تۇبەگەيلى وزگەرۋى مۇمكىن. ءبىراق ناقتى قالاي وزگەرەتىنىن ءالى ەشكىم ايتا المايدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى