ەلىمىزدە يپوتەكادان «يتتەي» بولعان بورىشكەرلەردىڭ ماسەلەسى شەشىلمەك
ۇلتتىق بانك 2004-2009 - جىلدار ارالىعىندا بەرىلگەن تۇرعىن ۇيلەردىڭ نەسيەسىن قايتا قارجىلاندىرۋ باعدارلاماسىن ازىرلەۋدە.
ۇلتتىق بانك ازىرلەپ وتىرعان باعدارلاما يپوتەكالىق بورىشكەرلەر ماسەلەسىن شەشۋگە باعىتتالعان. كومەككە مۇقتاج جانداردىڭ جاعدايىن جاقسارتۋدى كوزدەگەن جوبا تەتىكتەرى، ءالى دە ناقتىلانۋدا. قازىر ۇلتتىق بانك، «نۇر وتان» پارتياسى جانە بورىشكەرلەردىڭ باسىن بىرىكتىرەتىن قوعامدىق ۇيىمدار بىرنەشە كەڭەس وتكىزىپ ءجۇر.
بىرلەستىك جەتەكشىلەرى بۇل باستامانى تۇيتكىلدى ماسەلەنىڭ ءتۇيىنىن شەشۋگە جاسالعان يگى قادام دەپ سانايدى.
«ەلىمىزدىڭ نارىقتىق ەكونوميكاسىنىڭ دامۋىنا، ءوزىنىڭ كەلبەتىن كورسەتۋىنە جانە ءوزىنىڭ مارتەبەلىك الەۋەتىن كوتەرۋگە باعدارلاما جاقسى كەلىپ وتىر. قازاقستاندا 17 مىڭ ازاماتتىڭ قارىز نەسيەسى بار. ولارردىڭ ماسەلەسى تولىق شەشىلەدى دەپ مەن سەنەمىن»، - دەدى «ەل بىرلىگى» وداعىنىڭ پرەزيدەنتى شولپان ريزابەكوۆا.
باعدارلامانىڭ باستى ماقساتى - قيىن جاعدايدا وتىرعان بورىشكەرلەردى مۇمكىندىگىنشە كوبىرەك قامتۋ بولىپ وتىر. سونىڭ ىشىندە جوباعا 2004-2009 -جىلدار ارالىعىندا قارىز العان ازاماتتار قاتىسا الادى. سەبەبى ءدال سول كەزدە زارداپ شەككەندەردىڭ سانى ارتا تۇسكەن. بۇدان بولەك، قايتا قارجىلاندىرۋ جوباسىنىڭ بىرنەشە شارتتارى بار.
«2015 -جىلى 1 قاڭتار بويىنشا بورىشكەردىڭ قارىزى 200 مىڭ دوللاردان اسپاۋى ءتيىس. ءۇشىنشى شارتى بورىشكەردىڭ كەپىلدە تۇرعان ءۇيى جالعىز بولۋى كەرەك. ونىڭ باسپاناسى 120 شارشى مەتردەن اسپاۋى قاجەت. اتالعان نەگىزگى شارتتار بويىنشا بورىشكەرلەر وسى باعدارلاماعا قاتىسا الادى»، - دەدى ق ر ۇ ب تۇتىنۋشىلار قۇقىعىن قورعاۋ دەپارتامەنتى باسشىسىنىڭ ورىنباسارى ءداميلا بايدىلدايەۆا.
يپوتەكا العانداردىڭ قارىزىن قايتا قارجىلاندىرۋعا 130 ميلليارد تەڭگە ءبولىندى. بۇل از اقشا ەمەس. دەسە دە، بۇل پروبلەمالىق نەسيەلەردىڭ يەلەرىنەن قارىزى تۇبەگەيلى كەشىرىلەدى دەگەن ءسوز ەمەس. رەتتەۋشى تاراپ قارجىنىڭ قايتارىمى بولاتىنىن ەسكەرتەدى. قوماقتى اقشا نەسيەسىن تولەي الماي جۇرگەن ادامداردىڭ قارىزدارىن ەسەپتەن شىعارۋعا جۇمسالادى.
«ءبىز ۇكىمەتكە جەكە تابىس سالىعى ماسەلەسىن قايتا قاراستىرۋىن سۇراۋىمىز قاجەت. بۇل جايت 3 جىلدان بەرى ايتىلىپ كەلەدى. بۇل زايمشىلار ءۇشىن دە، بانك ءۇشىن دە ءتيىمدى بولادى دەپ سانايمىن»، - دەدى قازاقستان قارجىگەرلەر قاۋىمداستىعى كەڭەسىنىڭ ءتوراعاسى سەرىك احانوۆ.
اتاپ وتەرلىگى، قازىرگى تاڭدا ۇلتتىق بانك دەرەگى بويىنشا بەرەشەكتىڭ نەگىزگى قالدىعى 36 ميلليارد تەڭگەدەن اسسا، شەتەل ۆاليۋتاسىندا ول 91 ميلليارد تەڭگەدەن ارتقان. بۇل زايمدار 2004-2009 -جىلدار ارالىعىندا راسىمدەلگەن.
«الماتى» تەلەارناسى
